މިއަހަރު ނިމޭއިރު ރާއްޖޭގައި އަލަށް ހުޅުވިގެންދާނީ 11 ރިސޯޓް ކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ޓޫރިޒަމް މިނިސްޓްރީން ވިދާޅުވީ އަހަރުގެ މިހާތަނަށް 4 ރިސޯޓެއް ހުޅުވާފައިވާ ކަމަށެވެ. އެ ހަތަރު ރިސޯޓަކީ ޕަޓީނާ މޯލްޑިވްސް ރިސޯޓާއި ރިޒްކާލްޓަން މޯލްޑިވްސް އާއި ކުޑަ ވިލިނގިލީގެ އިތުރުން ލު މެރިޑަން މޯލްޑިވްސް ރިސޯޓް އެންޑް ސްޕާ އެވެ.
އަހަރުގެ ބާކީ އޮތްތާގައި 7 ރިސޯޓު ހުޅުވިގެންދާނެ ކަމަށް ޓޫރިޒަމް މިނިސްޓްރީން މައުލޫމާތުދިން ނަމަވެސް އެއީ ކޮން ރިސޯޓްތަކެއް ކަމެއް އެ މިނިސްޓްރީން ހާމައެއް ނުކުރައްވައެވެ.
ސަރުކާރުން ކުރިން ވިދާޅުވެފައިވަނީ މި އަހަރު އަލަށް 18 ރިސޯޓެއް ހުޅުވޭނެ ކަމަށެވެ. އެގޮތުން މިއަހަރުގެ ރައްޔިތުންގެ މަޖްލިސް ފެށުމަށް ބޭއްވި ޖަލްސާގައި، ރިޔާސީ ބަޔާން އިއްވަވަމުން ރައީސް އިބްރާހީމް މުޙައްމަދު ޞާލިޙު ވިދާޅުވެފައިވަނީ މިއަހަރުގެ ތެރޭގައި ޖުމްލަ 18 ރިސޯޓެއް މުޅިން އަލަށް ހުޅުވި 5062 އެނދު މާކެޓަށް ނެރެވޭނެކަމަށެވެ. އަދި މިއާއެކު ރިސޯޓުތަކާއެކު ފަތުރުވެރިކަމުގެ ދާއިރާއިން އެކަނިވެސް، އިތުރު 9000 ވަޒީފާ މިއަހަރުގެ ތެރޭގައި އުފެދޭނެ ކަމަށް ލަފާކުރެވޭ ކަމަށެވެ.
އެހެން ނަމަވެސް މި އަދަދަށް ރާއްޖޭގައި މިއަހަރު ރިސޯޓު ހުޅުވިގެން ނުދާނެ ކަމަށް ޓޫރިޒަމް މިނިސްޓްރީން ހާމަކޮށްފައިވާއިރު، ކޯވިޑާއި ގުޅިގެން ރާއްޖޭގެ އިޤްތިސާދަށް މިއަހަރުތެރޭވެސް ވަނީ ގިނަ ދަތިތަކަކާއި ކުރިމަތިލާން ޖެހިފައެވެ.
ކޯވިޑްގެ ކޭސްތައް ރެކޯޑް އަދަދުތަކަކަށް އިތުރުވެ އަހަރުގެ މެދުތެރޭ ރާއްޖެއަށް ފަތުރުވެރިން އަންނަ އަދަދުތަށްވެސް ދަށަށް ދިޔައެވެ. މިއާއެކު ރާއްޖޭގެ ފަތުރުވެރިކަމުގެ ދާއިރާއަށް ގިނަ އަސަރުތަކެއް ކުރިއެވެ. އެހެން ނަމަވެސް ކޯވިޑްގެ ހާލަތު ރާއްޖޭގައި ރަނގަޅުވެ، ރާއްޖެއަށް އަންނަ ފަތުރުވެރިންގެ އަދަދު މިހާރުވަނީ އިތުރުވެފައެވެ. އަދި މި އަހަރު ނިމޭއިރު ރާއްޖެއަށް 1.1 މިލިއަން ފަތުރުވެރިން އަންނާނެކަމަށް ސަރުކާރުން ލަފާކުރެއެވެ.
ކޯވިޑާއި ގުޅިގެން ރިސޯޓުތައް ތަރައްޤީކުރުމުގެ މަޝްރޫޢުތަކަށްވެސް ހުއްޓުމެއް އައުމުން މިދިޔަ އަހަރުތެރޭ އަލަށް ހުޅުވާފައިވަނީ 4 ރިސޯޓެވެ. އެ އަހަރުތެރޭ ހުޅުވޭނެ ކަމަށް ލަފާކޮށްފައިވަނީ 12 ރިސޯޓެވެ.