އިނގިރޭސިވިލާތުން ޔޫރަޕް އިއްތިހާދަށް މުދާ ބޭރުކުރާ މިންވަރު އަހަރުގެ ފުރަތަމަ 6 މަސްދުވަހު 18 އިންސައްތައަށް ދަށްވެއްޖެ ކަމަށް ޔޫރަޕް އިއްތިހާދުގެ ހިސާބުތަކުން ދައްކައިފިއެވެ.
ޔޫރޯ ސްޓެޓްގެ ހިސާބުތަކުން ދައްކާގޮތުގައި މިއަހަރުގެ ޖެނުއަރީން ޖޫންގެ ނިޔަލަށް މުދާ ބޭރުކުރި މިންވަރު ވަނީ 18.2 އިންސައްތައަށް ދަށްވެފައެވެ. އަދި މިއީ މިދިޔަ އަހަރުގެ މި މުއްދަތާއި އަޅާބަލާއިރު ދަށް އަދަދެއް ކަމަށް ހިސާބުތަކުން ދައްކައެވެ. ނަމަވެސް އިނގިރޭސިވިލާތުގެ ރަސްމީ ހިސާބުތަކުން ދައްކާގޮތުގައި ޔޫރަޕްގެ އިއްޠިޙާދުން އެ ޤައުމު ވަކިވުމުގެ ކުރިން ހުރި މިންވަރަށްވުރެ އިތުރަށް އެ ޤައުމުން ޔޫރަޕަށްވަނީ މުދާ ބޭރުކޮށްފައެވެ.
ޔޫރަޕްގެ އިއްތިޙާދުން އިނގިރޭސިވިލާތަށް މުދާބޭރުކުރި މިންވަރު ވަނީ 5.5 އިންސައްތައަށް އިތުރުވެފައެވެ. ޔޫރޯ ސްޓެޓްގެ ހިސާބުތަކަށް ޖުމްލަ ގޮތެއްގައި ބަލާއިރު ޔޫރަޕް އިއްތިހާދުން މުދާ ބޭރުކުރި މިންވަރު މިދިޔަ އަހަރުގެ ޖޫން މަހާއި އަޅާބަލާއިރު މިއަހަރުގެ ޖޫންމަހު ވަނީ 22.3 އިންސައްތައަށް އިތުރުވެފައެވެ. މީގެއިތުރުން ދުނިޔޭގެ އެހެން ޤައުމުތަކުން ޔޫރަޕްގެ އިއްތިހާދަށް މުދާ އެތެރެކުރިވަރުވަނީ 29.6 އިންސައްތައަށް އިތުރުވެފައެވެ.
ޔޫރަޕްގެ އިއްތިޙާދަށް އެންމެ ގިނައިން މުދާ އެތެރެކުރާ 10 ބައިވެރިންގެ ތެރެއިން މުދާ އެތެރެކުރުން ދަށްވެފައިވަނީ ހަމައެކަނި އިނގިރޭސިވިލާތުންނެވެ. އަނެއް 9 ޤައުމު ކަމަށްވާ ޗައިނާ، އެމެރިކާ، ސްވިޓްޒަރލޭންޑް، ރަޝިއާ، ތުރުކީވިލާތް، ޖަޕާން، ނޯވޭ، ދެކުނު ކޮރެއާ އަދި އިންޑިއާއިންވެސް ޔޫރަޕަށް މުދާ އެތެރެކުރާވަރު ވަނީ އިތުރުވެފައެވެ.