ރާއްޖޭގެ ކަނޑުގެ ސަރަޙައްދުގައި ޤަވާއިދާ ޚިލާފަށް މަސްވެރިކަން ކުރި ބޯޓެއްގެ ވެރިފަރާތް 400،000 ރުފިޔާއިން ޖޫރިމަނާކޮށްފިއެވެ.
މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ވިދާޅުވީ، މިދިޔަ ޖޫންމަހުގެ 20 ވަނަ ދުވަހު ރާއްޖޭގެ ކަނޑުގެ ސަރަޙައްދަށް ޤަވާއިދާ ޚިލާފަށްވަދެ، މަސްވެރިކަން ކުރަން އުޅެނިކޮށް އަތުލައިގަތް މި ބޯޓުގެ ވެރިފަރާތް ޖޫރިމަނާކޮށްފައިވަނީ ރާއްޖޭގައި މިހާރު ޢަމަލުކުރަމުންދާ ދިވެހިރާއްޖޭގެ މަސްވެރިކަމުގެ ޤާނޫނުގެ ދަށުން އެ މިނިސްޓްރީއަށް ލިބިގެންވާ ބާރުގެ ދަށުންކަމަށެވެ.
އެމްއެންޑީއެފްއިން ވިދާޅުވީ ރާއްޖޭގެ ޚާއްޞަ އިޤްތިޞާދީ ސަރަޙައްދުގައި ޤަވާޢިދާ ޚިލާފަށް މަސްވެރިކަން ކުރަން އުޅެނިކޮށް މި މަސްބޯޓު ފެނިފައިވަނީ ލ.އަތޮޅުގެ އިރުން 45 މޭލު ބޭރުގައި މަސްވެރިކަން ކުރަން އުޅުން "ސީލައިން-03" ނަމަކަށްކިޔާ ދޯންޏަށެވެ. އަދި މި ކަމުގެ ރިޕޯޓް އެމް.އެން.ޑީ.އެފް ކޯސްޓްގާޑް މެރިޓައިމް ރެސްކިއު ކޯޑިނޭޝަން ސެންޓަރ (އެމްއާރުސީސީ) އަށް ލިބިފައިވަނީ ޖޫންމަހުގެ 19 ވަނަ ދުވަހުގެ 15:21 ހާއިރުއެވެ.
މި މަސް ބޯޓު ހޯދުމަށް އެމް.އެން.ޑީއެފް ކޯސްޓްގާޑުން ކުރިއަށްގެންދިޔަ ޚާއްޞަ އޮޕަރޭޝަންގައި، މި ބޯޓު ކޯސްޓްގާޑް ޝިޕް ހުރަވީގެ ބެލުމުގެ ދަށަށް ގެންގޮސްފައިވަނީ ލ. އަތޮޅުގެ އިރުން 139 ނޯޓިކަލް މޭލު ބޭރުންކަމަށާ، މި ބޯޓު ކޯސްޓްގާޑްގެ ބެލުމުގެދަށަށް ގެންދިޔައިރު ބޯޓުގައި 5 ފަޅުވެރިން ތިބިކަމަށްވެސް އެމް.އެން.ޑީ.އެފުން ވިދާޅުވެފައިވެއެވެ. ނަމަވެސް މިއީ ކޮން ޤައުމަކަށް ނިސްބަތްވާ ބޯޓެއްކަމެއް ހާމަކުރައްވާފައެއްނުވެއެވެ.