ސައުދީ އަރަބިއްޔާއިން ޗައިނާއަށް އެތެރެކުރާ ތެލުގެ މިންވަރު މިދިޔަމަހު ދަށަށް ދިޔަނަމަވެސް، ޗައިނާއަށް އަދިވެސް އެންމެ ގިނައިން ތެޔޮ އެތެރެކުރަނީ ސައުދީ އަރަބިއްޔާއިންކަމަށް ތަފާސް ހިސާބުތަކުން ދައްކައިފިއެވެ.
ތަފާސް ހިސާބުތައް ދައްކާގޮތުން ސައުދީން ޗައިނާއަށް މިދިޔަމަހު އެތެރެކުރި ތެލުގެ މިންވަރު 13 އިންސައްތަ ދަށްވިނަމަވެސް، ޗައިނާއަށް އަދިވެސް އެންމެ ގިނައިން ތެޔޮ އެތެރެކުރަނީ ސައުދީ އަރަބިއްޔާއިންނެވެ.
ޗައިނާގެ ކަސްޓަމްސް ހިސާބުތަކުން ދައްކާގޮތުގައި މިދިޔަ މަހު ސަޢޫދީން ޗައިނާއަށް އެތެރެކުރި ތެލުގެ މިންވަރު ގާތްގަޑަކަށް 7.2 މިލިއަނަށް އަރައެވެ. މިއީ ދުވާލަކަށް 1.75 މިލިއަން ފީފާ ތެލެވެ. ރަޝިއާއިން ދުވާލަކަށް 1.62 މިލިއަން ފީފާގެ ތެޔޮ ޗައިނާއަށް އެތެރެކުރެއެވެ.
ޔުނައިޓެޑް އެރެބް އެމިރޭޓްސް، ޔޫއޭއީ އަދި ކުވައިތުންވެސް ޗައިނާއަށް ތެޔޮ އެތެރެކުރިނަމަވެސް، އެ ޤައުމުތަކުން ޗައިނާއަށް ތެޔޮ އެތެރެކުރާ މިންވަރު ވަނީ ދަށްވެފައެވެ. އެގޮތުން މިދިޔަމަހު ކުވައިތުން ޗައިނާއަށް އެތެރެކުރި ތެލުގެ މިންވަރު 23 އިންސައްތައަށް ދަށްވެފައިވާއިރު ޔޫއީއޭއީން ތެޔޮ އެތެރެކުރި މިންވަރު ވަނީ 32 އިންސައްތައަށް ދަށްވެފައެވެ. އަދި ތެލުގެ ކޯޓާއާއި ސަރުކާރުގެ ހުރަސްއެޅުންތަކާއި އަދި ތެލުގެ އަގު ބޮޑުވުމުގެ ސަބަބުން އޭޕްރީލްމަހަށްފަހު ރަޝިއާއިން ޗައިނާއަށް އެތެރެކުރާ ތެލުގެ މިންވަރުވެސް ވަނީ ދަށްވެފައެވެ.
ތެލާއި ގުޅޭ ޚަބަރުތައް ބުނާގޮތުން މިދިޔަ އަހަރު ފަހުކޮޅު އީރާނުން ވަނީ ރެކޯޑް ޢަދަދަކަށް ތެޔޮ ވިއްކާފައެވެ.