ހުޅަނގުގެ ބްރޭންޑްތައް ޗައިނާއިން ބޯއިކޮޓްކުރުމުގެ ސަބަބުން ގާމެން މަލްޓިނޭޝަނަލް ކުންފުނި އެޑިޑާސްގެ ވިޔަފާރިއަށް އަހަރުގެ ދެވަނަ ކުއާޓަރުގައި ގެއްލުން ވެއްޖެއެވެ.
މީގެއިތުރުން ކުންފުނީގެ އުފެއްދުންތައް މައިގަނޑުގޮތެއްގައި އެތެރެކުރާ އެއް ޤައުމުކަމަށްވާ ވިއެޓްނާމްގައި ހުންނަ ކުންފުނީގެ ކާރުޚާނާ ބަންދުކުރަން ޖެހުންވެސް ވެފައިވަނީ ވިޔަފާރި ދަށްވުމުގެ ސަބަބެއްކަމަށެވެ.
މާރޗްމަހުގެ ފަހުކޮޅު ޗައިނާއިން ކުންފުނި ބޮއިކޮޓްކުރަން ގޮވާލިނަމަވެސް ޗައިނާގައި ކުންފުނީގެ އުފެއްދުންތަކަށް އޮތް ޑިމާންޑް އުފުލެމުންދާތީ މުޅިއަހަރުގެ ވިޔަފާރިން ކުންފުންޏަށް ފައިދާވާނެކަމަށް އެޑިޑާސްއިން ވަނީ ލަފާކޮށްފައެވެ. އަދި ވިއެޓްނާމްގައިވެސް އުފެއްދުންތައް އަވަސް މުއްދަތެއްގައި އުފައްދަން ފެށޭވަރުވާނެކަމަށް އެޑިޑާސްއިން ލަފާކުރެއެވެ.
އަހަރުގެ ދެވަނަ ކުއާޓަރުގައި ކުންފުނީގެ ވިޔަފާރި 6 ބިލިއަން ޑޮލަރަށް އިތުރުވެފައިވާއިރު އިންޓްރެސްޓާއި ޓެކްސް ހިމަނައިގެން ކުންފުންޏަށް ފައިދާގެ ގޮތުގައި ލިބިފައިވަނީ 543 މިލިއަން ޔޫރޯއެވެ. އަދި މިއީ މާހިރުން ލަފާކޮށްފައިވާ ވަރަށްވުރެ އިތުރު ޢަދަދެއްވެސްމެއެވެ. މިއާއިއެކު އެޑިޑާސްއިން ވަނީ މުޅިއަހަރުގެ ވިޔަފާރި 20 އިންސައްތައަށް އިތުރުވާނެކަމަށް ލަފާކޮށްފައެވެ. އަދި ފައިދާގެ ގޮތުގައި 1.4 އާއި 1.5 މިލިއަން ޔޫރާއާއި ދެމެދުގެ ޢަދަދެއް ލިބޭނެކަމަށްވެސް އެޑިޑާސްއިން ވަނީ ލަފާކޮށްފައެވެ.
މީގެއިތުރުން އެޑިޑާސްގެ އައު ފިހާރަތަކާއިއެކު ޗައިނާގެ ވިޔަފާރި ރަގަޅުވެގެންދާނެކަމަށްވެސް ކުންފުނިން ވަނީ ލަފާކޮށްފައެވެ. ދެވަނަ ކުއާޓަރުގެ ޗައިނާގެ ވިޔަފާރިވަނީ 16 އިންސައްތައަށް ދަށްވެފައެވެ.
މުސްލިމުންނާއި ދެކޮޅަށް ޗައިނާގެ ޝިންޖިއާންގައި ހިންގާ އިންސާނިއްޔަތާއި ޚިލާފު އަމަލުތަކާއި ގުޅިގެން ރިޕޯޓްތައް އާންމުކޮށްފައިވުމުގެ ސަބަބުން ކުންފުނީގެ އުފެއްދުންތަކަށް ބޭނުންވާ ކަފަ ޝިންޖިއާނުން ނުލިބޭނެކަމަށްބުނެ ޗައިނާއިން ދަނީ އެޑިޑާސްއަށް އެކިއެކި ދަތިތައް ކުރިމަތިކުރުވަމުންނެވެ. ނަމަވެސް ބެއިޖިންއިން މިކަންކަން ދޮގުކުރެއެވެ. އަދި ކޯވިޑްގެ ބަލިމަޑުކަމާއި ހެދި ވިއެޓްނާމްގައި އިޢުލާންކޮށްފައި އޮތް ފުރަންބަންދު މިމަހުގެ 15 ވަނަ ދުވަހު ނިމުމަކަށް ގެނައުމުން ވިއެޓްނާމްގައި ކުންފުނީގެ އުފެއްދުންތައް އުފައްދަން އަލުން ފަށައިގަނެވޭނެކަމަށްވެސް އެޑިޑާސްއިން އުންމީދުކުރެއެވެ.
މައިގަނޑުގޮތެއްގައި ބޫޓު އުފައްދާ ވިއެޓްނާމްގެ ކާރުޚާނާތަކުން ކުންފުނީގެ އުފެއްދުންތަކުގެ 28 އިންސައްތަ ޙިއްސާކުރެއެވެ. ކުންފުނީގެ އުފެއްދުންތައް ފިހާރަތަކަށް ފޯރުކޮށްދިނުމުގެ ދަތިތަކާއި، އޭޝިއާގައި އިޢުލާންކޮށްފައިވާ އައު ފުރަންބަންދުތަކާއި ޗައިނާއިން އެޑިޑާސްގެ އުފެއްދުންތައް ބޮއިކޮޓްކުރުމުގެ ސަބަބުން ދެވަނަ ކުއާޓަރުގައި ކުންފުންޏަށް ވަނީ 500 މިލިއަން ޔޫރޯއަށްވުރެ ބޮޑު ގެއްލުމެއް ލިބިފައިވާކަމަށް ފައިނޭންސް ޗީފް ވިދާޅުވިއެވެ.