ދުނިޔޭގެ ތިން ވަނައަށް އެންމެ ކާރޫބާރޫ ބޮޑު މުދާ އުފުލާ ބަނދަރުކަމަށްވާ ޗައިނާގެ އިރުމަތީގައި އޮންނަ ނިންބޯ ޒޯޝާން ބަނދަރުގެ ބައެއް ބަންދުކުރުމުން މުދާ އުފުލައި ހެދުމަށް ދަތިވެ ދުނިޔޭގެ ވިޔަފާރިތަކަށް ބުރޫ އަރައިފިއެވެ.
ބަނދަރުގެ ބައެއް މިދިޔަ ބުދަދުވަހު ބަންދުކޮށްފައި ވަނީ ބަނދަރުގައި މަސައްކަތްކުރާ މުވައްޒަފެއްގެ ގައިން ކޮރޯނާ ވައިރަހުގެ އައު ޑެލްޓާ ވޭރިއަންޓް ފެނުމާއި ގުޅިގެނެވެ. އަދި މިއީ މިއަހަރު މި ބަނދަރު ބަންދުކުރާ ދެވަނަ ފަހަރުވެސްމެއެވެ.
މިއާއިއެކު އެންމެ ގިނަމީހުން ވިޔަފާރިކުރަން ބޭނުންވާ ކުރިއަށް އޮތް ކްރިސްމަސް ދުވަސްވަރަށް ބޭނުންވާ މުދާ ލިބުމުގައި ދަތިތަކެއް ކުރިމަތިވާނެކަމަށް ޚަބަރުތައް ބުނެއެވެ. މީގެއިތުރުން މުދާ އުފުލުގެ އަގުތައް މިހާރުވެސް އުފުލިފައިވާ މި ދަނޑުވަޅުގައި މި އަގުތައް އިތުރަށް އުފުލިގެންދާނެކަމަށްވެސް މާހިރުން ވިދާޅުވެއެވެ.
މިގޮތުން ޗައިނާ އަދި ދެކުނު އިރުމަތީ އޭޝިއާގެ ޤައުމުތަކުން، އިރުމަތީ އެމެރިކާއަށް މުދާ އުފުލާ އަގު ވަނީ ރެކޯޑް ޢަދަދަކަށް އުފުލިފައެވެ. އަދި މުދާ އުފުލާ އަގުތަކާއި ހެދި އިނގިރޭސިވިލާތުގެ ވިޔަފާރިތަކަށްވެސް ވަނީ ދަތިތަކާއި ކުރިމަތިލާން ޖެހިފައެވެ.
ބީބީސީގެ އޭޝިއަން ކޮންސަލްޓެންޓް ޖޭސަން ޝޭންގ ވިދާޅުވީ މުދާ އުފުލުމުގެ ސިނާޢަތަށް ކޯވިޑްގެ ބަލިމަޑުކަމުން ކޮށްފައިވާ އަސަރު މަސްތަކަކަށް ދެމިގެންދާނެ ކަމަށާއި، ކުރިއަށް އޮތް ދެ އަހަރުވެސް މި ސިނާޢަތަށް ހެޔޮ ބަދަލެއް އަންނާނެކަމަށް ނުދެކޭކަމަށެވެ.