އެމެރިކާގެ ކާނާއުފައްދާ ކުންފުނި ކަމަށްވާ ކްރާފްޓް ހެއިންޒްގެ މުވައްޒަފުން އަންނަ އަހަރުގެ ޖެނުއަރީ މަހު އެނބުރި މަސައްކަތަށް ނިކުންނައިރު ވެކްސިން ފުރިހަމަ ކުރަން އެކުންފުނިން އަންގައިފިއެވެ.
މި ނިންމުން ނިންމާފައިވަނީ އެމެރިކާގައި އަނެއްކާވެސް ހަލުއިކަމާއިއެކު ކޯވިޑްގެ ޑެލްޓާ ވޭރިއަންޓް ފެތުރެން ފެށުމާއި ގުޅިގެންނެވެ. އަދި ކުންފުނިން މި ގޮތަށް ނިންމާފައި މިވަނީ އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން އިން ފައިޒާ ވެކްސިން އަށް ހުއްދަ ދީފައި ވަނިކޮށެވެ.
ކޯވިޑްގެ ބަލިމަޑުކަން އަނެއްކާވެސް ފެތުރެން ފެށުމާއިއެކު އުޞޫލުތައް ވަރުގަދަކުރުމުން ވެކްސިން ދިނުމާއި މާސްކު އެޅުމުގެ އުޞޫލުތަކަށް އެމެރިކާގެ ގިނަ ކުންފުނިތަކަކުން ވަނީ ބަދަލުގެނެސްފައެވެ.
ކްރާފްޓް ހެއިންޒްގެ އިތުރުން ބޭންކް އޮފް އެމެރިކާއިން އަންނަ މަހު އޮފީސް ހުޅުވާއިރު ހުރިހާ މުވައްޒަފުން ވެކްސިން ފުރިހަމަކުރަން ވަނީ އަންގާފައެވެ. ޚަބަރުފަތުރާ ނެޓްވޯކް ސީއެންއެން އިންވެސް ވަނީ އެމެރިކާގައި ހުންނަ ސިއެންއެންގެ އޮފީހަށް މުވައްޒަފުން މަސައްކަތަށް ނިކުންނައިރު ވެކްސިން ފުރިހަމަ ކުރަން އަންގާފައެވެ.
މީގެއިތުރުން ޖުލައި މަސް ނިމެންވާއިރަށް ކުންފުނީގެ ހުރިހާ މުވައްޒަފުން ވެކްސިން ފުރިހަމަކުރުމަށް ގޫގްލްއިންވެސް ވަނީ މުވައްޒަފުންނަށް އަންގާފައެވެ. މިއާއިއެކު ޖޯންސަން އެންޑް ޖޯންސަން، މެކްޑޮނާލްޑްސް، މައިކްރޯސްފްޓް އަދި ވޯލްމާޓުންވެސް ވަނީ މުވައްޒަފުންނަށް ވެކްސިން ފުރިހަމަ ކުރުމަށް އަންގާފައެވެ.