ވިޔަފާރިތަކުން ނެގޭ ޓެކްސްގެ އެންމެ މަދުމިންވަރަށް ޖީ7ގެ ޤައުމުތަކުން އެއްބަސްވެއްޖެ
ދުނިޔޭގެ އެކި ކަންކޮޅުތަކުގައި ވިޔަފާރިކުރާ މަލްޓިނޭޝަނަލް ވިޔަފާރިތަކުން ނެގޭ ޓެކްސްގެ އެންމެ މަދުމިންވަރު ކަމަށްވާ 15 އިންސައްތައިގެ ޓެކްސްއަށް އެއްބަސްވާކަމަށް ދުނިޔޭގެ އެންމެ މުއްސަނދި 7 ޤައުމުގެ މާލީ ވަޒީރުންގެ ބައްދަލުވުމުން ނިންމައިފިއެވެ.
ޖީ ސެވަންގެ ޤައުމުތަކުން މިކަމަށް އެއްބަސްވެފައިވަނީ އިނގިރޭސިވިލާތުގެ ލަންޑަންގައި ހޮނިހިރުދުވަހު ބޭއްވި ޖީ ސެވަންގެ މާލީ ވަޒީރުންގެ ބައްދަލުވުމަކަށްފަހުއެވެ.
ލަންޑަންގައި ބޭއްވި ޖީ ސެވަންގެ ބައްދަލުވުމަކީ ކޯވިޑްގެ ފެތުރެން ފެށި ފަހުން ޖީ ސެވަންގެ މާލީ ވަޒީރުން އެތަނަކަށް ހާޒިރުވެ ބޭއްވި ފުރަތަމަ ބައްދަލުވުމެވެ. މިބައްދަލުވުމުގައި ކެނެޑާ، ފްރާންސް، ޖަރުމަންވިލާތް، އިޓަލީ، ޖަޕާން، އިނގިރޭސިވިލާތް އަދި އެމެރިކާގެ މާލީ ވަޒީރުން ބައިވެރިވެވަޑައިގަތެވެ.
މިބައްދަލުވުމުގައި ޤައުމުތަކުން ވަނީ ފޭސްބުކް، އެމޭޒަންފަދަ މަލްޓިނޭޝަނަލް ކުންފުނިތަކުން މަދުވެގެން 15 އިންސައްތައިގެ ޓެކްސްއެއް ނެގުމަށް އެއްބަސްވެފައެވެ. އަދި ކުންފުނިތަކުގެ އޮފީސްތައް ހުންނަ ޤައުމުތަކަށް އެކަނި ޓެކްސް ދެއްކުމުގެ ބަދަލުގައި، އާމްދަނީ ލިބޭ ހުރިހާ ޤައުމަކަށް ޓެކްސް ދައްކަންޖެހޭނެކަމަށްވެސް ޖީ ސެވަންގެ ޤައުމުތަކުން ވަނީ ނިންމާފައެވެ.
މި ނިންމުމަށް ދުނިޔޭގެ ބޮޑެތި އިޤްތިޞާދުތަކުންވެސް ވަނީ ތާޢީދުކޮށްފައެވެ. އެގޮތުން މިއީ ތާރީހީ ނިންމުމެއްކަމަށާއި، މިކަމުގެ ސަަބަބުން ޓެކްސް ދެއްކުމުން ސަލާމަތްވާން ހުރި ދޮރުތައް ބަންދުވެގެންދާނެކަމަށް ޤަބޫލުކުރާކަމަށް ތަޖުރިބާކާރުން ބުނެއެވެ.
ޚަބަރުތައް ބުނާގޮތުން ލަންޑަންގައި ނިންމި ނިންމުމަށްވުރެ ފުޅާ އެއްބަސްވުމެއް އަންނަ މަހު އިޓަލީގެ ވެނިސްގައި ބާއްވަން ހަމަޖެހިފައިވާ ޖީ20 ގެ ޤައުމުތަކުގެ ބައްދަލުވުމުގައި ނިންމާނެއެވެ.