އޮސްޓްރޭލިއާގެ ކްވަންތަސް އެއަރލައިނުގެ ހުރިހާ މުވައްޒަފުން ވެކްސިން ފުރިހަމަކުރުމަށް އަންގައިފިއެވެ.
އެއަރލައިނުން ބުނީ، ފޮރޮންޓްލައިންގައި މަސައްކަތްކުރާ މުވައްޒަފުންކަމުގައިވާ ޕައިލެޓުން، ކެބިން ކްރޫއިން އަދި އެއަރޕޯރޓްގައި މަސައްކަތްކުރާ މުވައްޒަފުންވެސް އަންނަ ނޮވެމްބަރުމަސް ދެބައި ވާންވާއިރަށް ވެކްސިންގެ ދެ ޑޯޒް ފުރިހަމަކުރަންޖެހޭނެކަމަށެވެ. މީގެއިތުރުން އެހެން މުވައްޒަފުންވެސް އަންނަ އަހަރުގެ މާރޗްމަސް ނިމެންވާއިރަށް ވެކްސިން ދެ ޑޯޒް ފުރިހަމަކުރަން ވަނީ އަންގާފައެވެ.
ކްވަންތަސް އިން މިގޮތަށް ނިންމާފައި މިވަނީ ކޯވިޑްގެ ކޭސްތައް ގިނަވެ، އޮސްޓްރޭލިއާގެ ނިއު ސައުތު ވޭލްސްގައި ދުވާލެއްގެ މައްޗަށް ބަލިޖެހޭ މިންވަރު ރެކޯޑް ޢަދަދަކަށް އިތުރުވެފައިވަނިކޮށެވެ.
ކްވަންތަސްގެ ޗީފް އެކްޒެކްޓިވް އެލެން ޖޯއިސް ވިދާޅުވި ގޮތުގައި މިހާ މުހިންމު ޚިދުމަތެއް ދޭއިރު ވެކްސިން ފުރިހަމަކުރުމުން އެއަރލައިނަށް ލިބޭ ގެއްލުން ކުޑަކުރެވޭނެކަމަށެވެ. އަދި މި ބަލިމަޑުކަން ނައްތާލުމަށް ކުރެވެން އޮތް ހަމައެކަނި ކަމަކީ ވެކްސިން ޖެހުން ކަމުގައިވެސް އެލެން ވިދާޅުވިއެވެ.
ކްވަންތަސް އިން ބުނިގޮތުގައި 220000 މުވައްޒަފުން ހިމަނައިގެން ނެގި ޕޯލްއެއްގައި ޖަވާބުދިން މީހުންގެ ތެރެއިން 89 އިންސައްތަ މީހުންނަކީ މިހާރުވެސް ވެކްސިން ޖަހާފައިވާ އަދި ވެކްސިންޖަހަން ތައްޔާރުވާ މީހުންނެވެ. އަދި މީގެތެރެއިން ތިންބައިކުޅައެއްބައި މީހުން ދެކޭގޮތުގައި ވެކްސިން މަޖްބޫރުކުރުވަން ޖެހެއެވެ.
އޮސްޓްރޭލިއާގެ ކްވަންތަސް އެއަރލައިނުގެ ހުރިހާ މުވައްޒަފުން ވެކްސިން ފުރިހަމަކުރުމަށް އަންގާފައިވާއިރު، ދުނިޔޭގެ ބައެއް އެހެން އެއަރލައިންތަކާއި ކުންފުނިތަކުންވެސް ދަނީ މިގޮތަށް އަމަލުކުރަމުންނެވެ.