ބަންގާޅު ކަނޑުގައި އުފެދިފައިވާ ތޫފާނުގެ ސީދާ އަސަރެއް ރާއްޖެއަށް ނުކުރާނެކަމަށާއި، އެހެންނަމަވެސް ކުރިއަށްއޮތް 2 ދުވަހުވެސް ރާއްޖޭގެ މޫސުން ގޯސްވާނެ ކަމަށް މޫސުމާބެހޭ ޤައުމީ އިދާރާއިން ވިދާޅުވެއްޖެއެވެ.
ބަންގާޅު ކަނޑުގައި އުފެދިފައިވާ ކޮޅިގަނޑުގެ ބާރުގަދަވެ، މިހާރު ވަނީ ތޫފާނަކަށް ބަދަލުވެފައެވެ. މި ތޫފާނަށް ދީފައިވާ ނަމަކީ "ޔަސް" އެވެ.
މޫސުމާބެހޭ ޤައުމީ އިދާރާއިން ވިދާޅުވީ، ބަންގާޅު ކަނޑުގައި އުފެދުނު ތޫފާން ދަތުރުކުރަމުންދަނީ އުތުރުހުޅަނގު އުތުރަށް ރާއްޖެއާއި ދުރަށްކަމަށާއި، ތޫފާނުގެ ސީދާ އަސަރެއް ރާއްޖެއަށް ނުކުރާނެކަމަށެވެ. އެހެންނަމަވެސް ހުޅަނގު މޫސުމުގެ ބާރުގަދަވުމާގުޅިގެން ރާއްޖޭގެ ސަރަޙައްދުގައި ކުރިއަށްއޮތް 2 ދުވަހުވެސް ވައިގަދަވެ، ކަނޑުތައް ގަދަވާނެކަމަށް ލަފާކުރެވޭކަމަށެވެ. އަދި އެކި ހިސާބަށް ވިއްސާރަކޮށް، ބައެއް ރަށްތަކަށް ބޯކޮށް ވާރޭވެހި، ގުގުރުންވެސް އެކަށީގެންވާ ކަމަށް މޫސުމާބެހޭ ޤައުމީ އިދާރާއިން ވިދާޅުވެއެވެ.
Update of Tropical Cyclone "Yaas" in Bay of Bengal pic.twitter.com/crLBdte4Qs
— Maldives Meteorology (@MetMaldives) May 24, 2021
މިއަދު މެންދުރުފަހު އުތުރާއި މެދުރާއްޖެތެރޭގެ އަތޮޅުތަކަށް ބޯކޮށް ވާރޭވެހުން އެކަށީގެންވާ ކަމަށް މޫސުމާބެހޭ ޤައުމީ އިދާރާއިން ވިދާޅުވެއެވެ. ދެކުނުގެ ބައެއް ރަށްތަކަށް ކެރީގެ އަސަރުފޯރާނެކަމަށާއި، އުތުރާއި މެދުރާއްޖެތެރޭގެ އަތޮޅުތަކަށް، ހުޅަނގުދެކުނާއި ހުޅަނގުން ގަޑިއަކު 15 މޭލާއި 25 މޭލާ ދެމެދުގެ ބާރުމިނުގައި ވައިޖެހޭނެކަމަށް އެ އިދާރާއިން ލަފާކުރެއެވެ. އަދި ދެކުނުގެ އަތޮޅުތަކަށް ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައި ޖެހޭނެކަމަށާއި ވިލާގަނޑުގައި ގާތްގަނޑަކަށް ގަޑިއަކު 45 މޭލާއި 50 މޭލާ ދެމެދުގެ ބާރުމިނަށް ވައިގަދަވުން އެކަށީގެންވާކަމަށްވެސް އެ އިދާރާއިން ވިދާޅުވެފައިވެއެވެ.
ހުޅަނގު މޫސުމުގެ ބާރުގަދަވުމާ ގުޅިގެން ވަކިން ޚާއްސަކޮށް ކަނޑުދަތުރުކުރައްވާ ފަރާތްތަކުން މޫސުމަށް ސަމާލުވުމަށް މޫސުމާބެހޭ ޤައުމީ އިދާރާއިން ވަނީ އިލްތިމާސްކުރައްވާފައެވެ. އަދި މޫސުން ގޯސްވާ ވަގުތުތަކުގައި އުދައެރުމާއި ރަށްރަށުގައި ފެންބޮޑުވުމާއި ކަނޑުމަތީގެ ޙާދިސާތައްވެސް އިތުރެވާތީ، ދުރާލައި ރައްކާތެރިކަމުގެ ފިޔަވަޅުތައް އެޅުމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީންނާއި ސިފައިންވެސް ވަނީ އިލްތިމާސްކުރައްވާފައެވެ.