ހއ. ތުރާކުނުން ފެށިގެން އައްޑޫ ސިޓީއާއި ހަމައަށް ޖެޓް ސްކީގައި ދަތުރުކޮށް ރެކޯޑެއް ހެދުމުގެ މަސައްކަތް މޯލްޑިވްސް ވޯޓާރ ސްޕޯޓްސް އެސޯސިއޭޝަނުން ފަށައިފިއެވެ. މި ހަރަކާތަކީ ދުނިޔޭގެ ފަތުރުވެރިކަމުގެ ދުވަހާއި ގުޅުވައިގެން ކުރިއަށްގެންދަން ރާވާފައިވާ ހަރަކާތެކެވެ.
މޯލްޑިވްސް ވޯޓަރ ސްޕޯޓްސް އާއި އައްޑޫ ސިޓީ ކައުންސިލް ގުޅިގެން ކުރިއަށް ގެންދާ މި ހަރަކާތް އިފްތިތާހު ކުރުމަށް ހޮނިހިރު ދުވަހު ހުޅުމާލޭ ވޯޓަރ ސްޕޯޓްސް ސަރަހައްދުގައި ވަނީ ޚާއްސަ ރަސްމިއްޔާތެއް ބާއްވާފައެވެ. މި ހަރަކާތް އިފްތިތާހު ކޮށްދެއްވީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރ، ސުހެއިލް އަހުމަދާއި ޑެޕިއުޓީ މެނޭޖިން ޑިރެކްޓަރ، އަހްމަދް އާތިފެވެ.
"މޯލްޑިވްސް ޖެޓް ސްކީ ޓުއަރ – ނޯތު ޓު ސައުތު"ގެ ނަމުގައި ބާއްވާ މި ހަރަކާތް އިންތިޒާމްކުރުމުގައި އިސްކޮށް ހަރަކާތެރިވާ ހަސަން މުޙައްމަދު ވިދާޅުވީ މި ހަރަކާތުގެ ތެރެއިން ރާއްޖޭގައި ރެކޯޑެއް ޤާއިމްކުރެވިގެންދާނެ ކަމަށެވެ. އަދި ސަލާމަތީގޮތުން ބަލަން ޖެހޭ ކަންތައްތަކަށްވެސް ޚާއްސަ ސަމާލުކަމެއް ދޭނެ ކަމަށެވެ.
" ދެ މަޤްސަދެއް އެބަ އޮތް، ޓޫރިޒަމް ޑޭ އާއި ގުޅުވައިގެން މިކަން ކުރުން، އަނެއް ކަމަކީ، ރެކޯޑެއް ހެދުން، ޖެޓް ސްކީގައި ދާއިރު، އެމްއެންޑީއެފްގެ ސަޕޯޓް ލިބޭނެ، އަޅުގަނޑުމެންގެ އަމިއްލަ ލޯންޗެއްވެސް އެސްކޯޓު ކުރާނެ، ސޭފްޓީ މެޝާސްއަށްވެސް ބަލައިގެން މި މަސައްކަތް މިކުރަނީ،" ހަސަން ވިދާޅުވިއެވެ.
އުތުރުން ދެކުނަށް ފަށަން ނިންމާފައިވާ މި ހަރަކާތް ކުރިއަށްދަނީ ސެޕްޓެމްބަރ މަހު 22ން 27ގެ ނިޔަލަށެވެ. މި ދަތުރުގެ ތެރެއިން 20 މަންޒިލަކަށް ޒިޔާރަތްކޮށް، 4 ރަށެއްގައި މަޑުކުރާނެއެވެ. މި ހަރަކާތުގެ ތެރެއިން ފަތުރުވެރިކަމާއި މޫދު ކުޅިވަރާއި އޮތް ގުޅުން ދައްކުވައިދޭނެ ކަމަށް ވޯޓަރ ސްޕޯޓްސް އެސޯސިއޭޝަނުން ހާމަކުރެއެވެ.
މި ހަރަކާތާއި ގުޅޭ އިތުރު ތަފްސީލްދެއްވަމުން މި ހަރަކާތް އިންތިޒާމްކުރުމުގައި އިސްކޮށް ހަރަކާތްތެރިވާ މުޙައްމަދު ނަސީރު ވިދާޅުވީ ރަސްމީކޮށް އުޅޭނީ 6 ރައިޑަރުން ކަމަށެވެ. އެހެން ނަމަވެސް ރާއްޖޭގެ އެކި ހިސާބުތަކުން އެކި ހިސާބުތަކަށް ބައިވެރިވާ ފަރާތްތައް އުޅޭނެ ކަމަށް އޭނާ ވިދާޅުވިއެވެ.
" އޮފިޝަލް 6 ރައިޑާސް އުޅޭނެ، އުޅޭނެ ޖޮއިން ކުރާ ފަރާތްތައް ވަކި ހިސާބުތަކަށް، އެކަމު އޮފިޝަލީ އުޅޭނީ 6 ރައިޑާސް، އެއީ މީގަ ލިމިޓޭޝަންސްތަކެއް ހުރީމަ އެއަށް ވުރެ ގިނަ ނުކުރަން ވެގެން، ސޭފްޓީ އާއި ކޮންޑިޝަންއަށް ބަލާފަ 6 ރައިޑާޒް މި ނަގަނީ،" މުޙައްމަދު ނަސީރު ވިދާޅުވިއެވެ.
ޖެޓް ސްކީ ހަރަކާތް ނިންމާލުމަށް ފަހު އައްޑޫގައި ބާއްވާ މޫދު ކުޅިވަރު ހަރަކާތުގައިވެސް މި ޓީމްގެ ފަރާތުން ބައިވެރިވާނެއެވެ.