ވިލިމާލޭގައި ބަގީގެ ޚިދުމަތް ދޭނެ އިތުރު ފަރާތެއް ހޯދުމަށް މާލޭ ސިޓީ ކައުންސިލުން އިޢުލާންކޮށްފިއެވެ.
މާލޭ ސިޓީ ކައުންސިލުން ވަނީ މި މަސައްކަތް ކުރުމަށް ޕްރޮޕޯސަލް ހުށަހެޅުމުގެ ފުރުޞަތު މިހާރު ހުޅުވާލާފައެވެ. ބީލަން ހުށަހެޅުމުގެ ފުރުޞަތު ދެވޭނީ، ކަނޑައެޅިފައިވާ ވަގުތުގައި ބީލަމުގައި ރަޖިސްޓްރީކޮށްފައިވާ ފަރާތްތަކަށް އެކަނިކަމަށް ސިޓީ ކައުންސިލުން ވިދާޅުވެފައިވެއެވެ.
ވިލިމާލޭގައި ބަގީގެ ޚިދުމަތް ދޭން ޝަޢުގުވެރިވާ ފަރާތްތަކުން ބީލަން ރެޖިސްޓްރޭޝަން ފޯރމް ފުރިހަމަ ކުރުމަށްފަހު، 11 އޮގަސްޓް 2021 ވާ ބުދަ ދުވަހުގެ 10:00 ގައި އެމް.ޑަބްލިޔު.އެސް.ސީގެ ކަސްޓަމަރ ސަރވިސް ބިލްޑިންގގެ 4 ވަނަ ފަންގިފިލާގައި އޮންނަ މަޢުލޫމާތު ސެޝަނަށް ވަޑައިގެން އެފޯރމް ހުށަހެޅުމަށް ސިޓީ ކައުންސިލުން ވަނީ އެދިފައެވެ. މި މަސައްކަތުގެ ތަފްޞީލް މަޢުލޫމާތު ކަރުދާސް، މައުލޫމާތު ސެޝަންގައި ހަވާލުކުރެވޭނެކަމަށް ސިޓީ ކައުންސިލުން ވިދާޅުވެއެވެ.
ސިޓީ ކައުންސިލުން ދޭ މަޢުލޫމާތާ އެއްގޮތަށް ވިލިމާލޭގައި ބަގީގެ ޚިދުމަތްދޭން ބޭނުންވާ ފަރާތްތަކުން ޕްރޮޕޯސަލް ހުށަހެޅުމަށް ސިޓީ ކައުންސިލުން ހުޅުވާލާފައިވަނީ 12 ސެޕްޓެމްބަރ 2021 ގެ ނިޔަލަށެވެ.
މީހުން ދިރިއުޅޭ ރަށެއްގައި ތިމާވެއްޓާ ރައްޓެހިގޮތަކަށް ބަގީގެ ޚިދުމަތް ދޭން ފެށި ފުރަތަމަ ރަށަކީ ވިލިމާލެއެވެ. ވިލިމާލޭގައި މި ޚިދުމަތް ދޭން ފަށާފައިވަނީ 2014 ވަނަ އަހަރުގެ ފެބްރުއަރީ މަހުގެ ތެރޭގައެވެ. ވިލިމާލޭގައި ބަގީގެ ޚިދުމަތް ދިނުމަށް ސިޓީ ކައުންސިލުން އެންމެ ފުރަތަމަ ޙަވާލުކޮށްފައިވަނީ "ނައިންޓީ ނައިން ހޯލްޑިންގްސް" ނަމަކަށް ކިޔާ އަމިއްލަ ކުންފުންޏަކާއެވެ. 2014 ވަނަ އަހަރު އެކުންފުނިން ވިލިމާލެއަށް ބަގީގެ ޚިދުމަތް ތަޢާރަފުކޮށްފައިވަނީ ''99 އިކޯ ކެބް ސަރވިސަސް"ގެ ނަމުގައެވެ.
ވިލިމާލޭގައި ބަގީގެ ޚިދުމަތް ދޭން ފަށާފައިވަނީ ވިލިމާލެއަކީ އެހެން ރަށްރަށާއި ޚިލާފަށް ތިމާވެއްޓާއި ރައްޓެހި މާހައުލެއް އޮތް ރަށަކަށްވެފައި، ވިލިމާލޭގައި ދިރިއުޅޭ ފަރާތްތަކުގެ ތެރެއިން ދަތުރުފަތުރުކުރުން ފަދަ ޒަރޫރީ ބޭނުންތަކަށް ބޭނުންވާ ރައްޔިތުންނަށް އެ ފަސޭހަކަން ފޯރުކޮށްދިނުމަށް ޓެކްސީ ޚިދުމަތް ފޯރުކޮށްދިނުމުގެ އުސޫލުންނެވެ.