އިންޑިއާގެ ޓެލެކޮމް އޮޕަރޭޓަރ ވޮޑަފޯން އައިޑިއާއަށް ހީނުކުރާވަރުގެ ދަށް އާމްދަނީއެއް މިއަހަރުގެ ދެވަނަ ކުއާޓަރގައި ލިބިއްޖެއެވެ. މިއީ ދެ އަހަރަށްފަހު އެކުންފުނީގެ އާމްދަނީ މިހާބޮޑަށް ދަށްވިފަހަރުވެސްމެއެވެ.
މިކަމާގުޅިގެން ވޮޑަފޯން ގްރޫޕާއި އިންޑިއާގެ އައިޑިއާ ސެލިއުލިއާ ގުޅިގެން ނެރުނު ބަޔާނެއްގައި ބުނެފައިވަނީ ޢާމްދަނީއަށް މިހާ ބޮޑު ގެއްލުމެއް ލިބުނީ ކޯވިޑްގެ ބަލިމަޑުކަމާ ގުޅިގެން ރައްކާތެރިވުމަށް އަޅާފައިވާ ފިޔަވަޅުތަކުގެ ސަބަބުން ކަމަށެވެ.
މިއާއިއެކު ދެވަނަ ކުއާޓަރު ޖޫންމަހު ނިމުނުއިރު އާމްދަނީގެގޮތުގައި ކުންފުންޏަށް ލިބިފައިވަނީ 91.52 ބިލިއަން ރުޕީސް އެވެ.
މިދިޔަ އަހަރު ކުންފުންޏަށް ލިބިފައިވަނީ 106.59 ބިލިއަން ރުޕީސްއެވެ. އަދި ސަބްސްކްރައިބްގެ ގޮތުގައި މިދިޔަ އަހަރު 279.8 މިލިއަން ރުޕީސް ލިބިފައިވާއިރު މި އަހަރު މި ޢަދަދުވަނީ 255.4 މިލިއަން ރުޕީސްއަށް ވެއްޓިފައެވެ.
ޖުމްލަކޮށް މުޅި ކުއާޓަރަށް ބަލާއިރު ކުންފުންޏަށް 73.19 ބިލިއަން ރުޕީސްގެ ގެއްލުން ލިބިފައިވެއެވެ. އަދި މިއީ ގެއްލުން ލިބޭނެކަމަށް ލަފާކޮށްފައިވާ 65.01 ބިލިއަން ރުޕީސްއަށްވުރެ މަތީ ޢަދަދެކެވެ.
ކުންފުންޏަށް މިވަރުގެ ގެއްލުމެއް ލިބިފައި މިވަނީ ކުންފުނީގެ ޗެއަރމަން ކުމާރު މަންގަލަމް ބިރުލާ އެ މަޤާމުން މިދިޔަ ހަފްތާ އިސްތިއުފާ ދީފައި ވަނިކޮށެވެ. ކުމާރު އިސްތިއުފާ ދީފައިވަނީ ކުންފުނިން އިންޑިއާ ސަރުކާރަށް ދައްކަންޖެހޭ ބޮޑު ޢަދަދެއްގެ ފައިސާ ދައްކަން ކުންފުންޏަށް އުނދަގޫވެދާނެ ކަމަށް ބުނެއެވެ.
ލައިސަންސް ފީ އާއެކު އެއަރވޭވްސް ބޭނުންކޮށްގެން ކުރިއަށް އޮތް 10 އަހަރު ތެރޭގައި ކުންފުނިން 6.7 ބިލިއަން އެމެރިކާ ޑޮލަރު ސަރުކާރަށް ދައްކަން އެބައޮތެވެ. މިކަމާއިގުޅިގެން ކުންފުނިން ވަނީ ރިވިއު ޕެޓިޝަނެއް އިންޑިއާގެ ސުޕްރީމް ކޯޓަށް ހުށަހަޅާފައެވެ.