"ހިޔާ އެގްރީމެންޓުގައި ސޮއިކުރާ ދުވަހު ތަޅުދަނޑި ހަވާލުކުރާނެ، ސޮއިކުރުން އޮންނާނީ ހުރަވީ ސްކޫލުގައި"

ހިޔާ ފްލެޓްތަކުގެ އެގްރީމެންޓްތަކުގައި ސޮއިކުރާ ދުވަހު ފްލެޓްތަކުގެ ވެރި ފަރާތަށް ތަޅުދަނޑި ޙަވާލުކުރާނެކަމަށް ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީގެ މެނޭޖިންގ ޑިރެކްޓަރ ސުޙައިލް އަޙްމަދު ވިދާޅުވެއްޖެއެވެ. ހިޔާ މަޝްރޫޢުގެ ދަށުން ފްލެޓް ލިބުނު ފަރާތްތަކާއެކު އެގްރީމެންޓްތަކުގައި ސޮއިކުރުން އަންނަމަހުގެ 14 ވަނަ ދުވަހު ފެށުމަށް ވަނީ ހަމަޖެހިފައެވެ.

ހިޔާ މަޝްރޫޢުގެ ދަށުން މިވަގުތު ކުރަމުންދާ މަސައްކަތްތަކާގުޅޭގޮތުން ޕީ.އެސް.އެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަދައްކަވަމުން އެޗް.ޑީ.ސީގެ މެނޭޖިންގ ޑިރެކްޓަރ ސުޙައިލް އަޙްމަދު ވިދާޅުވީ، ހިޔާ ފްލެޓްތައް ލިބުނު ފަރާތްތަކުގެ ތެރެއިން ހައުސިންގ މިނިސްޓްރީން އެ ކޯރޕަރޭޝަނަށް މިހާތަނަށް ހިއްސާކޮށްފައިވާ ލިސްޓުތަކުގައި ހިމެނޭ އެންމެންގެ ގުރުއަތުނަގެން ނިމިފައިވާކަމަށެވެ.

އެހެންނަމަވެސް ބައެއް ފަރާތްތަކާގުޅޭގޮތުން މިނިސްޓްރީން އިތުރަށް ބަލަންޖެހޭ ކަންކަން ބަލަމުންދާތީ، ގުރުއަތުނެގުން އަދި އެއްކޮށް ނުނިމޭކަމަށާއި، ނަމަވެސް ނުނިމިހުރީ ނިސްބަތުން ވަރަށް މަދު ފަރާތެއްގެ ގުރުއަތުނެގުންކަން އޭނާ ފާހަގަކުރެއްވިއެވެ. ސުޙައިލް ވިދާޅުވީ، ކޮންޓްރެކްޓަަރުގެ ފަރާތުން ހިޔާ ފްލެޓްތަކުގައި ކުރަންޖެހޭ ހުރިހާ މަސައްކަތެއް ކޮށް ނިންމާ، 6720 އެޕާޓްމަންޓުގެ ތަޅުދަނޑިތައް އެކޯރޕަރޭޝަނާއި މިހާރު ޙަވާލުކޮށްފައިިވާކަމަށެވެ. އަދި އެޗް.ޑީ.ސީގެ ފަރާތުން އެތަންތަން އިންސްޕެކްޓްކޮށް ރަނގަޅުކުރަންޖެހޭ ކަންކަން ބަލާ އެކަންކަން ކޮންޓްރެކްޓަރ ލައްވާ ކުރުވާފައިވާކަމަށެވެ.

ހިޔާ ފްލެޓްތައް ލިބުނު ފަރާތްތަކާއެކު އެގްރީމެންޓްތަކުގައި ސޮއިކުރުން ޖުލައި 14 ގައި ފެށުމަށް ވަނީ ނިންމާފައެވެ. ސުޙައިލް ވިދާޅުވީ، އެގްރީމެންޓްތަކުގައި ސޮއިކުރުން ކުރިއަށްގެންދިއުމަށް ހަމަޖެހިފައިވަނީ ހުރަވީ ސްކޫލުގެ ހޯލުގައިކަމަށެވެ. މި މަޝްރޫޢުގެ ދަށުން 16 ޓަވަރެއް ހުޅުމާލޭ ދެވަނަ ފިޔަވަހީގައި ތަރައްޤީކޮށްފައިވާއިރު، އެގްރީމެންޓްތަކުގައި ސޮއިކުރުން ކުރިއަށްދާނީ ޓަވަރުތަކުގެ ތަރުތީބުންކަމަށާއި، އެގްރީމެންޓްތަކުގައި ސޮއިކުރުމުގެ ކުރިން ފްލެޓްތަކުގެ ވެރިފަރާތައް ގަޑިއާއި ދުވަސް ކުރިއާލާ އެޗް.ޑީ.ސީގެ ފަރާތުން އަންގަމުންދާނެކަމަށްވެސް ސުޙެއިލް ވިދާޅުވިއެވެ.

"އަޅުގަނޑުމެން ރާވާފައިވަނީ ހުރަވީ ސްކޫލުގެ ހޯލު މިކަން ކުރުމަށް ބޭނުންކުރާގޮތަށް. އެތަނުގައި 25 މޭޒު ޖަހަައިގެން އެއްފަހަރާ 25 ބޭފުޅުންނަށް ސޮއިކުރުމުގެ ކަންތައްތައް ކުރިއަށްގެންދެވޭގޮތަށް. މި ޕްރޮސެސްއަށް އަޅުގަނޑުމެން މި ބަލަނީ 25 މޭޒު ބަހައްޓައިގެން ދުވާލަކު 300 އާއި 350 އާއި ދެމެދުގެ ބޭފުޅުންނަށް ފްލެޓް ޙަވާލުކުރެވޭނެކަމަށް މި ބަލަނީ. އިތުރަށް ދެން ބަދަލެއް ގެންނަން އެނގޭނީ މިކަން ފަށައިގަތީމަ. ފަހަރެއްގައި މިއަށްވުރެ މަދުވެސް ވެދާނެ. ނޫނީ އަވަހަށް ނިމޭނަމަ ޢަދަދު ގިނަވެސް ކުރެވިދާނެ" ސުޙައިލް ވިދާޅުވިއެވެ.

ސުޙައިލް ވިދާޅުވީ، ހިޔާ ފްލެޓްތައް ލިބުނު ފަރާތްތަކަށް، އެ ފަރާތެއްގެ އެޕާޓްމަންޓް ދައްކާލުމުގެ ޕްރޮގްރާމެއް އަންނަ ހޮނިހިރު ދުވަހުން ފެށުމަށް ރާވާފައިވާކަމަށެވެ. އަދި އެގްރީމެންޓުގައި ސޮއިކުރާ ދުވަހުވެސް އެޕާޓްމަންޓްތަކުގެ ވެރިފަރާތަށް އެޗް.ޑީ.ސީގެ އޮފިޝަލަކާއެކު އެތަންތަން ބަލާލުމުގެ ފުރުޞަތު ފަހިކޮށްދޭނެކަމަށާއި، ބެލުމަށްފަހު އިތުރަށް ކަމެއް ރަނގަޅުކުރަން ޖެހޭކަން ފާހަގަކުރެވޭނަމަ، އެކަމަށް ޚާއްސަ ފޯމެއް ފުރުމުން އެކަންކަމަށް އެޓެންޑްވާނެކަމަށް ސުޙައިލް ވިދާޅުވިއެވެ. ފްލެޓްތައް ބަލަންދާއިރު، މިން ނަގަން ބޭނުންވާނަމަ އަމިއްލަ ފޫޓުފީތާއެއް ހިފައިގެންދިއުމަށްވެސް ސުޙައިލް ވަނީ އެދިވަޑައިގެންފައެވެ.

ހިޔާ ފްލެޓްތަކަށް ކަރަންޓް ފޯރުކޮށްދިނުމުގެ ކަންކަން އަދި މުޅިން ނުނިމޭތީ، ސީދާ ތަޅުދަނޑި ޙަވާލުކުރާ ދުވަހު ފްލެޓްތަކަށް ބަދަލުނުވެވިދާނެކަމަށް ސުޙައިލް ވަނީ ވިދާޅުވެފައެވެ. އެހެންނަމަވެސް މަސައްކަތްކުރަމުންދަނީ ކަރަންޓު ގުޅުމުގެ ކަންކަންވެސް އެގްރީމެންޓްތަކުގައި ސޮއިކުރަންވާއިރަށް ނިންމުމަށްކަމަށް ސުޙައިލް ވިދާޅުވިއެވެ.

"ކަރަންޓުގެ ކަންކަން ނުނިމިދާނެތީ އަޅުގަނޑުމެން މިބަލަނީ ތަޅުދަނޑި ޙަވާލުކުރިކަމުގައިވިޔަސް އެބޭފުޅުންނަށް އެ އޮންނަ މުއްދަތު ގުނަން ފަށާނީ ކަރަންޓު ލިބޫނީމައޭ އިނގޭތޯ. އެހެންވީމަ ކަރަންޓު ލިބެންދެން މަޑުނުކޮށް އަވަސްކުރުމުގެ ގޮތުން މިހެން މިހަދަނީ. އެހެންވީމަ އެހާތަނަށް ކަރަންޓު ނުލިބޭކަމަށްވާނަމަ އަޅުގަނޑުމެން ކުއްޔަކާނުލާ މި އިންނަ މުއްދަތު ގުނާނީ ކަރަންޓް ލިބުނީމަ. އެކަމު ވަރަށް ބޮޑަށް މަސައްކަތް ކުރަމުން އެބަދަން އެހާތަނަށްވެސް ކަރަންޓުގެ ކަންކަން ނިންމޭތޯ" ސުޙައިލް ވިދާޅުވިއެވެ.

ހިޔާ ފްލެޓްތަކުގެ އެގްރީމެންޓުގައި ސޮއިކުރާ ދުވަހު، އެއްވެސް ސަބަބަކާ ހެދި ސީދާ ފްލެޓް ލިބުނު ފަރާތަަށް ޙާޞިރުނުވެވޭނަމަ، ބަދަލުގައި މީހަކު ފޮނުވުމުގައި އަމަލުކުރާނެ އުޞޫލު އެޗް.ޑީ.ސީގެ ފަރާތުން ވަރަށް އަވަހަށް އާއްމުކުރައްވާނެކަމަށް ސުޙެއިލް ވަނީ ވިދާޅުވެފައެވެ. ހިޔާ ފްލެޓްތަކުގައި ސޮއިކުރުން ޖުލައި 14 ގައި ފެށުމަށް ނިންމާފައިވާއިރު، އެ ތާރީޚުން ފެށިގެން 30 ދުވަހުގެ މި މަސައްކަތް އެއްކޮށް ނިންމުމަށް ސަރުކާރުން ވަނީ އަމާޒު ހިފާފައެވެ.