މަސްތުގެ ޙާލަތުގައި މާލޭ ވިޔަފާރިވެރިންގެ މިސްކިތުގައި ހުރި މީހަކު ފުލުހުން ހައްޔަރުކޮށްފިއެވެ.
ފުލުހުން ވިދާޅުވީ، ވިޔަފާރިވެރިންގެ މިސްކިތް ތެރޭގައި މަސްތުގެ ޙާލަތުގައި ހުރިކަމަށް ތުޙުމަތުކުރެވޭ މީހަކު ރޭ ދަންވަރު 1:35 ހާއިރު ފުލުހުންގެ ބެލުމުގެ ދަށަށް ގެނެސްފައިވާކަމަށެވެ. މި މައްސަލައިގައި ފުލުހުން ހައްޔަރުކޮށްފައިވަނީ 34 އަހަރުގެ ފިރިހެނެކެވެ. މި މައްސަލަ އިތުރަށް ތަޙްޤީޤުކުރަމުންދާކަމަށްވެސް ފުލުހުން ވަނީ ވިދާޅުވެފައެވެ.
މަސްތުވާތަކެތި ބޭނުން ކުރުމުގެ ކުށުގެ ރިކޯޑް އޮންނަ ކުށުގެ ވެށީގައި އުޅޭ މީހުންގެ ތެރެއިން ބޭނުމެއް ނެތި މިސްކިތްތަކަށް ވަދެ އަދި މަސްތުގެ ހާލަތުގައި ތިބި ކަމަށް ތުހުމަތުކުރެވޭ 15 މީހަކު މިމަހުގެ 13 ވަނަ ދުވަހުގެ ރޭވެސް ފުލުހުން ވަނީ ހައްޔަރުކޮށްފައެވެ. މި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 7 މީހަކު ރިމާންޑް ސެންޓަރުގައި 15 ދުވަހަށް ބަންދުކުރުމަށް ކޯޓުން ވަނީ އަމުރުކޮށްފައެވެ. އަދި ބާކީ ތިބި 8 މީހުން ކަސްޓޯޑިއަލް ޖަލެއްގައި 3 ދުވަހަށް ބަންދުކުރުމަށް ކޯޓުން އަމުރުކޮށްފައިވެއެވެ.
މަސްތުގެ ހާލަތުގައި މިސްކިތްތަކުގައި ތިބި ބަޔަކު ހައްޔަރުކޮށްފައިވާއިރު ފަހަކަށް އައިސް މާލޭގެ މިސްކިތްތަކުގައި ނިދުމާއި އެއްޗެތި ދޮވުމުމާއި، މަސްތުވާތަކެތި ބޭނުންކުރުން ފަދަ މިސްކިތުގެ ޙުރުމަތްކެނޑޭ ކަންކަން ބައެއް މީހުން ކުރާކަމުގެ މައްސަލަތަކެއް ވަނީ ފެންމަތިވެފައެވެ.
ފުލުހުން ވިދާޅުވީ މިސްކިތްތަކުގައި މަސްތުވާތަކެތި ބޭނުންކުރުމާއި ނިދައި އެއްޗެހި ދޮވެ، މިސްކިތްތަކުގެ ބޭނުން ކުުރުން އެކަށޭނަ ނޫން އެހެން ބޭނުންތަކުގައި މިސްކިތްތައް ބޭނުންކުރާކަމުގެ ޝަކުވާ ފުލުހުންނަށް ތަކުރާރުކޮށް ލިބެމުންދާކަމަށެވެ. އަދި އެކަމާ ގުޅިގެން ފުލުހުން ކޮންމެ ރެއަކު މިސްކިތްތައް ބަލާ އެގޮތަށް ބޭނުން ކުރާ ފަރާތްތައް ފޮނުވާލުމުގެ މަސައްކަތް ކުރަމުން އަންނަކަމަށް ފުލުހުން ވިދާޅުވެއެވެ. މީގެ އިތުރުން އެފަދަ މީހުން ފުލުހުންގެ ބެލުމުގެ ދަށަށް ގެނެސް، މައްސަލަތައް ތަހުޤީޤްކުރަމުންދާކަމަށްވެސް ފުލުހުން ވިދާޅުވެއެވެ.
ފުލުހުން ވިދާޅުވީ، މިފަދަ މައްސަލަތައް ހައްލުކުރުމަށްޓަކައި ކަމާއި ގުޅުން ހުރި އެހެނިހެން އިދާރާތަކާއެކުވެސް މިމައްސަލަތައް ހިއްސާކޮށް ހައްލު ހޯދުމަށް އެޅެންހުރި ފިޔަވަޅުތައް އަޅަމުން ގެންދާކަމަށެވެ.