ޓެސްލާއިން މިއަހަރުގެ 3 ވަނަ ކުއާޓަރުގައި ރެކޯޑް އަދަދަކަށް އިލެކްޓްރިކް ކާރު ވިއްކާފައިވާކަމަށް އެކުންފުނިން ހާމަކޮށްފިއެވެ.
އެމެރިކާގެ އިލެކްޓްރިކް ވެހިކަލް އުފައްދާ ކުންފުނި ޓެސްލާއިން މިއަހަރުގެ ތިންވަނަ ކުއާޓަރުގައި ކާރު ވިއްކާފައިވާ މިންވަރަކީ ވޯލް ސްޓްރީޓުން އެ ކުއާޓަރުގައި ޓެސްލާއިން ކާރު ވިއްކާނެކަމަށް ލަފާކުރި އަދަދަށްވުރެ އިތުރު އަދަދެކެވެ.
ދުނިޔޭގެ ބާޒާރުން އިލެކްޓްރިކް ކާރަށް ބޭނުންވާ ޗިޕް ލިބުމުގައި ދިމާވެފައިވާ ދަތިތަކާއެކު ޓެސްލާވެފައިވަނީ އެކުންފުނީގެ ވާދަވެރި އެހެން ކުންފުނިތަކާއި އަޅާބަލާއިރު އެންމެ ބޮޑު ކުރިއެރުމެއް ހޯދި ކުންފުންޏަށެވެ.
ތަފާސް ހިސާބުތައް ދައްކާގޮތުން ޓެސްލާ ކުންފުނިން މިއަހަރުގެ ޖުލައިމަހުން ފެށިގެން ސެޕްޓެމްބަރުމަހުގެ ނިޔަލަށް އިލެކްޓްރިކް ކާރު ވިއްކާފައިވާ މިންވަރު ވަނީ ދެވަނަ ކުއާޓަރާއި އަޅާ ބަލާއިރު 20 އިންސައްތަ އިތުރުވެފައެވެ. މިއާއެކު އެކުންފުންޏަށް ޖެހިޖެހިގެން 6 ކުއާޓަރުގައި މިވަނީ އެއް ކުއާޓަރަށްވުރެ އަނެއް ކުއާޓަރގައި ލިބޭ ފައިދާ އިތުރުވެފައެވެ.
ޓެސްލާގެ ޗައިނާގެ ކާރުޙާނާއިން ޔޫރަޕަށް އެކްސްޕޯޓްކޮށްފައިވާ ކާރުގެ އަދަދަށްވަނީ ބޮޑު ކުރިއެރުމެއް ލިބިފައެވެ. މީގެ މައިގަނޑު ސަބަބެއްކަމަށް ބެލެވެނީ ޓެސްލާގެ ޗައިނާގެ ކާރުޙާނާގައި އުފައްދާ 'މޮޑެލް ވައި' ގެ އުފެއްދުންތަކަށް އޮތް ޑިމާންޑު ބޮޑުވުމެވެ. މޮޑެލް ވައި އަކީ ޓެސްލާގެ އެންމެ އަގުހެޔޮ އެއް މޮޑެލްއެވެ.
މިއަހަރުގެ ޖުލައިއިން ސެޕްޓެމްބަރުމަހުގެ ނިޔަލަށް ޓެސްލާއިންވަނީ 241،300 ވެހިކަލް ވިއްކާފައެވެ. މިއީ މިދިޔަ އަހަރުގެ މި މުއްދަތާއި އަޅާ ބަލާއިރު 73 އިންސައްތަ އިތުރު އަދަދެކެވެ.
ޓެސްލާއާއި ވާދަވެރި ކުންފުނިތަށް ކަމަށްވާ ހޮންޑާ އާދި ޖެނެރަލް މޮޓޯސްއިން މިއަހަރުގެ ތިންވަނަ ކުއާޓަރގައި ވަނީ ގެއްލުމާއި ކުރިމަތިލާން ޖެހިފައެވެ. މީގެ މައިގަނޑު ސަބަބަކީ ޗިޕް ނުލިބުމުގެ މައްސަލަ ދިގުލައިގެން ދިޔުމެވެ.
އެގޮތުން ޖެނެރަލް މޮޓޯސްގެ ވިޔަފާރިވަނީ މިއަހަރުގެ ތިންވަނަ ކުއާޓަރުގައި 33 އިންސައްތައަށް ދަށްވެފައެވެ. މިއީ ފާއިތުވީ 10 އަހަރުތެރޭ ވިޔަފާރި މިހާބޮޑަށް ދަށަށް ދިޔަ ފުރަތަމަ ފަހަރެވެ.