ތަޢުލީމީ ދާއިރާ ކުރިއަށްދާނީ ހުނަރުވެރި މުދައްރިސުންތަކެއް ބިނާކުރެވިގެންކަމަށާއި އެންމެ ހުނަރުވެރި ދަރިވަރުން މުދައްރިސުންނަށް ވުމަށް މިނިސްޓަރ އޮފް އެޑިއުކޭޝަން ޑރ.އައިޝަތު އަލީ އެދިވަޑައިގެންފިއެވެ.
2019 ވަނަ އަހަރުގެ އޭލެވެލް އިމްތިހާނުގެ ގަދަ 10 ގައި ހިމެނުނު ދަރިވަރުންނަށް އެވޯޑް ދިނުމަށް ބޭއްވި ރަސްމިއްޔާތުގައި މިނިސްޓަރ ވަނީ އެންމެ ކާމިޔާބު ކުދިންކަމަށް ވެފައިވަނީ، އެ ކުދީން ހޯދި ޢިލްމާއި ހުނަރު އެންމެ ފުޅާ ދާއިރާއެއްގައި ޤައުމަށް ފޯރުކޮށްދޭ ކުދިންކަމަށް ވިދާޅުވެފައެވެ.
އޭލެވެލް ގަދަ 10ގައި ހިމެނުނު ދަރިވަރުންނަށް އެވޯޑް ދިނުމަށް ބޭއްވި ރަސްމިއްޔާތުގައި އެޑިއުކޭޝަން މިނިސްޓަރ ވިދާޅުވީ އުނގަންނައިދިނުމުގެ މަސައްކަތަކީ، އޭގެ އަސަރުތައް އެތައް ޖީލަކަށް ފެތުރިގެންދާ، ދުނިޔެއާއި އާޚިރަތުގައި ހެޔޮ ޖަޒާ ލިބޭ، އަބުރުވެރި މަސައްކަތެއްކަމަށެވެ. އެއީ ރަނގަޅު މުޖުތަމަޢުއެއް ބިނާކުރުމަށް ކޮށްދެވޭނޭ އެންމެ ބޮޑު އެއް ޚިދުމަތްކަން ފާހަގަކުރައްވާ މިނިސްޓަރ ވަނީ ހުނަރުވެރި ދަރިވަރުން މުދައްރިސުންނަށް ވުމަށް އެދިވަޑައިގެންފައެވެ.
ތަމްރީނުން ނުކުންނަ މުދައްރިސުންގެ ފެންވަރު އެންމެ ބޮޑަށް ބިނާވާނީ ކޯހަށް ވަންނަ ދަރިވަރުންގެ ފެންވަރުގެ މައްޗަށް ކަމަށާއި މޮޅެތި މުދައްރިސުން ތަޢުލީމީ ނިޒާމަށް ވަނުމަކީ، މޮޅެތި ދަރިވަރުން މުސްތަޤްބަލްގައި މަދަރުސާތަކުން ތަރުބިއްޔަތު ކުރެވޭނެ ކަމެއްކަމަށް މިނިސްޓަރ ވިދާޅުވިއެވެ.
"ޤައުމުދެކެ ލޯބިވާ، ތަޢުލީމަށް ލޯބިކުރާ އެތައްބޭފުޅުންނެއް މިރޭ މިސްކޫލްގައި، މި ޖަލްސާގައި ތިބޭނެ.
މިހުރިހާ ބޭފުޅުންގެ އެދުމަކަށްވާނީ، އަހަރަކަށް ވުރެ އަހަރެއް، ތަޢުލީމީ ގޮތުން ދިވެހިރާއްޖެ ކުރިއަށް ދިއުން. މި މަޤްޞަދު ޙާޞިލްކުރުމަށް ކުރެވޭނޭ އެންމެ މުހިއްމުކަމަކީ، ހުނަރުވެރި މުދައްރިސުން ތަމްރީނުކުރުން. ބައެއް ޤައުމުތަކުގައި، މިސާލަކަށް ފިންލަންޑް އާއި ސިންގަޕޫރު ފަދަ ޤައުމުތަކުގައި، އެންމެ ހުނަރުވެރިކުދީން ޚިޔާރުކުރާ އެއް މަސައްކަތަކީ މުދައްރިސްކަން."މިނިސްޓަރ އޮފް އެޑިއުކޭޝަން ޑރ.އައިޝަތު އަލީ ވިދާޅުވިއެވެ.
މީގެކުރިން ރަން ވަނަތައް ހާސިލްކޮށްފައިވާ ދަރިވަރުންގެ ހަޔާތަށް ބަލާއިރު އެންމެ ބޮޑު އަސަރެއް މުޖުތަމަޢުއަށް ގެނެސްފައިވަނީ ހަމައެކަނި ތަޢުލީމީގޮތުން މޮޅު ކުދީން ނޫންކަން މިނިސްޓަރ ފާހަގަކުރެއްވިއެވެ. އޭގެ ބަދަލުގައި އެންމެ ކާމިޔާބު ކުދީންކަމަށް ވެފައިވަނީ، އެ ކުދީން ހޯދި ޢިލްމާއި ހުނަރު އެންމެ ފުޅާ ދާއިރާއެއްގައި ޤައުމަށް ފޯރުކޮށްދިނުމުގެ ސަބަބުންކަން މިނިސްޓަރ ފާހަގަކުރެއްވިއެވެ
"ލިބޭ މުސާރައަށް ވުރެ، އިޖްތިމާޢީ މަންފާއަށް ޚިދުމަތުގެ އަތުކުރި އޮޅާލި ކުދީންކަން. ޖެހުނު ކޮންމެ ކަމެއް ކުރަން ފަސް ނުޖެހި ކެރުނު ކުދީންކަން. މައްސަލަތައް ހައްލުކުރުމަށް އިސްނަގައި، ވޮލަންޓިއަރ ކުރި ކުދީންކަން.އެތައް ބައެއްގެ ނަޒަރުގައި ދިރިއުޅުމުގެ ކާމިޔާބުގެ އެންމެ ބޮޑު ސިއްރަކީ، ވަކި އަމާޒަކަށް ދަތުރުކުރުމުގައި، ސާބިތުވެހުރުން. ދިމާވާ ހާދިސާތަކާއި ދަތިތަކުން ފަހަތަށް ނުޖެހި، ބޭސާބިތުކަމަށް ޖާގަނުދީ، ހިތްވަރާއެކު މަސައްކަތް ކުރުން" މިނިސްޓަރ އޮފް އެޑިއުކޭޝަން ޑރ.އައިޝަތު އަލީ ވިދާޅުވިއެވެ.
މި ހަފްލާގައި މިނިސްޓަރ ވަނީ ކިޔެވުމުގެ ރޮނގުން މޮޅުކުދިން ފާހަގަކުރާ ފަދައިން އެފަދަ ދަރިވަރުންގެ ހުނަރުތަކާއި ޤާބިލިއްޔަތުވެސް ފާހަގަކުރުމަށް ގޮވާލައްވާފައެވެ. އަދި ކޮންމެ ކުއްޖެއްގެ ޝައުގު ދެނެގަނެ އެ ދާއިރާއަކުން އެކުދިން ކުރިއަށް ގެންދިއުމަށް މަސައްކަތް ކުރަންޖެހޭކަން މިނިސްޓަރ ފާހަގަކުރެއްވިއެވެ.