ރ.މާމިގިލީގައި ތަރައްޤީކުރާ "ކޯރާކޯރާ މޯލްޑިވްސް" ރިސޯޓް އަންނަ އޮކްޓޫބަރު މަހު ހުޅުވުމަށް ތައްޔާރުވެއްޖެއެވެ.
ތަފާތު ކޮންސެޕްޓަކަށް ތަރައްޤީކުރާ މި ރިސޯޓުން އެންމެ ފާހަގަކޮށްލެވެނީ ރާއްޖޭގެ ތާރީޚު ދައްކުވައިދޭ ދާރުލްއާސާރެވެ. މިއީ ރިސޯޓެއްގައި ހުޅުވާ މިފަދަ ފުރަތަމަ ދާރުލްއާސާރެވެ. އަދި ޤައުމީ ދާރުލްއާސާރު ފިޔަވަައި ރާއްޖޭގައި ދިވެހި ސަޤާފަތާއި ތާރީޚު ދައްކުވައިދޭ އެންމެ ގިނަ ޢަދަދެއްގެ ތަކެތި ފެންނަން ހުންނާނީ މި ދާރުލް އާސާރުންކަމަށް ކޯރާކޯރާ ރިސޯޓުން ހާމަކުރެއެވެ. އެގޮތުން އާސާރީގޮތުން ފާހަގަކޮށްލެވޭ ގާތްގަނޑަކަށް 400 ތަކެއްޗާއި ސަޤާފަތް ދައްކުވައިދޭ ކުރެހުންތަކެއް މި ދާރުލްއާސާރުގައި ހުންނާނެ ކަމަށްވެސް އެ ރިސޯޓުން ހާމަކުރެއެވެ.
ކޯރާކޯރާ މޯލްޑިވްސްއަށް ވެލާނާ އިންޓަރނޭޝަނަލް އެއަރޕޯޓުން ސީ ޕްލޭންގައި 45 މިނެޓުން ދެވޭނެއެވެ. 5 ތަރީގެ މި ރިިސޯޓުގައި ތަފާތު އެކި ކެއުންތައް ލިބޭ 5 ރެސްޓޯރެންޓު ހުރެއެވެ. ސްޕާއެއްގެ ޚިދުމަތާއި ޕަޑީ ސެޓިފައިޑް ސްކޫލެއްވެސް ހުރެއެވެ. ކޯރާކޯރާ މޯލްޑިވްސް އަކީ 100 ކޮޓަރީގެ ރިސޯޓެކެވެ.
ހުސްވި އަހަރުތެރޭ ރާއްޖޭގެ ފަތުރުވެރިކަމަށް އައި މަޑުޖެހުމާއެކު ރިސޯޓްތައް ހުޅުވާ ތާރީޚުތައްވެސް ލަސްވެގެން ދިޔައެވެ. އެގޮތުން މިދިޔަ އަހަރު ރާއްޖޭގައި އަލަށް 12 ރިސޯޓު ހުޅުވުމަށް އަމާޒުކުރި ނަމަވެސް އަހަރު ނިމިގެން ދިޔައިރު، ހުޅުވިގެން ގޮސްފައިވަނީ 4 ރިސޯޓެވެ.
އެހެންނަމަވެސް މިއަހަރުގެތެރޭ ގިނަ ޢަދަދެއްގެ ރިސޯޓުތަކެއް ރާއްޖޭގައި ހުޅުވިގެންދާނެކަމަށް ޓޫރިޒަމް މިނިސްޓްރީން ލަފާކުރައްވައެވެ. އެގޮތުން އެ މިނިސްޓްރީން މީގެކުރިން ވިދާޅުވެފައިވަނީ މިއަހަރުތެރޭ ރާއްޖޭގައި އަލަށް 15 ރިސޯޓު ހުޅުވިގެންދާނެކަމަށެވެ.