އެމެރިކާގެ ރެސްޓޯރެންޓްތަކުގައާއި ސުޕަރމާކެޓްތަކުގައި މަސައްކަތްކުރާ މުވައްޒަފުން މަސައްކަތްކުރާ ކޮންމެ ގަޑިއިރަކަށް ލިބޭ މުސާރަ ފުރަތަމަ ފަހަރަށް އިތުރުވެއްޖެއެވެ.
އެމެރިކާގެ ގިނަ ވިޔަފާރިތައް ހުޅުވާލުމާއެކު އިޤްތިޞާދު އާރާސްތުވާން ފަށާފައިވާއިރު މުވައްޒަފުންނަށް ލިބޭ މުސާރަވެސް ދަނީ އިތުރުވަމުންނެވެ. އެގޮތުން އެމެރިކާގެ މަސައްކަތްތެރިންގެ 80 އިންސައްތަ މީހުންނަށް މަސައްކަތްކުރާ ކޮންމެ ގަޑިއިރަކަށް އެންމެ މަދުވެގެން 15 ޑޮލަރު މިހާރު ލިބެއެވެ. އަދި 15 ޑޮލަރަށްވުރެ މަދުން ލިބޭ މަސައްކަތްތަކަށް ގިނަ މަސައްކަތްތެރިން ޝައުގުވެރިވެސް ނުވާކަމަށް ވަޒީފާ ހޯދައިދޭ އެޖެންސީތަކުން ބުނެއެވެ. މިއާއެކު ބޮޑެތި ކުންފުނިތަކުން ވަނީ މުވައްޒަފުންގެ މުސާރަ އިތުރުކުރަން ފަށާފައެވެ. ޓާގެޓް، ބެސްޓް ބައި، ކޮސްޓޮކޯ އަދި ޑިޒްނީންވެސް ވަނީ މުވައްޒަފުންގެ މުސާރަ އިތުރުކުރަން ނިންމާފައެވެ.
ކޯވިޑްގެ ބަލިމަޑުކަމުގެ ސަބަބުން ރެސްޓޯރެންޓްތަކާއި، ރީޓެއިލް ފިހާރަތަކުންވެސް ގިނަ ޢަދަދެއްގެ މުވައްޒަފުން ވަނީ ވަކިކުރަން ޖެހިފައެވެ. މިއާއެކު މުސާރަ ބޮޑު ނުކުރަނީސް އަލުން ވަޒީފާތަކަށް މީހުން ގެނައުންވަނީ ގޮންޖެހުމަކަށްވެފައެވެ.
މިދިޔަ އޭޕްރީލް މަހު އެމެރިކާގެ ފެޑެރަލް ކޮންޓްރެކްޓަރުންނަށް އެމީހުން މަސައްކަތްކުރާ ކޮންމެ ގަޑިއިރަކަށް މަދުވެގެން 15 ޑޮލަރު ދިނުމުގެ އަމުރެއް އެޤައުމުގެ ރައީސް ޖޯ ބައިޑަން ވަނީ ނެރުއްވާފައެވެ. މީގެސަބަބުން މިހާރުގެ މިނިމަމް ވޭޖަށް 37 އިންސައްތައިގެ ކުރިއެރުމެއް އަންނަ އަހަރުގެ މާރިޗް އާއި ހަމައަށް ލިބޭނެއެވެ. މިއަމުރުގެ ސަބަބުން ހާހުން ގުނާލެވޭ މަސައްކަތު މީހުންނަށް ފުލްޓައިމްކޮށް މަސައްކަތް ކުރަން ދެން ނުޖެހޭނެ ކަމަށާއި މީގެ ސަބަބުން އާއިލާތަކުގެ ދިރިއުޅުމުގެ ފެންވަރު ރަނގަޅުވާނެ ކަމަށް ވައިޓް ހައުސްއިން ވަނީ މީގެކުރިން ވަނީ ބުނެފައެވެ.
ސާފުކުރާ މީހުންނާއި މަރާމާތުކުރާމީހުން، އަދި ކާބޯތަކެތި ފޯރުކޮށްދޭ މީހުންނަށްވެސް މި އަމުރުގެ ދަށުން މިނިމަމް ވޭޖް ލިބޭނެއެވެ. އަދި މިކަމުގެ ސަބަބުން ޓެކްސް ދައްކާ މީހުންނަށް ގެއްލުމެއް ނުވާނެކަމަށްވެސް ވައިޓް ހައުސްއިން ވަނީ ބުނެފައެވެ.