ރާއްޖޭގައި ފޯރުކޮށްދޭ އިންޓަނެޓްގެ އަގުތަކަށް ސަރުކާރުން ހެޔޮ ބަދަލުތަކެއް ގެންނަވައި، އެކަން ސަރުކާރުން މިއަދު އިއުލާންކުރައްވައިފިއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ސަރުކާރުން އިންޓަނެޓްގެ އަގުހެޔޮކޮށްދެއްވާފައިވާއިރު ރާއްޖޭގެ އެކި ސަރަޙައްދުތަކަށް ދެވޭ އިންޓަނެޓުގެ ޚިދުމަތުގެ ފެންވަރު މަތިކޮށް އަދި އިންޓަނެޓްގެ އަގު އަތްފޯރާފަށަށް ތިރިކުރުމަކީ ސަރުކާރުގެ މުހިއްމު ވަޢުދެކެވެ.
ސަރުކާރުން އިންޓަނެޓްގެ އަގުތަކަށް ގެނައި ބަދަލުތައް މިއަދު އިއުލާންކުރެއްވިއިރު، ގޭގެއަށް ފޯރުކޮށްދޭ ރެސިޑެންޝަން ޕެކޭޖްތަކުގެ އަގު ވަނީ 28 އިންސައްތައާއި 30 އިންސައްތަ ކުޑަކޮށްފައެވެ. އަދި ގޭގެއަށް އިންޓަރނެޓް ދެވޭނެ އެންމެ ދަށް ސްޕީޑަކީ 2 އެމްބީޕީއެސްކަމަށްވެސް ސަރުކާރުން ވަނީ ކަނޑައަޅުއްވާފައެވެ.
ސަރުކާރުން އިއުލާންކުރެއްވި އައު ސިޔާސަތުގައިވާ ގޮތުން އެންމެ ކުދި ޕެކޭޖްތަކަށްވެސް ތްރޮޓްލް ސްޕީޑް 2 އެމްބީޕީއެސްގައި ލިބޭނެއެވެ. އަދި 300 ރުފިޔާއަށް ވުރެ މަތީގެ ޕެކޭޖްތަކަށް ތްރޮޓްލް ސްޕީޑް 5 އެމްބީޕީއެސްގައި ލިބޭނެއެވެ.
އިންޓަރނެޓްގެ އަގުތަކަށް/ ސްޕީޑަށް ސަރުކާރުން ކަނޑައެޅި ބަދަލުތައް. #NetuHeyo pic.twitter.com/EQPnkCT5iB
— Min. of Environment, Climate Change and Technology (@MoEnvmv) May 27, 2021
އަގަށް ގެނައި ބަދަލުތަކާއި އެކު ތިން ޕެކޭޖެއް ތައާރަފްކުރުމަށް ވަނީ ނިންމާފައެވެ.
އެގޮތުން ތައާރަފްކުރުމަށް ހަމަޖެހިފައިވާ 3 ޕެކޭޖުތަކަކީ،
-250 ރުފިޔާއަށް 5 އެމްބީޕީއެސް ސްޕީޑުގައި 30ޖީބީގެ ޑާޓާ ލިބޭ، ތްރޮޓަލް ސްޕީޑް 2 އެމްބީޕީއެސްގެ ޕެކޭޖަކާއި،
-500 ރުފިޔާއަށް 15 އެމްބީޕީއެސް ސްޕީޑުގައި 100ޖީބީގެ ޑާޓާ ލިބޭ، ތްރޮޓަލް ސްޕީޑް 5 އެމްބީޕީއެސްގެ ޕެކޭޖަކާއި،
-700 ރުފިޔާއަށް 25 އެމްބީޕީއެސް ސްޕީޑުގައި 200ޖީބީގެ ޑާޓާ ލިބޭ، ތްރޮޓަލް ސްޕީޑް 5 އެމްބީޕީއެސްގެ ޕެކޭޖެކެވެ.
މި ބަދަލުތަކުގެ ސަބަބުން ރެސިޑެންޝަލް އިންޓަރނެޓް ޚިދުމަތްތައް ބޭނުންކުރާ 60 އިންސައްތައާއި 75 އިންސައްތައާ ދެމެދުގެ މީހުންނަށް ސީދާކޮށް މަހުފީ އަގުހެޔޮ ވެގެންދާނެއެވެ.
ސަރުކާރުން ވިދާޅުވީ ގޭގެއަށްދޭ އިންޓަރނެޓް ނުވަތަ އިންޓަރނެޓް ފިކްސްޓް ބްރޯޑް ބޭންޑުގެ ޙިދުމަތުގެ އަގަށް ގެނައި ބަދަލަށް ޖުލައި މަހުގެ އެއްވަނަ ދުވަހުން ފެށިގެން އަމަލުކުރަން ފަށާނެއެވެ.
ރެސިޑެންޝަލް ޕެކޭޖްތަކުގެ އިތުރުން، މޯބައިލް ބްރޯޑްބޭންޑު ޙިދުމަތުންވެސް އަގު ހެޔޮކުރުމަށް ވަނީ ނިންމާފައެވެ. އަދި މޯބައިލް ޑޭޓާ އެލަވަންސް 20 އިންސައްތަައަށް ހެޔޮވެގެންދާނެކަމަށާއި، މިބަދަލުތަކަށް އަންނަ އޮކްޓޫބަރުމަހުން ފެށިގެން އަމަލުކުރަމުންދާނޭކަމަށްވެސް ސަރުކާރުން ވިދާޅުވެއެވެ.
އިންޓަނެޓްގެ އަގުހެޔޮކުރުން އިއުލާންކުރުމަށް ބޭއްވި ރަސްމިއްޔާތުގައި މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީ އައިމިނަތު ޝައުނާ ވިދާޅުވީ ގޭގެއަށް ދޭ ޚިދުމަތުގެ އަގަށް ފާހަގަކޮށްލެވޭ ބަދަލުތަކެއް އަންނާނެކަމަށެވެ. އަދި ގިނަ ބަޔަކާއި މިކަމަށް ގިނަ މަޝްވަރާތަކެއް ކުރިކަމަށް މިނިސްޓަރ ވިދާޅުވިއެވެ. އެގޮތުން އެންމެ ފާހަގަކުރެވުނު ކަމަކީ ބައެއް ފަރާތްތަކަށް އެންމެ ބޮޑު މައްސަލައަކަށްވީ އިންޓަރނެޓްގެ ސްޕީޑް ކަމަށާއި އަނެއް ބަޔަކަށް އެންމެ ބޮޑު މައްސަލައަަކަށްވީ އިންޓަރނެޓްގެ އަގުތަށް ކަމަށް މިނިސްޓަރ ވިދާޅުވިއެވެ.
"ސަރުކާރުގެ އަމާޒަކަށްވީ އަމާޒަކަށްވީ ޖުމްލަކޮށް އިންޓަރނެޓްގެ އަގަށް ހެޔޮ ބަދަލެއް ގެނައުން، އެގޮތުން ގޭގެއަށް ދޭ އިންޓަރނެޓްގެ އަގުތަކަށް ފާހަގަކޮށްލެވޭ ބަދަލެއް އަންނާނެ، ޑޭޓާ ހުސްވުމުން ތްރޮޓަލްވުމަށްވެސް ހެޔޮ ބަދަލެއްވެސް ލިބިގެންދާނެ،" މިނިސްޓަރ ޝައުނާ ވިދާޅުވިއެވެ.
އިންޓަރނެޓްގެ ސްޕީޑު ދަށްވެ، އިންޓަރނެޓްގެ އަގު ބޮޑުވުމަކީ ރައްޔިތުންގެ ބޮޑު ޝަކުވާއެކެވެ. އެހެންކަމުން ރައީސް އިބްރާހިމް މުހައްމަދު ޞާލިހުގެ ރިޔާސީ ވައުދުފުޅާއި އެއްގޮތަށް އިންޓަނެޓްގެ އަގު ހެޔޮކޮށްފައިވާއިރު، ސަރުކާރުގެ ސިޔާސަތަކީ ދުނިޔޭގައި މިސާލުޖަހާފަދަ "ސްމާޓް ނޭޝަން" އަކަށް ވުމަށް މިސްރާބު ޖަހަން ފެށުމެވެ. ޑިޖިޓަލް ރާއްޖެއަކަށް ކުރާ ދަތުރުގައި ސަރުކާރުގެ އަމާޒަކީ އިންޓަނެޓްގެ އަގު ހެޔޮކުރުމުގެ އިތުރުން، ޓެކްނޮލޮޖީގެ ދާއިރާއިން ތަޖުރިބާކާރުންނާ އެންމެ ފަހުގެ ވަޞީލަތްތަކުގެ އެހީގައި ޑިޖިޓަލް ގަވަރމަންޓް މާސްޓަރ ޕްލޭނެއް އެކުލަވާލުމަކީވެސް ރައީސް ޞާލިހުގެ ވަޢުދުފުޅެކެވެ.