ވިއްސާރައިގެ ސަބަބުން ފުވައްމުލައް ސިޓީގައިވެސް ފެންބޮޑުވެ، ބޮޑެތި ގެއްލުންތަކެއް ލިބިއްޖެއެވެ.
ރާއްޖެއަށް މިހާރު ކުރަމުން މިދާ ހުޅުނގު މޫސުމުގެ ވިއްސާރައިގެ ސަބަބުން ފާއިތުވި 48 ގަޑިއިރުގެ ތެރޭގައި ފުވައްމުލައް ސިޓީއަށްވެސް ވަނީ ބޯކޮށް ވާރޭވެހިފައެވެ.
ޕީ.އެސް.އެމް ނިއުސްއަށް މަޢުލޫމާތުދެއްވަމުން ފުވައްމުލައް ސިޓީގެ މޭޔަރ ޢަބްދުﷲ ފަލާޙް ޝަރީފް ވިދާޅުވީ، މިހާރު ކުރަމުންދާ ވިއްސާރައިގެ ސަބަބުން ރަށުގެ އެކި ހިސާބުތަކުގައި ފެންބޮޑުވެފައިވާކަމަށާ، އެންމެ ބޮޑަށް އަސަރުކޮށްފައިވަނީ ރަށުގެ މެދުތެރެއަށްކަމަށެވެ. އަދި 200އަށްވުރެ ގިނަ ގޭބިސީން ވެލިބަސްތާ ޖަހައިދިނުމަށް އެދި ކައުންސިލަށް ހުށަހަޅާފައިވާކަމަށާ، ފުލުހުންނާއި ސިފައިންނާއި ކައުންސިލް ގުޅިގެން މިހާރުވެސް އެ މަސައްކަތް ކުރަމުންދާކަމަށް އޭނާ ވިދާޅުވިއެވެ.
ފަލާޙް ވިދާޅުވީ، ބޯކޮށް ވާރޭވެހި ފެންބޮޑުވުމުގެ ސަބަބުން ގޭގޭގައި ހިފާގެންގުޅޭ ސާމާނާއި ފަރުނީޗަރުތަކަށްވެސް އެކިވަރުގެ ގެއްލުން ލިބިގެން ރިޕޯޓްކޮށްފައިވާކަމަށެވެ. އަދި ބައެއް ގޭބިސީތަކުގައި ދިރިއުޅޭ ނީހުން އަމިއްލައަށް އެހެން ތަންތަނަށް ބަދަލުވެފައިވާއިރު، 3 ޢާއިލާއަކަށް ވަގުތީ ބޯހިޔާވެހިތަކަށް ބަދަލުވުމަށް ކައުންސިލުންވެސް އެހީތެރިކަން ފޯރުކޮށްދީފައިވާކަމަށް ފަލާޙް ވިދާޅުވިއެވެ. އޭނާ ވިދާޅުވީ، ވިއްސާރައިގެ ސަބަބުން ލިބުނު ގެއްލުންތައް ދެނެގަތުމުގެ މަސައްކަތް މިހާރުވެސް ކުރަމުންދާކަމަށެވެ. އަދި އެ މަސައްކަތް ކުރިއަށްއޮތް 2 ދުވަހެއްގެ ތެރޭގައި ނިންމާލެވޭނެކަމަށާއި، ވިއްސާރައިގެ ސަބަބުން ސީދާ ލިބުނު ގެއްލުންތަކާއި ޢަދަދުތައް ސާފުވާނީ އޭރުންކަމަށްވެސް އޭނާ ވިދާޅުވިއެވެ.
ފުވައްމުލައްކުގެ ގިނަ މަގުތަކެއްގައި އަދިވެސް އޮތީ ފެންބޮޑުވެފައެވެ. ފެން ހިއްދުމުގެ މަސައްކަތް މިހާރުވެސް ކުރަމުންދާއިރު، މޫސުންގޯސްވުމަކީ އެ މަސައްކަތަށް ކުރިމަތިވާ ވަރަށް ބޮޑު ގޮންޖެހުމެއްކަން ކައުންސިލުން ވަނީ ފާހަގަކުރައްވާފައެވެ.
"ބައެއް ގޭގެއަށް އެބަހުރި 18 އިންޗިއާހަމައަށް ފެންބޮޑުވެފައި. އަދިވެސް ފެން ހިންދުމުގެ މަސައްކަތް އަޅުގަނޑުމެން މިދަނީ ކުރަމުން. އެހެންނަމަވެސް މިހާރުވެސް ވިއްސާރަކުރަމުންދާތީ އެ މަސައްކަތަށް ގޮންޖެހުންތަކެއްވެސް އެބަކުރިމަތިވޭ. އަނެއްކާ ކޯވިޑް-19ގެ ޙާލަތާއި ގުޅިގެން ބައެއް ފަރާތްތައް ކަރަންޓީނަށް ދާންޖެހުމަކީވެސް އަޅުގަނޑުމެންނަށް ދިމާވާ ޝޯޓޭޖެއް" ފަލާޙް ވިދާޅުވިއެވެ.
ފުވައްމުލަކު ސިޓީ ކައުންސިލުން ވިދާޅުވީ، މިއީ ފަހުގެ ތާރީޚެއްގައި ވިއްސާރައިގެ ސަބަބުން އެ ސިޓީއަށް ލިބުނު އެންމެ ބޮޑު ގެއްލުންކަމަށެވެ. އަދި ފެންބޮޑުވި ހިސާބުތަކުން ފެން ބޭރުކުރުމަށްޓަކައި 3 ކާނު ހުޅުވައި، 9 ޕަންޕު ބޭނުންކޮށްގެން ފެން ބޭރުކުރުމުގެ މަސައްކަތްކުރަމުންދާކަމަށް ސިޓީ ކައުންސިލުން ވިދާޅުވެއެވެ. ފުވައްމުލައް ސިޓީގެ ޙާލަތު ރައީސުލްޖުމްހޫރިއްޔާގެ އޮފީހުން ވަރަށް ގާތުން ބަލަމުންދާކަމަށް އެ ސިޓީގެ މޭޔަރ ވަނީ ވިދާޅުވެފައެވެ. ވަކިން ޚާއްސަކޮށް ރައީސުލްޖުމްހޫރިއްޔާގެ ނައިބު ފައިޞަލް ނަސީމް، އެ ސިޓީގެ ކަންކަން ވަރަށް ގާތުން އޮޅުން ފިލުއްވާ، ލިބުނު ގެއްލުންތަކުން އަރައިގަތުމަށް އެޅެންހުރި ފިޔަވަޅުތަކާގުޅޭގޮތުން މަޢުލޫމާތު ސާފުކުރައްވާފައިވާކަމަށް މޭޔަރ ވިދާޅުވިއެވެ.