މިނިވަން ދުވަސް ފާހަގަކުރުމަށް ހޯމް މިނިސްޓްރީއާއި ޕަބްލިކް ސަރވިސް މީޑިއާ، ޕީ.އެސް.އެމް ގުޅިގެން ގެނެސްދޭ ކޮންޓިނިއުޓީ ޝޯވގެ ލައިވް ފީޑް ހުރިހާ ޗެނަލްތަކަކަށް ހިލޭ ދޫކުރަން ނިންމައިފިއެވެ.
އެހެން އަހަރުތަކާ ޚިލާފަށް މިއަހަރުގެ މިނިވަން ދުވަސް ފާހަގަކުރުމަށް މުޅި ރާއްޖެ ޝާމިލުވާހެން 18 ގަޑިއިރުގެ ކޮންޓިނިއުޓީ ޝޯވއެއް ކުރިއަށްގެންދިއުމަށް ހޯމް މިނިސްޓްރީން ވަނީ ނިންމަވާފައެވެ. މި ޝޯވއަކީ ޕީ.އެސް.އެމްއާއި ގުޅިގެން، ގިނަ މުއައްސަސާތަކެއްގެ ބައިވެރިވުމާއެކު ކުރިއަށްގެންދިއުމަށް ހަމަޖެހިފައިވާ ޝޯއެކެވެ. މިނިވަން ދުވަހުގެ ރަސްމީ ހަރަކާތްތައް މާދަމާ ފެށުމަށް ހަމަޖެހިފައިވަނީ ޖުމްހޫރީ މައިދާނުގައި ބާއްވާ ދިދަނެގުމުގެ ޚާއްސަ ރަސްމިއްޔާތުންނެވެ. އަދި މާދަމާ ހެނދުނު 10 ޖަހާއިރު ރައީސުލްޖުމްޙޫރިއްޔާ އިބްރާހީމް މުޙައްމަދު ޞާލިޙު ދިވެހި ޤައުމާ މުޚާޠަބުކުރައްވާނެއެވެ.
ޕީ.އެސް.އެމްގެ ޗީފް ކޮންޓެންޓް އޮފިސަރ އިބްރާހީމް ރަޝީދު ވިދާޅުވީ، މާދަމާ ހެނދުނު 6 އިން ފެށިގެން ރޭގަނޑު 12 ޖެހުމާއި ހަމައަށް ކުރިއަށްގެންދާ ކޮންޓިނިއުޓީ ޝޯވގެ ލައިވް ފީޑް ހުރިހާ ޗެނަލްތަކަކަށް ހިލޭ ފޯރުކޮށްދިނުމަށް ނިންމާފައިވާކަމަށެވެ. މި ޝޯވ ގެނެސްދޭނީ ޕީ.އެސް.އެމްގެ ދަށުން ހިންގާ ޓެލެވިޜަން މޯލްޑިވްސް، ޓީ.ވީ.އެމުންނެވެ. ޝޯވގެ ތެރޭގައި މިނިވަން ދުވަހާގުޅޭ ތަފާތު މަޢުލޫމާތުތަކާއި، އާއްމުންގެ ޝުޢޫރުތަކާ، ރާއްޖޭގެ އެކި ސަރަޙައްދުތަކުގައި ދުވަސް ފާހަގަކުރުމަށް ކުރިއަށްގެންދާ ތަފާތު ހަރަކާތްތައް ގެނެސްދޭނެއެވެ. ޝޯވއަށް ބޭނުންވާ ތަފާތު ކޮންޓެންޓު ހޯމް މިނިސްޓްރީން ފޯރުކޮށްދޭއިރު، އެޑިޓިންގއާއި ޕްރޮޑަކްޝަންގެ ކަންކަން ޕީ.އެސް.އެމްގެ ފަރާތުން ކުރާނެކަމަށް އިބްރާހީމް ރަޝީދު ވިދާޅުވިއެވެ.
މިނިވަން ދުވަސް ފާހަގަކުރުމުގެ ގޮތުން ގެނެސްދޭ ޓީވީ ކަވަރޭޖަށް ދީފައިވަނީ "މިނިވަން އުފާ މުޅިރާއްޖެއިން" މިނަމެވެ. ހޯމް މިނިސްޓްރީން ވިދާޅުވީ، މިނިވަން ދުވަހުގެ މިއަހަރުގެ ހުރިހާ ހަރަކާތެއްވެސް ގުޅުވާލާފައިވާނީ "މިނިވަންކަމުގެ އުފާވެރިކަން، މުޖުތަމަޢުގެ ބަދަހިކަން" މި ޝިއާރާކަމަށެވެ. އަދި މިއަހަރު ކޮންޓިނިއުޓީ ޝޯވއެއްގެ ސިފައިގައި މިނިވަން ދުވަހުގެ ހަރަކާތްތައް ގެނެސްދޭން ނިންމާފައިވަނީ އެހެން އަހަރުތަކާ ޚިލާފަށް ކޯވިޑް-19ގެ ސަބަބުން ގިނަ ބަޔަކު އެއްތަނަކަށް އެއްވެގެން ކުޅިވަރުތަކާއި އައިޓަމްތައް ހުށަހެޅުމަކީ ރައްކާތެރިކަމަކަށްނުވާނެތީ ކަމަށް ހޯމް މިނިސްޓްރީން ވިދާޅުވެއެވެ. ނަމަވެސް މި ޝޯވ ވެގެންދާނީ ރާއްޖޭގެ ހުރިހާ ރަށެއް ތަމްޞީލުވާނެހެން، އެކި އުމުރުފުރާތަކުގެ އާއްމުން ޝައުގުވެރިވާނެ ތަފާތު ކޮންޓެންޓުތަކެއް ގެނެސްދޭނެ ޝޯވއަކަށްކަމަށް އެ މިނިސްޓްރީން ހާމަކުރައްވައެވެ.
މާދަމާ ކުރިއަށްގެންދާ ކޮންޓިނިއުޓީ ޝޯވގެ ތެރެއިން ރާއްޖޭގެ ހުރިހާ ރަށެއް ތަމްޞީލުވާނެހެން ތަފާތު ހަރަކާތްތައް ގެނެސްދޭނެއެވެ. އެގޮތުން ވަކި ވަކި ރަށްރަށަށް ޚާއްސަ ސަޤާފީ އަދި ތާރީޚީ ކުޅިވަރުތަކާއި، ސްކޫލް ދަރިވަރުންގެ ފަރާތުން ހުށަހަޅައިދޭ ދިވެހި އަދަބިއްޔާތާ ގުޅުންހުރި ތަފާތު ކޮންޓެންޓުވެސް މި ޝޯވގެ ތެރެއިން ގެނެސްދޭނެއެވެ. އަދި ދިވެހި ފަންނާނުންގެ ތަފާތު ހުނަރުތަކާއި، ހުށަހެޅުންތަކާއި ކުންފުނިތަކާއި މުއައްސަސާތަކުގެ ބައެއް ހުށަހެޅުންތައްވެސް ޝޯވގެ ތެރެއިން ގެނެސްދޭނެއެވެ.