ޒުވާނުން ތަމްރީން ކުރުމަށް ދިރާގުން ކޮންމެ އަހަރަކު ބާއްވާ އެޕްރެންޓިސްޝިޕް ޕްރޮގްރާމްގެ މިއަހަރުގެ ޕްރޮގްރާމް ފަށައިފިއެވެ. މިއީ ދިރާގުގެ އެޕްރެންޓިސްޝިޕް ޕްރޮގްރާމް ކުރިއަށްގެންދާ 12 ވަނަ ފަހަރެވެ.
މިއަހަރުގެ ދިރާގު އެޕްރެންޓިސްޝިޕް ޕްރޮގްރާމްގައި 14 މީހުން ވަނީ ބައިވެރިވެފައެވެ. މި އަހަރުގެ ޕްރޮގްރާމްގެ ދަށުން މާލޭގެ އިތުރުން އައްޑު އާއި ގދ. ތިނަދު އާއި އަރިއަތޮޅާއި ބ. އޭދަފުށީގައި ވެސް މަސައްކަތް ކުރުމުގެ ފުރުސަތު ލިބޭނެ ކަމަށް ދިރާގުން ބުނެއެވެ.
މި ޕްރޮގްރާމްގައި ބައިވެރިވެވޭނީ އުމުރުން 18-30 އަހަރާ ދެމެދު އޭ ލެވެލް ނިންމާފައިވާ މީހުންނަށް ކަމަށް ދިރާގުން ބުނެއެވެ. މި ޕްރޮގްރާމްގައި ފުރަތަމަ ހަފުތާގައި އޮންނާނީ އޮރިއެންޓޭޝަން ކަމަށް ވާއިރު، ދިރާގާ ގުޅޭ މައުލޫމާތުތަކާއި ސީއެސްއާރް ހަރަކާތްތަކާއި ބްރޭންޑް ވެލިއުތައް ކިޔައިދޭނެ އެވެ.
މި އަހަރުގެ ޕްރޮގްރާމުގައި ބައިވެރިވި މީހުންނަށް މަރުހަބާ ދަންނަވަމުން ދިރާގުގެ ސީއީއޯ އިސްމާއިލް ރަޝީދު ވިދާޅުވީ، މަސައްކަތުގެ މާހައުލުގެ ތަޖުރިބާ ލިބި، އިތުރު ހުނަރުތައް ދަސްވާނެ ކަމަށް އުންމީދު ކުރައްވާ ކަމަށެވެ. މި ޕްރޮގްރާމް ނިންމާ ބައިވެރިން ދިރާގާއި އަދި ރާއްޖޭގެ އެހެނިހެންވެސް ކުންފުނިތަކުގައި މަސައްކަތްކުރަމުންދާ ކަމަށް އިސްލާއިލް ރަޝީދު ވިދާޅުވިއެވެ.
ދިރާގުގެ އެޕްރެންޓިސްޝިޕް ޕްރޮގްރާމް ފެށީ 2009 ގައެވެ. އެޕްރޮގްރާމްގެ ދަށުން މިހާތަނަށް 214 ޒުވާނުން ވަނީ ތަމްރީނުކޮށްފަ އެވެ.