މާލޭގެ މަގުތައް ރަނގަޅު ފެންވަރަކަށް ހެދުމަށް ހިންގާ "ސްޓްރީޓް ސްކޭޕިންގް ޕްރޮޖެކްޓް"ގެ ދަށުން ހެންވޭރު އުތުރުގެ މަގުތައް ހެދުމުގެ މަސައްކަތް ފަށައިފިއެވެ. ހެންވޭރުގެ މަގުތައް ހެދުމުގެ މަސައްކަތް ފެށުމަށް ބޭއްވި ރަސްމިއްޔާތުގައި އެ މަސައްކަތް ފަށްޓަވައިދެއްވީ މާލެ ސިޓީ ކައުންސިލްގެ މޭޔަރު ޑރ.މުޙައްމަދު މުއިއްޒުއެވެ.
މާލޭގެ މަގުތައް ރަނގަޅު ފެންވަރަކަށް ހެދުމަށް ހިންގާ މަޝްރޫއުގެ ދަށުން ހެންވޭރު އުތުރުގެ މަގުތައް ހެދުމަށް ރޯޑް ޑިވެލޮޕްމަންޓް ކޯޕަރޭޝަންއާއި ހަވާލުކޮށްފައިވަނީ މިއަހަރުގެ އޭޕްރީލް މަހުގެ 6 ވަނަ ދުވަހުއެވެ. ހެންވޭރުގެ އިތުރަށް މައްޗަންގޮޅި ދެކުނާއި މައްޗަންގޮޅި މެދު ސަރަޙައްދުގެ ބައެއް މަގުތައް ހެދުމަށްވެސް އެދުވަހު ވަނީ އެކުންފުންޏާ ހަވާލުކޮށްފައެވެ. މިއީ މަގުތައް ރަނގަޅު ފެންވަރަށް ތަރައްޤީ ކުރުމަށް ކުރިއަށް ގެންދާ މަޝްރޫޢުގެ ދެވަނަ ފިޔވަހީގެ މަސައްކަތެވެ.
މި މަސައްކަތުގެ ދަށުން ހެންވޭރު އުތުރުގެ 13 މަގެއް ހެދުމަށްވަނީ ހަމަޖެހިފައެވެ. އެއީ ވައިލެޓް ހިނގުން، ވައިލެޓް މަގު، ގުލިސްތާން ގޯޅި، ހިރުނދު މަގު، ދުނބުރި މަގު، ރޯޝަނީމަގު، ކުރަނގި ގޯޅި، ކަސްތޫރި މަގު، ސީސަން މަގު، ސަނދުބަރަކާ ގޯޅި، ދީފުރަމް ގޯޅި، ގަލަދުން ގޯޅި އަދި ފިލިގަސް މަގެވެ. މި މަގުތަކުން ޖުމްލަ 1.97 ކިލޯމީޓަރު ހަދާނެއެވެ. މި މަޝްރޫޢަށް ޖުމުލަ 70.1 މިލިއަން ރުފިޔާ ޚަރަދުވެއެވެ.
ހެންވޭރު އުތުރުގެ މަގުތައް ހެދުމުގެ މަސައްކަތް ފެށުމަށް ބޭއްވި ރަސްމިއްޔާތުގައި މާލޭ ސިޓީ ކައުންސިލްގެ މޭޔަރު ޑރ.މުޙައްމަދު މުއިއްޒު ވިދާޅުވީ ރަނގަލު ފެންވަރަށް މާލޭގެ މަގުތައް ހެދުމުގެ މަޝްރޫއުގެ ތެރެއިން މާލޭގެ މައި ހުރިހާ މަގުތަކެއް ތާރުއަޅައިގެން ހެދުމަށް ސަރުކާރުގެ ހުއްދައަކަށް އެދިފައިވާކަމަށެވެ. މަގުތައް ތާރު އަޅައިގެން ހެދިއްޖެނަމަ އެއްގަމު އުޅަނދު ދުއްވާ ފަރާތްތަކަށްވެސް އެކަމުގެ ފައިދާތައް ކުރާނެ ކަމަށް މޭޔަރު ވިދާޅުވިއެވެ. އެގޮތުން ރިންގްރޯޑްގެ އިތުރަށް މާލޭގެ ހުރިހާ ދާއިރާއެއް ކަވަރ ވާނެގޮތަށް މަޢުލޫމާތުތައް އެއްކުރުމަށްފަހު މިހާރު އެ މަޢުލޫމާތުތައް ހުށައަޅާފައިވާ ކަމަށް މޭޔަރ ވިދާޅުވިއެވެ.
"މަގުތައް ޒަމާނީ ފެންވަރަށް، އަދި ރައްޔިތުންނަށް ހިތްފަސޭހަ ތަނަކަށް ހެދުމަކީ މުހިއްމުކަމެއް. އެގޮތުން އެކަންތައް ފުރިހަމަކުރުމަށް މަސައްކަތް ކުރަމުން މިދަނީ. މިއީ މުޅި މާލޭގެ ރައްޔިތުންނަށް ފައިދާވާނެ ގޮތަކަށް ކުރިއަށްގެންދާނެ މަޝްރޫޢެއް." މާލޭގެ މޭޔަރ ޑރ.މުޙައްމަދު މުޢިއްޒު ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން އާރްޑީސީގެ މެނޭޖިން ޑިރެކްޓަރ މޫސާ އަލިމަނިކު ވިދާޅުވީ މި މަސައްކަތް ނުފެށި ލަސްވެފައިވަނީ ސިޓީ ކައުންސިލުން މަޝްރޫޢަށް ގެންނަން ޖެހޭ ބައެއް ބަދަލުތައް ހުރުމާއެކު ކުންފުނިންވެސް އެކަމަށް ތައްޔާރުވާން ޖެހުމުންކަމަށެވެ. މޫސާ އަލިމަނިކު ވިދާޅުވީ އެކުންފުނިން މަސައްކަތް ކުރަމުންދަނީ މާލޭގެ މަގުތައް ވީހާވެސް ރަނގަޅު ފެންވަރެއްގައި ހެދުމަށް ކަމަށާއި މިހާރުވެސް ހަދާފައިވާ މަގުތަކުގައި ކުރިން ހުރި މައްސަލަތަކަށްވެސް ހައްލު ގެނެސްފައިވާ ކަމަށް އޭނާ ވިދަޅުވިއެވެ.
" ކުރިން ހަދާފައިވާ މަގުތަކުން ރައްޔިތުންގެ ހިތްހަމަޖެހުން ވެސް އެބައޮތް. ފެންބޮޑުވުންފަދަ ގިނަ މައްސަލަތަކަށް ހައްލު ވަނީ ލިބިފައި. ކުންފުނިން ބޭނުންވަނީ ރައްޔިތުންގެ ޝަކުވާތައް އަޑުއަހާ އެ ޝަކުވާތަކަށް ހައްލު ގެންނަން. "މޫސާ އަލިމަނިކު ވިދާޅުވިއެވެ.
މާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތް ފަށާފައިވަނީ 2020ވަނަ އަހަރުގެ ފެބުރުއަރީ މަހުއެވެ. މަސައްކަތް ފުރަތަމަ ފެށީ މާފަންނު ހުޅަނގުގައެވެ. މީގެތެރެއިން ބައެއް މަގުތަކުގެ މަސައްކަތް ނިންމާ މިހާރުވަނީ ބޭނުންކުރަންވެސް ހުޅުވާލާފައެވެ. މާލޭ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތުގެ ދަށުން މާލޭގެ 416 މަގެއް ހެދުމަށް ވަނީ ނިންމާފައެވެ.