ކާބޯތަކެތި ފޯރުކޮށްދިނުމުގައި ކުރިމަތިވެފައިވާ ދަތިތަކާއެކު ދުނިޔޭގެ އެކި ކަންކޮޅުތަކުގައި ކާބޯތަކެތީގެ އަގު އުފުލެމުންދާކަމަށް އިންޓަރނޭޝަނަލް މަނިޓަރީ ފަންޑު (އައިއެމްއެފް) އިން ބުނެފިއެވެ.
އައިއެމްއެފްގެ މާހިރުން ލަފާކުރާ ގޮތުގައި މިދިޔަ އަހަރާއި އަޅާބަލާއިރު މިއަހަރު ކާބޯތަކެތީގެ އަގު 25 އިންސައްތައަށް އުފުލިގެންދާނެއެވެ. އަދި އަގުތައް އުފުލިގެން ދިއުމުގެ ސަބަބުން ބައެއް ސަރަޙައްދުތަކުގައި ކާބޯތަކެތީގެ އިތުރުން ޤައުމުތަކުން ޢާންމުކޮށް ބޭނުންކުރާ ތަކެތީގެ އަގުތަކަށްވެސް ވަނީ އަސަރުކޮށްފައިކަމަށް މާހިރުން ވިދާޅުވެއެވެ.
ކޯވިޑްގެ ބަލިމަޑުކަމުގެ ކުރިންވެސް 2018 ވަނަ އަހަރު ޗައިނާގެ އޫރުތަކަށް އެފްރިކަން ސްވައިންފުލޫ ޖެހި ގިނަ ޢަދަދެއްގެ އޫރު މަރުވުމާއި ގުޅިގެން ދުނިޔޭގެ ކާބޯތަކެތީގެ އަގު ދިޔައީ އުފުލެމުންނެވެ. މިއާއެކު ޗައިނާގައި އޫރު މަހާއި އަދި ދުނިޔޭގެ އެކި ސަރަޙައްދުތަކުގައި އެހެނިހެން އެއްގަމު މަހުގެ އަގު އުފުލުނެވެ. މިކަމުގެ މައިގަނޑު ސަބަބަކަށްވީ އެމެރިކާއިން އެތެރެކުރާ އޫރުމަހާއި ސޯއީބީންސްއިން ޓެކްސް ނަގަން ފެށުމާއެކު އެމެރިކާ އަދި ޗައިނާގެ ވިޔަފާރީގެ ގުޅުމުށް ބުރޫ އެރުންކަމަށް ތަޖުރިބާކާރުން ވިދާޅުވެއެވެ.
މީގެއިތުރުން ކޯވިޑާއި ގުޅިގެން ރެސްޓޯރަންޓް ކެފޭތަކުން ކެއުން މަދުވެ، ގޭގައި ކެއްކުން އިތުރުވުމުގެ ސަބަބުން ތަރުކާރީއާއި އެނޫންވެސް ކޮންމެ ދުވަހަކު ބޭނުންކުރާ ތަކެތީގެ އަގުތައް ގިނަ ޤައުމުތަކުގައި އުފުލުނުކަމަށް ޚަބަރުތައް ބުނެއެވެ.
މީގެއިތުރުން ޓްރަކް ޑްރައިވަރުން މަދުވުމުން އެއްޤަމު ދަތުރުތަކަށް ބުރޫއަރައި، ކަނޑުމަގުން ގެންނަ މުދަލަށް ނަގާ އަގުވެސް ވޭތުވެދިޔަ 12 މަސްދުވަހު އެތައް ފަހަރަކު އުފުލިގެންދިއުމަކީވެސް ކާބޯތަކެތީގެ އަގުބޮޑުވާން މެދުވެރިވި ސަބަބެއް ކަމަށް އައިއެމްއެފްގެ އިޤްޠިޞާދީ މާހިރުން ވިދާޅުވެއެވެ.
ކުރިއަރަމުން އަންނަ ޤައުމުތަކަށާއި ތަރައްޤީވަމުން އަންނަ ޤައުމުތަކަށް މިހާރު އޮތް އެންމެ ބޮޑު ގޮންޖެހުމަކީ އެމެރިކާ ޑޮލަރާއި އަޅާބަލާއިރު ޤައުމުތަކުގެ ފައިސާގެ އަގު ދަށްވުމެވެ. އޭގެ ސަބަބުން އެމެރިކާ ޑޮލަރުން ހިންގާ މުޢާމަލާތްތަކުން އެތެރެކުރާ މުދަލުގެ އަގު އުފުލިގެންދާނެކަމަށް އައިއެމްއެފްއިން ބުނެއެވެ.