ކޯވިޑްގެ ބަލިމަޑުކަމުން އަރަގައިތުމަށް އިންޓަރނޭޝަނަލް މަނިޓަރީ ފަންޑުން 50 މިލިއަން ޑޮލަރުގެ ލޯނު އެހީ ޤައުމުތަކަށް ދިނުމަށް ނިންމައިފިއެވެ. އައިއެމްއެފްގެ އަމާޒަކީ 2022 ވަނަ އަހަރު އަންނަންވާއިރަށް މުޅި ދުނިޔެއިން މަދުވެގެން 60 އިންސައްތަ އަދި ކޮންމެ ޤައުމަކުން މަދުވެގެން 40 އިންސައްތަ މީހުންނަށް ވެކްސިން ދިނުމެވެ.
މީގެ ސަބަބުން އިޤްޠިޞާދުތައް އަވަސްމުއްދަތެއްގައި ރަނގަޅުވެ 2025 އަންނަންވާއިރު ދުނިޔޭގެ އިޤްޠިޞާދަށް 9 ޓްރިލިއަން ޑޮލަރު އިތުރުވެގެންދާނެކަމަށް އައިއެމްއެފްގެ އޮފިޝަލުން ބުނެއެވެ.
50 ބިލިއަން ޑޮލަރުގެ މި ޕްލޭންގެ ތެރެއިން 35 ބިލިއަން ޑޮލަރަކީ މުއްސަނދި ޤައުމުތަކުން އެހީގެ ގޮތުގައި ހޯދަން ޕްލޭންކޮށްފައިވާ އަދަދެވެ. ސަރުކާރުތަކުގެ ރިސޯސަސް އާއި އެހެނިހެން ގޮތްގޮތުން ފަންޑު ހޯދައިގެން ބާކީ 15 ބިލިއަން ޑޮލަރު ހޯދުމަށް ޕްލޭން ކޮށްފައިވާ ކަމަށް މި ޕްރޮޕޯސަލް ތައްޔާރުކުރި މާހިރުން ވިދާޅުވެއެވެ. ޖީ20 ގެ ޤައުމުތަކުން މިހާރުވެސް ވަނީ އެހީގެ ގޮތުގައި ޤައުމުތަކުން 22 ބިލިއަން ޑޮލަރު ބޭނުންވާ ކަމަށް ކަމަށް ބުނެފައެވެ.
ޤައުމުތަކުން އަމިއްލަ ޤައުމުގެ އާބާދީއަށް ވެކްސިން ހޯދަން އެދުނުނަމަވެސް މިއަހަރު ހަދިޔާ ކުރެވޭނީ 1 ބިލިއަން ވެކްސިން ޑޯޒް ކަމުގައި އައިއެމްއެފްއިން ލަފާކުރެއެވެ. އަދި އަންނަ އަހަރު އިތުރު 1 ބިލިއަން ޑޯޒް އުފައްދަންޖެހޭނެކަމަށްވެސް ވަނީ ލަފާކޮށްފައެވެ.
މި ބަލިމަޑުކަމުގެ ސަބަބުން މުޅި ދުނިޔޭގެ އެކި ކަންކޮޅުތަކުން 3.5 މިލިއަން މީހުން ވަނީ މަރުވެފައެވެ. އަދި 2022 ވަނަ އަހަރާއި ކުރިމަތިލާއިރު ޞިއްޚީ ރަގަޅު ޙާލަތެއް ދުނިޔެއަކުނެތްކަމުގައިވެސް އައިއެމްއެފްއިން ބުނެއެވެ. އަދި ވެކްސިން ދިނުމަށް ބޮޑު އަހަންމިޔައްތުކަމެއް ނުދޭނަމަ ތަރައްޤީވަމުން އަންނަ ޤައުމުތަކުން ޖެހޭނީ އަންނަ އަހަރު ނިމެންދެން ނޫނީ އެއަށްވުރެވެސް ލަސްވަންދެން މި ބަލިމަޑުކަމުން އަރައިނުގެނެވި ތިބެން ކަމަށް އައިއެމްއެފްއިން ބުނެއެވެ.