ފިހާރަތަކާއި ކެފޭ ރެސްޓޯރެންޓްތަކުން މެންދަމު 12 ޖެހުމާއި ހަމައަށް ޑެލިވަރީގެ ޚިދުމަތްދެވޭނެ

ކާފިއުގެ ވަގުތުތަކުގައި މާލެ ސަރަޙައްދުގެ ފިހާރަތަކުން މެންދަމު 12:00 ޖެހުމާއި ހަމައަށް ޑެލިވަރީގެ ޚިދުމަތް ދެވޭނެ ކަމަށް އިކޮނޮމިކް މިނިސްޓްރީން ހާމަކޮށްފިއެވެ.

މިނިސްޓްރީ އޮފް އިކޮނޮމިކް ޑިވެލޮޕްމަންޓުންވަނީ 12 މެއި އިން 18 މެއިގެ ނިޔަލަށް މުދާ ވިއްކާ ތަންތަން ހުޅުވާފައި ބެހެއްޓޭނެ ގަޑިތަކާއި، ކެއިން ބުއިމުގެ ޚިދުމަތްދޭ ތަންތަނުން ޢަމަލުކުރަންވީ ގޮތްތައް ކަނޑައަޅާފައެވެ.
އެގޮތުން މުދާ ވިއްކާ ތަންތަނުން ޢާންމުންނަށް ހުޅުވާލައިގެން ޚިދުމަތް ދެވޭނީ، ފަތިހު 5:00 އިން ހަވީރު 4:00 އާ ދެމެދުއެވެ. އަދި ހަވީރު 4:00 އިން މެންދަމު 12:00 އަށް، މޯލްޑިވްސް ޕޮލިސް ސަރވިސް ގެ ހުއްދައާއެކު ޑެލިވަރީގެ ޚިދުމަތް ދެވޭނެ ކަމަށާއި، މުދާ ވިއްކާ ތަންތަނުން ހެލްތު ޕްރޮޓެކްޝަން އެޖެންސީން ކަނޑައަޅާ އުޞޫލުތަކާ އެއްގޮތަށް ޢަމަލުކުރަން ޖެހޭނެ ކަމަށްވެސް އިކޮނޮމިކް މިނިސްޓްރީން ވިދާޅުވެއެވެ.

ކޯވިޑާ ގުޅިގެން އަޅާ ފިޔަވަޅެއްގެ ގޮތުން ކެފޭ ރެސްޓޯރަންޓްތަކުގެ އެތެރޭގައި ތިބެގެން ޚިދުމަތް ދިނުންވެސްވަނީ މަނާކޮށްފައެވެ. ނަމަވެސް ޓޭކްއަވޭއާއި ޑެލިވަރީގެ ޚިދުމަތް ދެވޭނެއެވެ. އިކޮނޮމިކް މިނިސްޓްރީން ވިދާޅުވީ ޓޭކްއަވޭގެ ޚިދުމަތް ދެވޭނީ ހަވީރު 16:00އާ ހަމައަށްކަމަށެވެ. އަދި ފުލުހުންގެ ހުއްދައާއެކު ޑެލިވަރީގެ ޚިދުމަތް މެންދަމު 12:00 އަށް ދެވޭނެއެވެ.

ފުލުހުން ވިދާޅުވީ މި ޚިދުމަތް ދިނުމަށް މިއަހަރުގެ ފެބްރުއަރީ 13ގެ ފަހުން ފުލުހުން ދޫކޮށްފައިވާ ފާސްތައް ބޭނުންކުރެވޭނެކަމަށެވެ. އަދި އަލަށް ޑެލިވަރީގެ ޚިދުމަތަށް އެދޭ ފަރާތްތަކަށްވެސް ހުއްދަ ދެމުންދާނެކަމަށެވެ.

ކޯވިޑް-19 ފެތުރެމުންދާތީ ރައްކާތެރިކަމުގެ ފިޔަވަޅެއްގެ ގޮތުން، މާލެ ސަރަޙައްދުގައި ބޭރަށް ނިކުމެ އުޅެވޭ ވަގުތުވަނީ މަދުކޮށްފައެވެ. ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ އުސޫލުގައިވާގޮތުން، ހުއްދަ ނެތި ހަވީރު 16:00އިން ފަތިހު 04:00އަށް ބޭރުގައި އުޅުމަކީ މަނާކަމެކެވެ. މިއާ ގުޅިގެން ޒަރޫރީ ބޭނުންތަކުގައި ނުވަތަ ޚާއްސަ ހާލަތްތަކުގައި ބޭރަށް ނިކުންނަންޖެހޭ މީހުންނަށް ބޭރަށް ދެވޭނީ ފުލުހުންގެ ހުއްދައާއެކުއެވެ.

ފުލުހުން މިހާރުވަނީ ހުއްދަ ދޫކުރަން ފަށާފައެވެ. ހުއްދަ ދޫކުރާނީ ފުލުހުންގެ ޕޯޓަލް police.gov.mv/permit މެދުވެރިކޮށާއި ފުލުހުންގެ ކޯލް ސެންޓަރ 1665 އިންނެވެ.

އިމަރޖެންސީ ޙާލަތް ނޫން ޙާލަތުގައި ސިއްޙީ ޚިދުމަތްތައް ހޯދަން ދިއުމާއި، އެހެނިހެން ޒަރޫރީ ބޭނުންތަކުގައި ބޭރަށް ނިކުންނަ ނަމަވެސް ފުލުހުންގެ ހުއްދަ ނަގަން ޖެހޭނެއެވެ. ފުލުހުން ވިދާޅުވީ ޓެކްސީފަދަ ދަތުރުފަތުރުގެ ޚިދުމަތްވެސް ހޯދޭނީ، ފުލުހުންގެ ހުއްދައެއް އޮވެގެން ބޭރަށްނިކުމެ އުޅޭ މީހުންނަށް އެކަނިކަމަށެވެ.