އެމެރިކަން އެކްޕްރެސް ބޭނުންކުރާ އެމެރިކާ މީހުން އިތުރުވެ ކުންފުނީގެ އާމްދަނީ އިތުރުވެއްޖެ

މަލްޓިނޭޝަން ފައިނޭންޝިއަލް ސާރވިސް ކޯޕަރޭޝަން ކުންފުނި، އެމެރިކަން އެކްސްޕްރެސްއަށް މިއަހަރު ލިބުނު އާމްދަނީ މިދިޔަ އަހަރާއި އަޅާބަލާއިރު 10.24 ބިލިއަން އެމެރިކާ ޑޮލަރަށް އިތުރުވެއްޖެއެވެ. މިދިޔަ އަހަރު އާމްދަނީގެގޮތުގައި ކުންފުންޏަށް ލިބިފައިވަނީ 7.68 ބިލިއަން އެމެރިކާ ޑޮލަރެވެ.

އެމެރިކަން އެކްސްޕްރެސްގެ ޢާމްދަނީ އިތުރުވާން ފަށާފައިވަނީ އަހަރުގެ ދެވަނަ ކުއާޓަރުގައެވެ. އެމެރިކަން އެކްސްޕްރެސްގެ ރައީސް އަދި ސީއީއޯ ސްޓީވެން ސްކުއެރީ ވިދާޅުވީ އެމެރިކަން އެކްސްޕްރެސް ކާޑު ގެންގުޅޭ މެމްބަރުން ޚަރަދުކުރާވަރު ނިމިދިޔަ ކުއާޓަރަށްވުރެ އިތުރުވެފައިވާކަމަށެވެ. އަދި މި ޢަދަދު ކޯވިޑްގެ ބަލިމަޑުކަމުގެ ކުރިން ހުރި ޢަދަދަށްވުރެ އިތުރުވެފައިވާ ކަމަށްވެސް އޭނާ ވިދާޅުވިއެވެ.

މިއިތުރުވުން އައިސްފައި މިވަނީ އެމެރިކަން އެކްސްޕްރެސް ކާޑު ބޭނުންކުރާ އެމެރިކާ މީހުން ޚަރަދު ކުރާ މިންވަރު އިތުރުވުމުގެ ސަބަބުން ކަމުގައިވެސް ކުންފުނިން ބުނެއެވެ. ކޯވިޑްގެ ބަލިމަޑުކަމަށްފަހު ވެކްސިން ދިނުން އާންމުވުމާއެކު ފިހާރަތަކާއި ރެސްޓޯރެންޓްތަކާއި، މުނިފޫހިފިލުވާ ތަންތަނަށް ޚަރަދުކުރުން ވަނީ ގިނަވެފައެވެ.

އެމެރިކަން އެކްސްޕްރެސްގެ އިތުރުން ފީ ބޭސްޑް ޕްލެޓިނަމް ކާޑަށް އޮތް ޑިމާންޑްވެސް އުފުލިފައިވާ ކަމަށް ސްޓީވެން ވިދާޅުވިއެވެ. މިކުއާޓަރުގައި ކުންފުނިން ވަނީ 2.4 މިލިއަން ޕްލެޓިނަމް ކާޑު ރަޖިސްޓްރީވެސް ކޮށްފައެވެ.

ވެކްސިންދޭ ރޭޓް މަދުވުމާއެކު އެމެރިކާގެ ބައެއް ސަރަޙައްދުތަކުގައި ކޭސްތަކުގެ ޢަދަދު އަންނަނީ މަތިވަމުންނެވެ. މިހާރު އިތުރުވަމުންދާ އާމްދަނީ އަދިވެސް ރަނގަޅުވެގެންދާނެކަމަށް އުންމީދުކުރާކަމަށާއި 2022 ވަނަ އަހަރު އަންނަންވާއިރަށް ކުންފުނިން އުންމީދު ކުރާވަރުގެ ޢާމްދަނީއެއް ލިބޭނެކަމަށް ޔަޤީންކުރާ ކަމުގައިވެސް އެކުންފުނިން ބުނެއެވެ.