އިނގިރޭސިވިލާތާއި އިންޑިއާ 1 ބިލިއަން ޑޮލަރުގެ ވިޔަފާރީގެ އެއްބަސްވުމެއް ޤާއިމްކުރަން ނިންމައިފިކަމަށް އިނގިރޭސި ވިލާތުގެ ބޮޑުވަޒީރު ވިދާޅުވެއްޖެއެވެ.
މި އެއްބަސްވުމުގެ ދަށުން އިންޑިއާގައި 533 މިލިއަން ޕައުންޑުގެ އިންވެސްޓްމަންޓްތައް ކުރިއަށްގޮސް ގާތްގަނޑަކަށް 6000 އެއްހާ ވަޒީފާ އުފެދިގެންދާނެއެވެ. މީގެ އިތުރުން ކްލިނިކަލް ޓްރައަލް ތަކަށާއި ވެކްސިން އުފެއްދުމަށް 240 މިލިއަން ޕައުންޑް އިންވެސްޓްކުރުމަށް ހަމަޖެހިފައިވަނީ އިންޑިއާގެ ސީރަމް އިންސްޓިއުޓަށެވެ.
މި އެއްބަސްވުމުގެ ސަބަބުން މުސްޠަޤްބަލުގައި އިނގިރޭސިވިލާތާއި އިންޑިއާގެ ފްރީ ޓްރޭޑް އެއްބަސްވުމަކަށް މަގުފަހިވެގެންދާނެކަމުގައިވެސް ރިޕޯޓްތައް ބުނެއެވެ. ދެ ޤައުމުގެ މެދުގައި އޮންނަ އިޤްޠިޞާދީ ގުޅުމުގެ ސަބަބުން ދެ ޤައުމުގެ ރައްޔިތުން ރައްކާތެރިކުރާކަމަށް އިނގިރޭސި ވިލާތުގެ ބޮޑުވަޒީރު ވަނީ ވިދާޅުވެފައެވެ.
ޓެކްނޮލޮޖީ އަދި ސިއްޙީ ދާއިރާގައި ގިނަ ވަޒީފާތަކެއް މި އެއްބަސްވުމުގެ ސަބަބުން އުފެދިގެންދާނެ ކަމަށާއި ކޯވިޑްގެ ބަލިމަޑުކަމުން އަރައިގަތުމަށް އާއިލާތަކަށާއި މުޖުތަމައުއަށް ބޮޑު އެހީއަކަށް މި އެއްބަސްވުން ވެގެންދާނެކަމަށް ބޮޑު ވަޒީރު ވިދާޅުވިއެވެ. އަދި މީގެސަބަބުން ދެ ޤައުމުގެ އިޤްޠިޞާދު ކުރިއަރައިގެންދާނެ ކަމަށްވެސް ވަނީ ވިދާޅުވެފައެވެ.