މާލޭ ސިޓީގެ މޭޔަރާއި ކައުންސިލަރުން ހުވާކުރުމުގެ ރަސްމިއްޔާތުވެސް އޮންލައިންކޮށް ކުރިއަށްގެންދިއުމަށް ނިންމައިފިއެވެ.
މާލޭ ސިޓީއަށް އަލަށް އިންތިޚާބުވި ކައުންސިލަރުންނާއި، މާލޭ ސިޓީގެ މޭޔަރު ހުވާކުރުމާއި، އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ މެންބަރުން އިޤުރާރުގައި ސޮއިކުރުމުގެ ރަސްމިއްޔާތު، ކުރިން ބާއްވަން ނިންމާފައިއޮތީ، ސަލްޓަން ޕާކުގައެވެ.
ޕީ.އެސް.އެމް ނިއުސްއަށް މަޢުލޫމާތުދެއްވަމުން މާލޭ ސިޓީ ކައުންސިލުން ވިދާޅުވީ، މި ނިންމުން ބަދަލުކޮށް، ހުވާކުރުމުގެ ރަސްމިއްޔާތު އޮންލައިންކޮށް ކުރިއަށްގެންދިއުމަށް ނިންމީ، ރަސްމިއްޔާތުގައި ބައިވެރިވުމަށް ކަނޑައަޅާފައިވާ ޢަދަދާއެކުވެސް މި ރަސްމިއްޔާތު ނުބޭއްވޭނެކަމަށް ހެލްތު ޕްރޮޓެކްޝަން އެޖެންސީ، އެޗް.ޕީ.އޭއިން އަންގަވާފައިވާތީކަމަށެވެ. އަދި ރާއްޖޭގެ މޫސުންވެސް މިދުވަސްވަރު ގޯސްވެފައި، ކޯވިޑް-19 މިހާރުގެ ޙާލަތަށް ބަލާ ދެގޮތަށްވެސް ރަސްމިއްޔާތު ބޭއްވުމަށްޓަކާ ކައުންސިލުން ދިޔައީ ތައްޔާރުވަމުންކަމަށް ސިޓީ ކައުންސިލުން ވިދާޅުވިއެވެ.
ސިޓީ ކައުންސިލުން ވިދާޅުވީ، އެޗް.ޕީ.އޭގެ އެންގުމާއެއްގޮތަށް މޭޔަރާއި، ކައުންސިލަރުން ހުވާކުރުން މާދަމާ ކުރިއަށްދާނީ އޮންލައިންކޮށްކަމަށެވެ. މި ރަސްމިއްޔާތު ފެށުމަށް ހަމަޖެހިފައިވަނީ މާދަމާ ހެނދުނު 9 ޖަހާއިރުއެވެ. ރަސްމިއްޔާތުގެ މަންޒަރުތައް ޕީ.އެސް.އެމް މެދުވެރިކޮށް ވަގުތުން ގެނެސްދެމުންދާނެކަމަށާއި، ސިޓީ ކައުންސިލުގެ ފޭސްބުކް ޕޭޖް މެދުވެރިކޮށްވެސް މި ރަސްމިއްޔާތު ލައިވްކުރަމުންދާނެކަމަށް ކައުންސިލުން މަޢުލޫމާތުދެއްވައެވެ.
ލޯކަލް ކައުންސިލުތަކުގެ 4 ވަނަ ދައުރަށް އިންތިޚާބުވި ކައުންސިލަރުންނާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކަށް އިންތިޚާބުވި މެންބަރުން އިޤުރާރުގައި ސޮއިކުރުމުގެ ދަރުބާރުތައް މާދަމާ ރާއްޖޭގެ ހުރިހާ ރަށެއްގައި ކުރިއަށްދާނެއެވެ. ކައުންސިލްތަކުގެ ބެލެނިވެރިފަރާތް ލޯކަލް ގަވަރމަންޓް އޮތޯރިޓީ، އެލް.ޖީ.އޭއިން ވިދާޅުވިގޮތުގައި، 101 ރަށެއްގައި ހުވާކުރުމުގެ ދަރުބާރުގައި ފަނޑިޔާރުން ބައިވެރިވެޑައިގަންނަވާނީ އޮންލައިންކޮށެވެ. އަދި ހުވާކުރުމުގެ ދަރުބާރަށް ފަނޑިޔާރުން ހާޒިރުވެވަޑައިގަންނަވާނީ 99 ރަށެއްގައެވެ. 187 ކައުންސިލަރެއް މާދަމާ ހުވާކުރާނީ އޮންލައިންކޮށެވެ.
ހުވާކުރުމުގެ ކަންކަން ބޭއްވުމަށް ވާންޖެހޭ އެންމެފަހުގެ ތައްޔާރީތައް މިހާރުވެސް ވަމުންދާއިރު، އެއްވެސް ސަބަބަކާހުރެ ހުވާކުރުމުގެ ކަންކަން މާދަމާ ކުރިއަށްނުދާނެ އެއްވެސް ރަށެއް ނޯންނާކެމަށް އެލް.ޖީ.އޭއިން ވަނީ ވިދާޅުވެފައެވެ. އަދި އޮންލައިންކޮށް ނުވަތަ ވަރޗުއަލްކޮށް ކުރިއަށްގެންދާ ރަސްމިއްޔާތުތައްވެސް އެ އޮތޯރިޓީން މޮނިޓަރކޮށް ބަލަމުންދާނެކަމަށް އެލް.ޖީ.އޭއިން ވިދާޅުވެފައިވެއެވެ.