ގދ.ހޯޑެއްދޫ އުތުރުން އޮންނަ ކުޅިތަކުގެ ގުދުރަތީ ރީތިކަން ދަމަހެއްޓުމަށްޓަކައި އެ ސަރަޙައްދުގައި ނޭޗަރ ޕާކެއް ހަދަން ނިންމައިފިއެވެ. މި ނެޗަރ ޕާކް ހެދުމަށްޓަކައި ހޯޑެއްދޫ ކައުންސިލާއި ހުވަދޫ އެއިޑާ ދެމެދުވަނީ އެއްބަސްވުމެއްގައި ސޮއިކޮށްފައެވެ.
ގދ.ހޯޑެއްދޫ ހުޅަނގު އުތުރުން އޮންނަ ކުޅިތަކުގެ ގުދުރަތީ ރީތިކަން ދަމަހައްޓައި، އެތަނަކީ އިޖުތިމާއީ ގޮތުންނާއި އިގްތިސާދީގޮތުން ބޭނުންހިފޭ މުހިންމު ތަނެއްގެ ގޮތުގައި، ނޭޗަރ ޕާކެއް ތަރައްގީކުރުމަށް ވަނީ ނިންމާފައެވެ. އެއީ ކުޅިތަކާއި، ގޮނޑުދޮށް އަދި މޫދުގެ ރީތި ގުދުރަތީ މާހައުލު ޙިމާޔަތްކޮށް، ދެމެހެއްޓެނިވި ގޮތަކަށް، ބޭނުންކޮށް، ޢާއިލާތަކަށް ހިތްހަމަޖައްސާލަން ވަގުތު ހޭދަކުރެވޭނެ ހިތްފަސޭހަ މައިދާންތަކަށް ބަދަލުކުރުމަށް ހިންގާ މަޝްރޫއެކެވެ.
މިމަޝްރޫއުގެ ދަށުން، ކުޅީގެ ނެތެމުންދާ ގުދުރަތީ ރީތިކަން އާލާކުރުމާއި ޢިލްމީ ދިރާސާކުރުމާއި ހިތްފަސޭހަ މައިޒާނެއްގެ ގޮތުގައި ކުޅިތައް ބޭނުންކުރުމަށް، ކުޅިތަކުގެ ތެރެއަށް ވަދެ ނިކުމެ އުޅެވޭހެން ބޯޑްވޯކް ހެދުމާއި މަޑުކޮށްލައިގެން ތިބޭނެ ޕްލެޓްފޯމުތަކެއް ގާއިމްކުރުމަށް ވަނީ ހަމަޖެހިފައެވެ.
ހުވަދޫ އެއިޑްއިން ބުނީ ތިން އަހަރުގެ މުއްދަތަށް ހިންގާ މިމަޝްރޫއު ނިމޭއިރު ތިން މިލިޔަން އަށް ސަތޭކަ އަށްޑހަ ނުވަހާސް ފަސް ސަތޭކަ ހަތްދިހަ ރުފިޔާ ޚަރަދުވާނެކަމަށެވެ. މިމަޝްރޫއަކީ ހޯޑެއްދޫ ކައުންސިލުން އެއްވެސް ޚަރަދެއް ކުރަން ނުޖެހޭގޮތަށް ހުވަދޫއެއިޑްއިން އެކިފަރާތްތަކުގެ އެހީތެރިކަން ހޯދައިގެން ހިންގުމަށް ރާވާފައިވާ މަޝްރޫއެކެވެ.
މި މަޝްރޫއުގެ ދަށުން 1،392 ފޫޓު ދިގުމިނުގެ ބޯޑްވޯކާއި 11 ވިޔުއިން ޕްލެޓްފޯމްތައް، ކައުންސިލް އިން ފާސްކޮށްފައިވާ ކުރެހުމައި އެއްގޮތަށް ތަރައްގީކޮށް އެސަރަހައްދަށް ޒިޔާރާތްކުރާ ފަރާތްތަކަށް ހުޅުވާލާނެއެވެ. އަދި އެކި މީޓިން، އަދި ހަފްލާތައް ބޭއްވޭގޮތަށް ނޭޗަރ ޕާކް ޓަވަރ ގާއިމްކުރުމާއި3 ކެނޯ އަދި 3 ޕެޑަލް ބޯޓް ބައްވައި އާންމުންނަށް ބޭނުންކުރެވޭ ގޮތަށް ހަދަންވަނީ ހަމަޖެހިފައެވެ.
މީގެ އިތުރުން ކުޅިތައް ޙިމާޔަތްކޮށް ދެމެހެއްޓެނިވި ގޮތުގައި ބެލެހެއްޓުމުގެ ދާއިރާއިން 2 ތަމްރީނު ޕްރޮގްރާމް، ރަށުގެ މުއައްސަސާތަކާއި، މަދަނީ ޖަމްޢިއްޔާތައް އަދި ޢާންމުފަރުދުންނަށް އަމާޒުކޮށް ހިންގުމާއިމަޝްރޫއު ހިންގާ ސަރަހައްދު އާރޯކޮށް، ގަސް މަރުވެފައިވާ ސަރަހައްދުގެ %90 ފެހިކުރުމަށް މި މަޝްރޫއުގައި ހިމަނާފައިވެއެވެ.
ކުޅިގައި ހެދޭ އެކިވައްތަރުގެ ގަސް ހިމެނޭހެން 2000 ގަސް އިންދައި އެސަރަހައްދު ސާފުކޮށް ޗަކަ ނަގަންޖެހޭ ސަރަހައްދުތަކުގެ ޗަކަ ނެގުމާއި ކުޅިތަކުގެ މުހިންމުކަމާ ގުޅޭގޮތުން ރައްޔަތުން ހޭލުންތެރިކުރުވުމުގެއިތުރަށް، ކުޅި ހިމާޔަތްކޮށް ބެލެހެއްޓުން ރަށުތަރައްގީގެ ޕްލޭންގައި ހިމެނުމާއި އެކަމަށް ބޭނުންވާ ގަވާއިދުތައް ހެދައި ތަންފީޒުކުރުމުގައި ކައުންސިލަށް އެހީތެރިވެދިނުމަށް ވަނީ ނިންމާފައެވެ.
މި އެމް.އޯ.ޔޫ ގެ ދަށުން ހޯޑެއްދޫ ނެޗަރ ޕާކް ޕްލޭންގައިވާ ގޮތައް އެތަން ތަރައްގީ ކުރުމަށް 3 އަހަރާއި އެކު އިތުރު 5 އަހަރުވަންދެން އެތަން ހިންގައި ބަލަހައްޓާނީ ހުވަދޫ އެއިޑުންނެވެ. އަދި ހޯޑެއްދޫ ނޭޗަރ ޕާކް މެނޭޖްމެންޓް ޕްލޭނާ އެއްގޮތަށް އެތަން ހިންގުމަށް 7 މެންބަރުންގެ މައްޗަށް އެކުލެވޭ "ހޯޑެއްދޫ ނޭޗަރ ޕާކް މެނޭޖްމެންޓް ކޮމިޓީ" އުފައްދައި، އެކޮމިޓީގެ ލަފާއި އިރުޝާދުގެ ދަށުން ނޭޗަރ ޕާކް ހިންގުމުގެ އެންމެހައި ކަންކަން ތަރުތީބުކޮށް ބަލަހައްޓަނީ ހުވަދޫ އެއިޑުންނެވެ.