މިހާރު މަރާމާތުގެ މަސައްކަތް ކުރަމުން އަންނަ އޮލިމްޕަސް އަންނަ ސެޕްޓެމްބަރުމަހުގެ ތެރޭ އާއްމުންނަށް ފިލްމް ބެލަން ހުޅުވާލެވޭވަރުވާނެކަމަށް މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖުން ވިދާޅުވެއްޖެއެވެ.
ކޯވިޑުގެ ޙާލަތާ ގުޅިގެން ބަންދުކޮށްފައިވާ އޮލިމްޕަސް އަލުން ހުޅުވުމުގެކުރިން އެތަނުގެ ޚިދުމަތްތައް ރަނގަޅުކޮށް ޢިމާރާތް މަރާމާތު ކުރުމުގެ މަސައްކަތް ދަނީ ކުރަމުންނެވެ.
ރާއްޖޭގެ ފިލްމް އިންޑަސްޓްރީ ކުރިއަރުވައިދީ، ފިލްމް އިންޑަސްޓްރީގައި މަސައްކަތްކުރާ މީހުންނާއި އާއްމުންނާ ގުޅުވައިދިން އެންމެ މުހިއްމު އެއް ބައިވެރިއަކީ އޮލިމްޕަހެވެ. ރާއްޖޭގެ ފިލްމީ އުފެއްދުންތައް އާއްމުންނާ ހަމައަށް ގެނެސްދިނުމުގައި މެދުވެރިއެއްގެ ރޯލު އަދާކުރަމުންދިޔަ އޮލިމްޕަހަށް އެކިފަހަރު މަތިން ބަދަލުތައް ގެނެސްފައިވެއެވެ. ނަމަވެސް އެ އިމާރާތަކީ އަދިވެސް ދުވަސްވުމުގެ ސަބަބުން ވަރަށް ބޮޑަށް ބާވެ، ހަލާކުވެފައިވާ އިހުގެ ޢިމާރާތެކެވެ.
އޮލިމްޕަސް މަރާމާތުކޮށް، އެތަނަށް ޒަމާނީ ބަދަލުތަކެއް ގެނައުމުގެ މަސައްކަތް ހެރިޓޭޖް މިނިސްޓްރީން މިހާރު ވަނީ ފަށާފައެވެ. މިމަސައްކަތުގެ ތެރެއިން އޮލިމްޕަސް އިމާރާތުގެ އެތެރެއާއި ބޭރުންވެސް ބޮޑެތި ބަދަލުތަކެއް ފެނިގެންދާނެކަމަށް އެމިިނިސްޓްރީން ވިދާޅުވެއެވެ.
އޮލިމްޕަސް މަރާމާތުކުރުމުގެ މަސައްކަތާގުޅޭގޮތުން ޕީ.އެސް.އެމް ނިއުސްއަށް މަޢުލޫމާތުދެއްވަމުން މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖްގެ އިވެންޓް މެނޭޖަރ އަޙްމަދު ރަމީޒް ވިދާޅުވީ، އޮލިމްޕަސް އިމާރާތް އެންމެ ކުރިއްސުރެއް ހަދާފައިވާގޮތުން އިމާރަތުގައި ފެންހިފުމުގެ މައްސަލައަކީ ވަރަށް ބޮޑަށް ކުރިމަތިވެފައިވާ މައްސަލައެއްކަމަށެވެ. އެހެންކަމުން ޢިމާރާތް ފެނުން ރައްކާތެރިކުރުމަށްޓަކައި ފުރާޅުތައް ހެދުމާއި، ޝީޓްތަކަށް ކެމިކަލްޖަހައި ވަރުގަދަކުރުމުގެ މަސައްކަތް ކުރަމުންދާކަމަށް ރަމީޒް ވިދާޅުވިއެވެ.
އޮލިމްޕަހުން ޚިދުމަތް ލިބިގަންނަ އާއްމުންނަށް ފަސޭހަކުރުމަށްޓަކައި ޓިކެޓް ކައުންޓަރު ހުރި ސަރަޙައްދު އެހެން ތަނަކަށް ބަދަލުކޮށް، ވޯކްވޭއާއި ކެފޭ އޭރިއާވެސް ބޮޑުކުރުމުގެ މަސައްކަތް ކުރަމުންދާކަމަށް ރަމީޒް ވިދާޅުވިއެވެ.
"ޓިކެޓް އޭރިއާވެސް ޒަމާނީ ވަސީލަތްތަކަކާއެކު އަލުން ތަރައްޤީވެގެންދާނެ. އަދި ކެފޭ އޭރިއާވެސް ތަންކޮޅެއް ހިތްގައިމު މާހައުލަކަށް ހެދުމުގެ ގޮތުން ބޮޑެތި ބަދަލުތަކެއް އެބަގެނެވޭ. ފާޚަނާތަކަށްވެސް ބޮޑެތި ބަދަލުތަކެއް އަންނާނެ." ރަމީޒް ވިދާޅުވިއެވެ.
ރަމީޒް ވިދާޅުވީ، އޮލިމްޕަސް މަރާމާތުކުރުމުގެ މަސައްކަތުގެ ތެރެއިން، ޢިމާރާތުގެ އެތެރެއިން ފެނިގެންދާނެ އެންމެ ބޮޑު އެއް ބަދަލަކީ ޚާއްސަ އެހީއަށް ބޭނުންވާ މީހުންނަށްވެސް ފޮރޮޅުލީ ގޮނޑީގައި ފަސޭހައިން ވަދެނުކުމެ ހެދުމުގެ ފުރުޞަތު ލިބިގެންދިއުންކަމަށެވެ. އަދި ފިލްމް އިންޑަސްޓްރީގައި މަސައްކަތްކުރާ މީހުންނަށާއި، ސިނަމާ ބޭނުންކުރާ އާއްމުންނަށްވެސް ތަފާތު ތަޖުރިބާތަކެއް ގެނުވާނެތަނަކަށް އޮލިމްޕަސް ބަދަލުވެގެންދިއުމަކީ އަމާޒެއްކަމަށް ރަމީޒް ވިދާޅުވިއެވެ.
"ޚާއްސަ އެހީއަށް ބޭނުންވާ މީހުންނަށް ވީލްޗެއަރގައި އޮލިމްޕަހަށްވަދެ ހޯލަށްވެސް ވަދެ، ކެންޓީނަށްވެސް ވަދެ ޚިދުމަތް ހޯދޭނެހެން ހުރިހާތާކަށް ދެވޭގޮތަށް އޮލިމްޕަހުގެ ފްލޯރއަށް ވަރަށް ބޮޑެތި ބަދަލުތަކެއް އަންނާނެ. ރޭމްޕަކާއެއްޗެހި ލެވިފައި ވީލްޗެއަރގައި ޚާއްސަ އެހީއަށް ބޭނުންވާ މީހުންނަށްވެސް މިތަނުން މިދޭ ޚިދުމަތްތައް ފަސޭހަކަމާއެކުގައި ބޭނުންކުރެވޭކަހަލަ ގޮތަކަށް ބޮޑެތި ބަދަލުތަކެއް އަންނާނެ." ރަމީޒް ވިދާޅުވިއެވެ.
ފިޔަވަހިތަކަކަށް ބަހާލައިގެން ކުރިއަށްގެންދާ މި މަޝްރޫޢު ދަށުން އޮލިމްޕަހުގެ ފްލޯރ ސްޕޭސްއަށް ބަދަލުތައް ގެނައުމުގެ އިތުރުން، ހޯލުގައި ލާފައިވާ ކުލަތަކަށްވެސް ބަދަލުގެނައުމަށް ވަނީ ނިންމާފައެވެ. އަދި މި މަޝްރޫޢުގެ ކުރިއަށްހުރި ފިޔަވަހިތަކުގެ ދަށުން، ސިނަމާގައި ބޭނުންކުރާ އިކުއިޕްމަންޓްތައް ޒަމާނީކޮށް އަޕްގްރޭޑްކުރުމާއި، ސައުންޑާއި ސްޕީކަރ ސިސްޓަމް ބަދަލުކުރުންފަދަ މަސައްކަތްތައް ކުރުމަށް ވަނީ ރާވާފައެވެ. ހެރިޓޭޖް މިނިސްޓްރީން ވިދާޅުވީ، އޮލިމްޕަހުގައި މިހާރު ކުރަންހުރި މަރާމާތުތައް ކޮށްނިންމުމަށް ގާތްގަނޑަކަށް 3 މަސް ދުވަސް ހޭދަވޭނަކަމަށް ބެލެވޭކަމަށެވެ.