ބަރަކާތްތެރި އަޟްޙާ އީދު ފާހަގަ ކުރަމުންދާއިރު ޢާއިލީ ގުޅުންތައް ބަދަހިކުރުމަށާއި، ރަޙްމަތްތެރިކަމާއި އެކުވެރިކަމުގެ ގުޅުންތައް އާލާކޮށް ދެމެހެއްޓުމަށް އިސްކަން ދިނުމަށް ރައީސުލްޖުމްހޫރިއްޔާ އިލްތިމާސްކުރައްވައިފިއެވެ. ރައީސުލްޖުމްހޫރިއްޔާ މިކަމަށް އިލްތިމާސްކުރެއްވީ އަޟްޙާ ޢީދު ދުވަހުގެ މުނާސަބަތުގައި ފޮނުއްވި ޚިޠާބުގައެވެ.
އުފާވެރި އަޟްޙާ ޢީދުގެ ހެޔޮއެދުމާއި ތަހުނިޔާ ލޮބުވެތި ރައްޔިތުންނަށް، އިޚްލާޞްތެރިކަމާއެކު އަރިސްކުރަން. އަޅުގަނޑު ގެ ދުޢާއަކީ މި ޢީދަކީ ޢާއިލީ ގުޅުންތަކާ އިޖުތިމާޢީ ގުޅުންތައް އާލާވެ ބަދަހިވެގެންދާނެ އުފާވެރި ޢީދެއްކަމުގައި ލެއްވުން. pic.twitter.com/gdGhCbDgTi
— Ibrahim Mohamed Solih (@ibusolih) July 19, 2021
ރައީސުލްޖުމްހޫރިއްޔާގެ މިޚިޠާބުގައި ރާއްޖޭގެ ލޮބުވެތި ރައްޔިތުންނަށް، އިޚްލާޞްތެރިކަމާއެކު ހެޔޮއެދުމާއި ތަހުނިޔާ އަރިސްކުރައްވާފައިވެއެވެ އަދި، އިސްލާމީ އުންމަތުގެ އެންމެހައި އަޚުންނާއި އުޚުތުންނަށްވެސް މި އުފާވެރި ޢީދުގެ ތަހުނިޔާ އާއި ހެޔޮއެދުންތައް ފޮނުވާފައިވެއެވެ.
ރައީސްގެ ޚިޠާބުގައި މިދިޔަ އަހަރެކޭ އެއްފަދައިން، މިއަހަރުގެ އަޟްޙާ ޢީދާވެސް، އަޅުގަނޑުމެން ބައްދަލުކުރަން މި ޖެހުނީ، މުޅި ދުނިޔެއަށް ފެތުރެމުންދާ ނުރައްކާތެރި ކޯވިޑް-19ގެ ބަލިމަޑުކަމުގެ ތެރޭގައި ކަމަށާއި އެންމެ ފުރިހަމަ ގޮތުގައި ޢީދުގެ އުފާ ފާޅުކުރުމަށްވެސް، ކޯވިޑް ވަބާގެ ސަބަބުން މިވަނީ ހުރަސްއެޅިފައި ކަމަށް ވިދާޅުވިއެވެ. އެހެންނަމަވެސް، މާތްވެގެންވާ އިސްލާމްދީނުގައި ކަނޑައަޅުއްވާފައިވާ މިފަދަ މަތިވެރި މުނާސަބާތަކުގެ ޒަރީޢާއިން، އަޅުގަނޑުމެންގެ ދޭދޭ ގުޅުންތައް ބަދަހިކޮށް، އުފާވެރިކަމާއި އެކުވެރިކަމުގައި ދެމިތިބުމުގެ ފުރުޞަތު، މާތް ﷲ ވަނީ އަޅުގަނޑުމެންނަށް ތަނަވަސްކޮށްދެއްވާފައެވެ.
ކޯވިޑްގެ ހިތި ތަޖުރިބާތައް އަޅުގަނޑުމެންގެ ދިރިއުޅުމަށް ބޮޑެތި ބަދަލުތަކެއް ގެނުވާފައިވާ މި ދަނޑިވަޅުގައި، ޢާއިލީ ގުޅުންތައް ބަދަހިކުރުމަށާއި، ރަޙްމަތްތެރިކަމާއި އެކުވެރިކަމުގެ ގުޅުންތައް އާލާކޮށް ދެމެހެއްޓުމަށް އިސްކަމެއް ދިނުމަށް އެދިވަޑައިގެންނެވިއެވެ. ރައީސް ވިދާޅުވީ އިސްލާމްދީނުގައި ކަނޑައަޅާފައިވާ ދެ ޢީދަކީވެސް، މުސްލިމުންގެ މެދުގައިވާ އެކުވެރިކަމާއި އެއްބަނޑުއެއްބަފާކަމުގެ ގުޅުން އިތުރަށް ބަދަހިކޮށް، ހިތްހެޔޮކަމާއެކު އެކަކު އަނެކަކާ ބައްދަލުކޮށް، ހާލުއަހުވާލު އޮޅުންފިލުވައި އުޅުމަށް ޚާއްޞަ ދެ މުނާސަބަތެއް ކަމަށާއި، އެހެންކަމުން، ކޮންމެ މީހަކުވެސް މިއަދު އަވަސްވެގަންނަންވީ، ގާތްތިމާގެ މީހުންނަށާއި އެކުވެރި ރަޙްމަތްތެރިންނަށާއި އެންމެހައި މުސްލިމުންނަށް، ޢީދުގެ ތަހުނިޔާއާއި ހެޔޮއެދުންތައް ފޮނުވުމަށް ކަމަށްވެސް ވިދާޅުވިއެވެ. ވަކިން ޚާއްޞަ ގޮތެއްގައި، ޢާއިލާގައި ތިބި ޢުމުރުން ދުވަސްވީ މާމައިންނާއި ކާފައިން އަދި މައިންބަފައިންނަށް ޒިޔާރަތްކޮށް، އެމީހުންގެ ހާލުއަހުވާލު އޮޅުންފިލުވައި، އެމީހުންނާ އެކުގައި ވަގުތުކޮޅެއް ހޭދަކޮށްލުމަށެވެ.
އަޟްޙާ ޢީދަކީ، ޙައްޖުގެ އަޅުކަމާ ވިދިގެން އަންނަ އުފާވެރި މުނާސަބަތަކަށްވާއިރު، ޙައްޖުގެ އަޅުކަމާއި އަޟްޙާ ޢީދުގެ އުފާ ފާޅުކުރުމާ ދެމެދުގައި އޮތް ގުޅުމާ މެދު ވިސްނުން ހިންގައި، އެ ގުޅުން ދެމެހެއްޓުމަށް އަޅުގަނޑުމެން ޚާއްޞަ އިސްކަމެއް ދޭންޖެހޭ ކަމަށާއި، އެ ގުޅުމަކީ، އަޅުގަނޑުމެންގެ މެދުގައި އޮންނަންޖެހޭ އެއްބައެއްވަންތަކަމާއި އެއްބައިވަންތަކަން ރަމްޒުކޮށްދޭ ގުޅުމެއް ކަމަށެވެ. ޢީދުގެ އުފާ ފާޅުކުރުމުގެ ކޮންމެ ޙަރަކާތެއްމެ ރަމްޒުކޮށްދެނީ މިދެންނެވި މަތިވެރި ގުޅުމެއް ކަމަށާއި، ޢީދުގެ އުފާފާޅުކުރުންތައް ލައްވާފައިވަނީ، މިދެންނެވި ގުޅުމަށް އަންނަ ހީނަރުކަން ނައްތާލައި، އެ ގުޅުންތައް އަލުން ބަދަހިކުރުމަށް ކަމަށްވެސް ރައީސް ވިދާޅުވެފައިވެއެވެ.
އެހެންކަމުން، ޢީދުގެ އުފާ ފާޅުކުރުމުގައިވެސް، އަޅުގަނޑުމެން އެންމެ ބޮޑު އިސްކަމެއް ދޭންޖެހިފައިވަނީ، ޤައުމީ އެއްބައިވަންތަކަށް އާލާކޮށް، މުޖުތަމަޢުގެ ހަމަޖެހުމާއި ޞުލްޙަވެރިކަން ދެމެހެއްޓުމަށް ކަމަށާއި، އަޅުގަނޑުމެން މިއަދު ކުރިމަތިލާންޖެހިފައި މިވާ ކޯވިޑްގެ ދަތި އުނދަގޫތަކުން އަރައިގަތުމުގައިވެސް، އެންމެ ވަރުގަދަ ބާރަކީ، އަޅުގަނޑުމެންގެ މެދުގައި އޮންނަ އެކުވެރިކަމާއި އެއްބައިވަންތަކަން ކަމަށް ރައީސް ވިދާޅުވިއެވެ. ޢީދުގެ އުފާ ފާޅުކުރާއިރު، ޤައުމީ ފެންވަރުގައި ވިސްނުން ހިންގަން ޖެހިފައިވަނީ، ބައިބައިވުންތަކާއި ދެކޮޅުވެރިކަމުގެ އެންމެހައި ވިސްނުންތައް އަޅުގަނޑުމެންގެ ސިކުނޑިތަކުން އެއްފަރާތްކޮށް، އެންމެން ގުޅިގެން މަސައްކަތް ކުރުމަށް ކަމަށް ރައީސް ވިދާޅުވިއެވެ.
އުފާވެރި އަޟްޙާ ޢީދުގެ ދުވަސްތަކަކީ، ދިވެހިންނަށާއި ދިވެހިރާއްޖެއަށް ހުރިހާ ގޮތަކުންވެސް އުފާވެރިކަމާއި ފާގަތިކަން ގެނެސްދޭނެ ދުވަސްތަކެއް ކަމުގައި ލެއްވުން އެދި ދުޢާ ކުރައްވާފައިވެއެވެ. ޙައްޖުގެ މަތިވެރި އަޅުކަމާއި އަޟްޙާ ޢީދުގެ އުފާވެރިކަމާ ދެމެދުގައިވާ ވަރުގަދަ ގުޅުމުން ޢިބްރަތް ޙާޞިލްކޮށް، ދިވެހި ޤައުމާއިގެން ކުރިއަށް ދިޔުމަށްޓަކައި، އެންމެން އެކުގައި، އެއް ޢަޒުމެއްގައި އަލުން މަސައްކަތް ފެށުމަށާއި، ކޯވިޑް-19ގެ ވަބާއިން މުޅި އިންސާނީ ދަރިފަސްކޮޅު ރައްކާތެރިކުރައްވައި، އަންނަ އަހަރުގެ ޙައްޖުގެ މަތިވެރި އަޅުކަމުގައި ބައިވެރިވުމުގެ ހެޔޮ ތައުފީޤު މިންވަރުކުރެއްވުމަށާއި، މިފަދަ އުފާވެރި މުނާސަބާތައް، އެންމެހައި ދިވެހިންނަށާއި މުޅި އިސްލާމީ އުންމަތަށް ތަކުރާރު ކުރައްވައި، ތިޔާގިކަމާއި ތަނަވަސްކަން މިންވަރުކުރެއްވުން އެދި ދުޢާކުރައްވާފައިވެއެވެ.
ކޯވިޑް-19ގެ ހާލަތު ރާއްޖޭގައި ގޯސްވުމާއި ގުޅިގެން މީގެކުރިން ނިންމާފައިވަނީ މިއަހަރުގެ އަޟްހާ އީދު ނަމާދު މާލެ ސަރަހައްދުގައި ޖަމާއަތުގައި ނުކުރާގޮތަށެވެ. ނަމަވެސް މިހާރު ހާލަތު ރަނގަޅުވެ ބަލިޖެހޭ މީހުންގެ އަދަދު މަދުވުމުން މިނިސްޓްރީން ވަނީ ކަމާއި ބެހޭ ފަރާތްތަކާއި މަޝްވަރާ ކުރުމަށްފަހު މާދަމާގެ އީދު ނަމާދު މާލެ ސަރަހައްދުގައި ކުރުމަށް ނިންމާފައެވެ.
19ގެ ހާލަތާއި ގުޅިގެން މާލެ ސަރަހައްދުގައި ބޮޑު ޖަމާއަތުގައި އީދު ނަމާދު ނުކުރިނަމަވެސް، މާލޭގެ ބޮޑެތި ހުރިހާ މިސްކިތެއް ހިމެނޭހެން 39 މިސްކިތެއްގައި ޢީދު ނަމާދު ކުރުމަށް ވަނީ ހަމަޖެހިފައެވެ.