ހުޅުމާލޭގައި ތަރައްޤީކުރަން ފަށާފައިވާ ވޯޓަރ ތީމް ޕާކުގެ މަސައްކަތް އަވަސްކުރުމަށް އެތަން ތަރައްޤީކުރާ ފަރާތާއެކު މަސައްކަތްކުރަމުންދާކަމަށް ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީގެ މެނޭޖިންގ ޑިރެކްޓަރ ސުޙެއިލް އަޙްމަަދު ވިދާޅުވެއްޖެއެވެ.
މި ވޯޓަރ ތީމް ޕާކަކީ އެއްގަމާއި މޫދުގައި ފެނުގެ ގިނަ ކުޅިވަރުތައް ކުޅެވޭގޮތަށް ރާއްޖޭގައި ތަރައްޤީކުރާ މިފަދަ ފުރަތަމަ ޕާކެވެ. ހުޅުމާލޭ ނިރޮޅުމަގުގައި ހުންނަ ޔޫތު ޕާކާއި ޖެހިގެން ހަދަމުންދާ މި ވޯޓަރ ތީމް ޕާކުގެ މަސައްކަތް އެޗް.ޑީ.ސީން ކުރަމުންދަނީ މެލޭޝިއާގެ ކުންފުންޏެއްކަމަށްވާ މިރި ހައުސިންގ ޑިވެލޮޕްމަންޓާއި ޙަވާލުކޮށްގެންނެވެ.
2017 ވަނަ އަހަރު ފެށި މި މަޝްރޫޢަކީ ގާތްގަނޑަކަށް 35 މިލިއަން ޑޮލަރު (385.5 މިލިއަން ރުފިޔާ) ޚަރަދުކޮށްގެން ކުރިއަށްގެންދާ މަޝްރޫޢެކެވެ. މި މަޝްރޫޢުގެ ޢަމަލީ މަސައްކަތް ފެށިނަމަވެސް، އެންމެ އެދެވޭގޮތެއްގައި މަސައްކަތް ކުރިއަށްދާތަނެއް ނުފެނެއެވެ. މަޝްރޫޢުގެ ޢަމަލީ މަސައްކަތް ނިމޭނެކަމަށް އެޗް.ޑީ.ސީން އެންމެ ފަހުން ލަފާކޮށްފައިވަނީ މިއަހަރުގެ މެދުތެރޭގައިކަމަށެވެ. އެހެންނަމަވެސް މިހާތަނަށްއައިއިރު ވޯޓަރ ތީމް ޕާކުގެ ބައެއް އިމާރާތްތަކަށް ބޭނުންވާ ސްޓްރަކްޗަރ ހެދުމުގެ އިތުރުން، މާބޮޑު ޢަމަލީ މަސައްކަތެއް މިހާތަނަށް ކޮށްފައެއްނުވެއެވެ.
މި މަސައްކަތް ނުނިމި ދިގުލައިގެންދާތީ، އެކަމާއި ގުޅޭގޮތުން ޕީ.އެސް.އެމް ނިއުސްގެ ރާއްޖެ މިއަދު ޕްރޮގްރާމުގައި ސުވާލުކުރުމުން، އެޗް.ޑީ.ސީގެ މެނޭޖިންގ ޑިރެކްޓަރ ސުޙައިލް އަޙްމަދު ވިދާޅުވީ، މިއީ ހުޅުމާލޭގައި ދިރިއުޅޭ އަދި ހުޅުމާލެއަށް ޒިޔާރަތްކުރާ އާއްމުންވެސް ވަރަށް އިންތިޒާރުކުރަމުންދާ މަޝްރޫޢެއްކަމުން، މަސައްކަތް ނުނިމި ދިގުލައިގެންދާތީ، އެ ކޯރޕަރޭޝަނުންވެސް ނުހަނު ކަންބޮޑުވާކަމަށެވެ. އެގޮތުން ކޯވިޑް-19ގެ ޙާލަތު ޖެހުމުގެ ކުރިންވެސް މަޝްރޫޢުގެ މާބޮޑު ޕްރޮގްރެސްއެއް ފެނިގެންގޮސްފައިނުވާއިރު، ކޯވިޑްގެ ޙާލަތާއެކު މުޅި މަޝްރޫޢު އެއްކޮށްކަހަލަ ގޮތަކަށް ހުއްޓިފައިވާކަން ސުޙައިލް ފާހަގަކުރެއްވިއެވެ.
ސުޙައިލް ވިދާޅުވީ، މި މަޝްރޫޢުގެ މަސައްކަތް އަވަސްކުރުމަށް ޑިވެލޮޕަރާއެކު އެޗް.ޑީ.ސީން ވާހަކަދައްކަމުންދާކަމަށެވެ. އަދި މަޝްރޫޢު ނިންމޭނެ ތާރީޚެއް އެނގޭނެހެން ޝެޑިއުލެއް އެޗް.ޑީ.ސީއާއި ހިއްސާކުރުމަށްވެސް އެދިފައިވާކަމަށް އޭނާ ވިދާޅުވިއެވެ. ސުޙެއިލް ވިދާޅުވީ، މިކަމުގައި ދެން އިތުރަށްކުރިއަށްދާނެ ގޮތަކާމެދު ވަރަށް އަވަހަށް އެޗް.ޑީ.ސީން ގޮތެއް ނިންމަވާނެކަމަށެވެ.
"އަޅުގަނޑުމެންނާއި ޑިވެލޮޕަރއާއި ދެމެދުގައި މިހާރުވެސް މުޢާމަލާތްތަކެއް ކުރެވެމުންއެބަދޭ. އަޅުގަނޑުމެންނަށް މިހާރު އެބޭފުޅުންނަށް ނިންމޭނެ މުއްދަތު އެނގޭނެހެން ޝެޑިއުލެއް ހިއްސާކުރުމަށް އެންގިފައިވާނެ. ދެން އެއަށްބަލާފައި އަޅުގަނޑުމެން އިތުރަށް މިކަމުގައި ކުރިއަށްދާނެގޮތެއް ނިންމަން އެބަޖެހޭ. އަޅުގަނޑުމެންވެސް މިހާރު ކަންބޮޑުވާ ހިސާބެއްގައި ޕްރޮގްރެސް އޮތީ. ހަޤީޤަތުގައި ހުޅުމާލޭގައި މިހާ ގިނަ މީހުން ލުކްފޯވަޑްކުރާކަމެއް އަޅުގަނޑުމެން ހަމަ ވަރަށް ކައިރިން އެބަ ބަލަން. އެކަން މިހާރު މިއޮތްގޮތުން ޕްރޮޖެކްޓް ކުރިއަށްގެންދެވިދާނެ ގޮތަކާމެދު ވަރަށް އަވަހަށް ގޮތެއް ނިންމާނަން" ސުޙެއިލް ވިދާޅުވިއެވެ.
އެކި އުމުރުފުރާގެ މީހުންނަށް މޫދު ކުޅިވަރުތައް ކުރެވޭނެހެން ޑިޒައިންކޮށްގެން ތަރައްޤީކުރާ މި ވޯޓަރ ތީމް ޕާކު ހަދަމުންދަނީ 50 ކޮޓަރީގެ ހޮޓަލަކާވެސް އެކުގައެވެ. އެގޮތުން މިތަނުގައި ސްޕައިރަލް ސްލައިޑްސް، ސްޕީޑް ސްލައިޑްސް އަދި ފެމެލީ ސްލައިޑްސްތަކުގެ އިތުރުން ކުޑަކުދިންގެ ޕޫލަކާއި، ބަމްޕަރ ބޯޓްސް އަދި ވޯޓަރ ހައުސްތަކެއް ޤާއިމުކުރެވިގެންދާނެއެވެ. މީގެ އިތުރުން ވޯޓަރ ރޯލާރސް، ވޯޓަރ ގައިރޯ، އަކުއަރ ލޫޕްސް، ފައުންޓެއިން ސްކޮޔަރ އަދި ކޯރެއްވެސް ހެދިގެންދާނެއެވެ.
ޕާކު ނިމިގެންދާއިރު އެތަނުގައި ފާޚާނާއިކުރުމާއި، ހެދުން ބަދަލުކުރެވޭނެ އިންތިޒާމް ޤާއިމުކުރެވިގެންދާނެކަމަށާއި، ކޮމާޝަލް ބޭނުންތަކަށް އެކިކަހަލަ ފުޑް އައުޓްލެސްޓްތައްވެސް ތަރައްޤީކުރެވިގެންދާނެކަމަށް އެޗް.ޑީ.ސީން ވަނީ ވިދާޅުވެފައެވެ.
ހުޅުމާލޭގައި ރެކްރިއޭޝަނަލް ކަންކަމަށް ތަފާތު ވަޞީލަތްތައް ޤާއިމުކުރަމުންދާއިރު، މި ވޯޓަރ ތީމް ޕާކަކީވެސް އާއިލާއާއެކު އުފާވެރި ވަގުތުތަކެއް ހޭދަކޮށްލާ، މުޅިން ތަފާތު ތަޖުރިބާއެއް ދިވެހިންނަށް ކޮށްލުމުގެ ފުރުޞަތު ލިބިގެންދާނެ ޕާކެއްކަމަށް އެޗް.ޑީ.ސީން ވިދާޅުވެފައިވެއެވެ.