131 ބިލިއަން ޕައުންޑުގެ މިލްކިއްޔާތަކާއެކު ފްރާންސްގެ ފެޝަން ވިޔަފާރިވެރިޔާ ބާރނާޑް އާރނޯލްޓް ދުނިޔޭގެ އެންމެ މުއްސަނދި މީހާކަމުގައި ވެއްޖެއެވެ.
ފްރާންސުގެ މަޝްހޫރު މަލްޓިނޭޝަނަލް ކޯޕަރޭޝަން ލުއިސް ވުއިޓަންގެ ވެރިޔާ 72 އަހަރުގެ ބާރނާޑްއަށް ހޯމަދުވަހު ކުޑަވަގުތުކޮޅަކުން އެކަނިވެސް 0.4 އިންސައްތައިގެ ފައިދާއެއް ވަނީ ލިބިފައެވެ.
އެމެރިކާގެ ވިޔަފާރި މަޖައްލާ ފޯބްސްގައި ވާގޮތުން ބާރނާޑްގެ އަމިއްލަ ސްޓޭކްގެ އަގު 424 މިލިއަން ޕައުންޑަށްވުރެ ބޮޑެވެ. އަދި ލުއިސް ވުއިޓަންގެ އަގު 226 ބިލިއަން ޕައުންޑަށް އަރައެވެ. މިއާއެކު 131.7 ބިލިއަން ޕައުންޑުގެ މިލްކިއްޔާތަކާއެކު ބާރނާޑް ވަނީ އެމެޒޯންގެ ވެރިޔާ ޖެފް ބެޒޯސް ފަހަތަށް ޖައްސާލާފައެވެ. ޖެފްގެ މިލިކިއްޔާތުގައި މިވަގުތު ހުރީ 131.4 ބިލިއަން ޕައުންޑެވެ. އަދި ކުންފުނީގެ ޙިއްޞާގެ އަގު ވެއްޓުވުމުގެ ސަބަބުން އިލެކްޓްރިކް ވެހިކަލް އުފައްދާ ޓެސްލާގެ ވެރިޔާ އެލޮން މަސްކް ވަނީ 104.1 ބިލިއަން ޕައުންޑާއެކު 3 ވަނައަށް ވެއްޓިފައެވެ.
ތިން ވިޔަފާރިވެރިންވެސް ބަރޯސާވެފައިވަނީ އެމީހުންގެ މިލްކިއްޔާތުގައި ހުރި ޙިއްޞާގެ ޢަދަދަށްކަމުން ޙިއްޞާގެ ބާޒާރުގައި ޙިއްޞާގެ އަގަށް އަންނަ ކޮންމެ ބަދަލެއް އެމީހުންގެ މިލްކިއްޔާތުން ފެންނާނެއެވެ.
މުއްސަނދި ބްރޭންޑްތައް ކަމަށްވާ ފެންޑީ، ކްރިސްޓިއަން ޑިއޯ އަދި ގިވެންޗީ ވެސް ހިންގާ ލުއިސް ވުއިޓަންއިން ވަނީ މިދިޔަ 14 މަސްދުވަހުގެ ތެރޭގައި 77.7 މިލިއަން ޕައުންޑަށްވުރެ ގިނަ ފައިދާ ބާރނާޑްއަށް ހޯދާދީފައެވެ. މީގެ އިތުރުން ބާރނާޑް ވަނީ ގަހަނާގެ ވިޔަފާރީގައި މަޝްހޫރު އެމެރިކާގެ ޓިފެނީ އެންޑް ކޯ 11.2 މިލިއަން ޕައުންޑަށް ޖެނުއަރީމަހު ގަނެފައެވެ.
ކޯވިޑްގެ ބަލިމަޑުކަމުން މާބޮޑު އަސަރެއްނުކޮށް މިދިޔަ އަހަރު މާރިޗްމަހު ބާރނާޑްގެ މިލްކިއްޔާތު ވަނީ 53.7 ބިލިއަން ޕައުންޑަށް އަރާފައެވެ.