ކޯވިޑްގެ ބަލިމަޑުކަމާއި ސަބަބުން ހީނަރުވެފައިވާ އިޤްޠިޞާދު އާރާސްތުކޮށް، ވަޒީފާތައް އިތުރުކުރުމަށްޓަކައި އިންފްރާސްޓަރަކްޗަރ ޕްރޮޖެކްޓްތަކަށް އިންވެސްޓްކޮށް، އުފެއްދުންތެރިކަން އިތުރުކުރުމަށް ޕާކިސްތާނުން ނިންމައިފިއެވެ.
ޕާކިސްތާނުގެ މާލީ ވަޒީރު ޝައުކަތު ތާރިން ވިދާޅުވީ އިންފްރާސްޓަރަކްޗަރ ޕްރޮޖެކްޓްތަކަށް ކުރާ ޚަރަދުތައް 40 އިންސައްތައަށް އިތުރުކުރުމަށް ނިންމާފައިވާކަމަށެވެ.
އަންނަ އަހަރު އެޤައުމުގެ އިޤްޠިޞާދު 5 އިންސައްތައަށް އިތުރުކުރަން މާލީ ވުޒާރާއިން ނިންމާފައިވާއިރު މިއަހަރުގެ ޖުލައިމަހު 6 ބިލިއަން ޑޮލަރު ތަރައްޤީގެ މަޝްރޫޢުތަކަށް ހޭދަކުރުމަށް މައި ސަރުކާރުން ވަނީ ނިންމާފައެވެ. ދުނިޔޭގެ ނިސްބަތުން ބަލާއިރު 5 ވަނައަށް އެންމެ އާބާދީ ބޮޑު ޕާކިސްތާންގައި 110 މިލިއަން ޒުވާނުން އުޅެއެވެ. އަދި މިއީ މިވަރުގެ ޤައުމަކަށް އެންމެ މަދުވެގެން ބޭނުންވާވަރުކަމަށް އެ ވުޒާރާއިން ބުނެއެވެ.
އިޤްޠިޞާދު ރަނގަޅުކުރުމަށްޓަކައި އައިއެމްއެފްގެ 6 ބިލިއަން ޑޮލަރުގެ ލޯން އެހީ ދައްކާނެ ލުއި ގޮތްތަކާމެދު މާލީ ވަޒީރު މިހާރުވެސް ދަނީ އައިއެމްއެފްއާއި މަޝްވަރާތައްކުރަމުންނެވެ. ބަޖެޓް ބެލެންސްކުރުމަކީ މިވަގުތު ޕާކިސްތާނަށް އެންމެ މުހިންމު އެއް ކަންތަކެވެ. އައިއެމްއެފްއިން ލަފާކޮށްފައިވާ 4 އިންސައްތައަށްވުރެ މަތިކޮށް ސަރުކާރުން ކަނޑައަޅާފައިވާ ޖީޑީޕީ ޓާގެޓަކީ 6 އިންސައްތައިގެ ކުރިއެރުމެއް ހޯދުމެވެ. ވަޒީރު ވިދާޅުވީ އިޤްޠިޞާދީ ގޮތުން ކުރިއެރުން ނާންނަކަމުގައިވާނަމަ ކޮންމެ އަހަރަކު އެޤައުމަށް ބޭނުންވާ 2 މިލިއަން ވަޒީފާއަށް ބުރޫއަރާނެކަމަށެވެ.
ޤައުމުގެ އާމްދަނީ އިތުރުނުކޮށް އިޤްޠިޞާދު ކުރިއަރައިގެން ނުދާނެކަމާއި އަދި މިއަހަރުގެ އަމާޒަކީ 4.75 ޓްރިލިއަން ރުޕީސްގެ އަމްދަނީއެއް ހޯދުންކަމަށެވެ. އަދި އަންނަ އަހަރު 6 ޓްރިލިއަން ރުޕީސް އާމްދަނީގެ ގޮތުގައި ހޯދުމަކީވެސް އަމާޒެއްކަމަށް ވަޒީރު ވިދާޅުވިއެވެ.
ޕާކިސްތާނުގެ އިޤްތިޞާދު އާރާސްތުކުރުމުގެ މަސައްކަތްކުރަމުންދާއިރު އޭޝިއަން ޑިވެލޮޕްމަންޓް ބޭންކް އަދި ވޯލްޑް ބޭންކުން 20 ބިލިއަން ޑޮލަރުގެ ލޯނު އެހީ ހޯދުމަށް ޕާކިސްތާނުން ދަނީ ތައްޔާރުވަމުންނެވެ.