ގަރާޖު ހުއްދަ ދޫކުރުން ސިޓީ ކައުންސިލަށް ބަދަލުކުރީ ކައުންސިލާ މަޝްވަރާކުރުމަށްފަހު: ޓްރާންސްޕޯޓް އޮތޯރިޓީ

މާލެ ސަރަހައްދުގައި ވެހިކަލް ރަޖިސްޓްރީކުރުމަށް ބޭނުންވާ ގަރާޖު ހުއްދަ ދޫކުރުމުގެ މަސައްކަތް މާލޭ ސިޓީ ކައުންސިލްގެ ދަށަށް ބަދަލުކުރަން ނިންމީ ސިޓީ ކައުންސިލާއެކު މަޝްވަރާކޮށް ލިޔުމުން އެކަން އެންގުމަށްފަހު ކަމަށް މޯލްޑިވްސް ޓްރާންސްޕޯޓް އޮތޯރިޓީން ވިދާޅުވެއްޖެއެވެ.

ޓްރާންސްޕޯޓް އޮތޯރިޓީން މިހެން ވިދާޅުވެފައިވަނީ މިމަހުގެ 15 ވަނަ ދުވަހު މާލޭ ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމުގައި ގަރާޖު ހުއްދަ ދޫކުރުމުގެ މަސައްކަތް މާލޭ ސިޓީ ކައުންސިލްގެ ދަށަށް ބަދަލުކުރަން ނިންމައި، ޓްރާންސްޕޯޓް މިނިސްޓްރީން ބަޔާނެއް ނެރުނީ އެކައުންސިލަށް ނާންގާކަމަށް މާލޭގެ މޭޔަރު ޑރ.މުހައްމަދު މުޢިއްޒު ވިދާޅުވެފައިވާތީއެވެ.

މިކަމާގުޅިގެން އެ އޮތޯރިޓީން ނެރުނު ބަޔާނެއްގައި ވިދާޅުވީ، އެއްގަމު ދަތުރުފަތުރުގެ ޤާނޫނުގެ 4 ވަނަ އިޞްލާހުގައި އެއްގަމު އުޅަނދާބެހޭ ބައެއް މަސައްކަތްތައް ކުރުމަކީ ކައުންސިލްތަކުގެ މައްޗައް ލާޒިމްކުރާ ކަމަކަށްވާތީ، އެއޮތޯރިޓީގެ ފަރާތުން ކުރަމުންގެދިޔަ އެއްގަމު އުޅަނދުގެ މަސައްކަތްތަކުގެ ތެރެއިން ސިޓީ ކައުންސިލަށް ބަދަލުކުރަންޖެހޭ މަސައްކަތްތައް ބަދަލުކުރުމަށްޓައި، މިދިޔަ އަހަރުގެ ނޮވެމްބަރު މަހުން ފެށިގެން މާލޭ ސިޓީ ކައުންސިލާއި މަޝްވަރާކޮށް، މުޢާމަލާތް ކުރަމުންދާކަމަށެވެ. އެގޮތުން ނިމިދިޔަ ސިޓީ ކައުންސިލާއެކުވެސް މިކަމުގައި މަސައްކަތްތަކެއް ކުރެވިފައިވާކަން ޓްރާންސްޕޯޓް އޮތޯރިޓީން ވަނީ ފާހަގަކުރައްވާފައެވެ.

އެގޮތުން، ގްރޭޓަރ މާލެ ސަރަހައްދުގައި އެއްގަމު އުޅަނދު ރަޖިސްޓްރީ ކުރުމަށް ބޭނުންވާ ގަރާޖުގެ ހުއްދަ ދިނުމާއި، ގަރާޖު ޗެކްކުރުމުގެ މަސައްކަތް 4 ޖުލައި 2021 އިން ފެށިގެން ސިޓީ ކައުންސިލުން ކުރިޔަށް ގެންދިއުމަށް ދަންނަވާފައިވާ ކަމަށް އެ އޮތޯރިޓީން ހާމަކުރައްވާފައިވެއެވެ. އަދި 27 ޖޫން 2021 ގައި މާލޭ ސިޓީ ކައުންސިލުން އެއޮތޯރިޓީއަށް ފޮނުއްވި ސިޓީއެއްގައި، ޓްރާސްޕޯޓް އޮތޯރިޓީއާއި ގުޅޭ މައިގަނޑު މަސައްކަތްތައް އެއްތަނަކުން ކުރެވެން އޮންނަ ހިނދު، މަސައްކަތްތައް ބައި ކޮށްގެން ދެތަނުން ކުރަމުން ދިއުމަކީ ރައްޔިތުންނަށް ނުހަނު އުނދަގޫ ބޮޑު ތަކުލީފުތަކެއް ކުރިމަތިވާނެ ކަމެއްކަމުގައި ބަޔާންކޮށްފައިވާތީ، ކައުންސިލުގެ އެދިވަޑައިގަތުމާ އެއްގޮތަށް ގަރާޖު ހުއްދަ ދިނުމުގެ އެންމެހާ ކަންކަން ސިޓީ ކައުންސިލުން ކުރިޔަށް ގެންދިއުމަށް، 29 ޖޫން 2021 ގައި ސިޓީއަކުން ދަންނަވާފައިވާކަމަށް އެ އޮތޯރިޓީން ވަނީ ވިދާޅުވެފައެވެ.

އެހެންނަމެވެސް މާލެ ސިޓީ ކައުންސިލަށް އިތުރު ވަގުތު ބޭނުންވާތީވެ، 01 އޮގަސްޓް 2021 އިން ފެށިގެން އެ ޚިދުމަތްތައް ދެމުންގެންދާނީ މާލޭ ސިޓީ ކައުންސިލުންކަމަށް ޓްރާންސްޕޯޓް އޮތޯރިޓީގެ ފަރާތުން އިޢުލާން ކުރީ މާލޭ ސިޓީ ކައުންސިލާއިއެކު މަޝްވަރާކޮށް، ލިޔުމުން އެކަން އެންގުމަށްފަހު، ޚިދުމަތް ލިބިގަންނަ ފަރާތްތަކަށް ދުރާލައި މިބަދަލު އައިކަން އެންގުމުގެ ގޮތުންކަމަށްވެސް އެ އޮތޯރިޓީން ނެރުނު ބަޔާނުގައި ވިދާޅުވެފައިވެއެވެ.