ތ.ގާދިއްފުއްޓާއި ލ.މާވަށުގައި ވޯޓުލުމުގެ މަސައްކަތް އަލުން ކުރިއަށްގެންދަން އިލެކްޝަން ކޮމިޝަނުން ނިންމަވައިފިއެވެ.
އިލެކްޝަން ކޮމިޝަނުން ބޭއްވި ނޫސްވެރިންގެ ބައްދަލުވުމުގައި އެކޮމިޝަންގެ ރައީސް އަޙްމަދު ޝަރީފް ވިދާޅުވީ، ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބު 2020އާ ގުޅޭގޮތުން ހުށަހެޅި ޝަކުވާތަކާ ގުޅިގެން ތ.ގާދިއްފުއްޓާއި ލ.މާވަށުގައި އަލުން ވޯޓުލާން ނިންމާފައިވާކަމަށެވެ. މި 2 ރަށުގައިވެސް ވޯޓުލުން އަލުން ކުރިއަށްގެންދަން ނިންމާފަައިވަނީ ދާއިރާ ނޫން ބަޔަކު އެ 2 ރަށުގެ ކައުންސިލަށް ވޯޓުލާފައިވާތީކަމަށްވެސް ޝަރީފް ވިދާޅުވިއެވެ.
ޝަރީފު ވިދާޅުވީ، ގާދިއްފުށީފައި ވޯޓުލުން ކުރިއަށްގެންދަން ނިންމާފައި ވަނީ އެމްޑީޕީގެ ކެންޑިޑޭޓް މަރިޔަމް ހަސަނާއި ޕީޕީއެމްގެ ކެނޑިޑޭޓް ހައްވާ ޢަބްދުލްޙާދީއާ ދެމެދު ކަމަށެވެ. އަދި މާވަށުގައި ކުރިއަށްގެންދާނީ ކައުންސިލްގެ ރައީސް ކަމުގެ ވޯޓު އެކަނިކަމަށް ޝަރީފް ވިދާޅުވިއެވެ. މި 2 ރަށުގައި ވޯޓުލުން އަލުން ބާއްވާނެ ތާރީޚެއް އިލެކްޝަން ކޮމިޝަނުން ފަހުން އިޢުލާން ކުރައްވާނެކަމަށާއި، 2 ރަށުގައިވެސް ވޯޓުލެވޭނީ، ރަޖިސްޓްރީވެފައިވާ މީހުންނަށް އެކަނިކަމަށްވެސް ޝަރީފް ވިދާޅުވިއެވެ.
"މި 2 ރަށުގައިވެސް އަލުން ވޯޓުލާއިރު، ވޯޓުލެވޭނީ ރަޖިސްޓްރީވެފައިވާ ފަރާތްތަކަށް އެކަނި. ވޯޓުލުން މި 2 ރަށުގައި ބާއްވާނެ ތާރީޚެއް ކޮމިޝަނުން ފަހުން އިޢުލާން ކުރާނަން" ޝަރީފް ވިދާޅުވިއެވެ.
އިލެކްޝަންސް ކޮމިޝަނުގެ ރައީސް ވިދާޅުވީ އިންތިޚާބާގުޅޭގޮތުން އެންމެ ގިނައިން ޝަކުވާ ހުށަހެޅިފައިވަނީ ބާޠިލް ވޯޓުތަކާ ގުޅޭގޮތުންކަމަށެވެ. އަދި މިފަހަރުގެ އިންތިޚާބުގައި ބާޠިލް ވޯޓު ގިނަކަން ފާހަގަކުރައްވައި އެގޮތަށް މެދުވެރިވާން ދިމާވި ސަބަބުތަކުގެ ތެރޭގައި ކުރީގެ އިންތިޚާބުތަކާ ޚިލާފަށް މިފަހަރުގެ ވޯޓު ކަރުދާސް ބަދަލުވެފައިވުން ހިމެނޭކަމަށް ޝަރީފް ވިދާޅުވިއެވެ. އަދި ބާޠިލު ވޯޓު ގުނުމުގައި ބައެއް އޮފިޝަލުންނަށް އޮޅުންއަރާފައިވުންފަދަ ކަންކަންވެސް ހިނގާފައިވާކަމަށް ޝަރީފް ވިދާޅުވިއެވެ.