ނިޝާން ޢިއްޒުއްދީންގެ ޢިއްޒަތުގެ ވެރިޔާ، ޢަލީ ޢުމަރުމަނިކު ދެމިއޮތުމުގެ ޢާލަމަށް ދަތުރުކުރެއްވުމަކީ، ހިތަށް ވަރަށް ފުން އަސަރެއް ކުރުވި ކަމެއް ކަމަށް ކުރީގެ ރައީސް މައުމޫން އަބްދުލްޤައްޔޫމް ވިދާޅުވެއްޖެއެވެ.އެމަނިކުފާނު މިހެން ވިދާޅުވެފައިވަނީ، ޢަލީ ޢުމަރު މަނިކުގެ ހަނދާނުގައި ހުޅުއްވާފައިވާ ތަޢުޒިޔާގެ ދަފުތަރުގައި މިއަދު ސޮއިކުރައްވައި ލިޔުއްވި ބަޔާނުގައެވެ. ތައުޒިޔާގެ ދަފުތަރުގައި ރައީސް މައުމޫން ލިޔުއްވި ބަޔާނުގައި ވިދާޅުވީ އެމަނިކުފާނާއި އަލްމަރުޙޫމް ޢަލީ ޢުމަރުމަނިކަކީ ޅައިރުއްސުރެ ގާތް ރަޙުމަތްތެރީން ކަމަށާއި، އެމަނިކުފާނުގެ ރިޔާސަތުގެ ތިރީސް އަހަރު ދުވަހުގެ ތެރޭގައި އެމަނިކުފާނުގެ ތާޢީދާއި އެއްބާރުލުން ލާމަސީލު ދަރަޖައަކަށް ދެއްވާފައިވާ ކަމަށެވެ. މިގޮތުން އިސްލާމީ މަރުކަޒު ބިނާ ކުރެއްވުމުގައްޔާއި، ހުޅުލޭ އެއާރޕޯޓުގެ އެޅުމުގެ މަސައްކަތުގެ އިތުރުން، މާލޭގެ ފެނާއި ނަރުދަމާގެ ނިޒާމު ޤާއިމްކުރެއްވުމުގެ އެކި މަރުޙަލާތަކުގައި އެމަނިކުފާނުގެ އެހީތެރިކަން ލިބިވަޑައިގެންނެވިކަން ފާހަގަކުރައްވާފައިވެއެވެ. އަދި މީގެ އިތުރުން ދިވެހިރާއްޖޭގެ މުވާސަލާތީ ޚިދުމަތްދޭން ފެށި ފުރަތަމަ ކުންފުނި – ދިރާގު އުފެއްދުމާއި ސިންގަޕޯރ އެއަރލައިންސްގެ ވައިގެ ދަތުރުތައް ރާއްޖެއަށް ފެށުމާއި، ވައިގެ އުދުހުންތަކުގެ މަޝްވަރާތަކާއި ތީމުގެ އިމާރާތް ކުރުމާއި މިނޫންވެސް ބޮޑެތި މަޝްރޫޢުތަކުގައި އެމަނިކުފާނުގެ ފަރާތުން ލިބިލެއްވި ލަފާފުޅާއި ކުރައްވާފައިވާ މަސައްކަތަކީ ދިވެހި ތާރީޙުން ފޮހެވިގެން ނުދާނެ ކަންތައްތަކެއް ކަމަށް ލިޔުއްވާފައިވެއެވެ.ރައީސް މައުމޫންގެ ބަޔާން ނިންމަވާލައްވާފައިވަނީ، ރާއްޖެ މިއަދު މިދެކޭ ތަރައްޤީގެ އުސްމިންތައް ހާސިލްކުރުމުގައްޔާއި ޤައުމު ބިނާ ކުރުމުގައި އަލްމަރްޙޫމް ޢަލީ ޢުމަރުމަނިކުގެ ކޮށްދެއްވާފައިވާ މަސައްކަތްޕުޅުތަކަކީ މިއަދުގެ ޒުވާނުންނަށް ހުރި އަގުހުރި ފިލާވަޅުތަކެއް ކަމަށް ވިދާޅުވެ، އެމަރުޙޫމަށް މާތްﷲ ގެ ރަޙުމަތުގެ ހިޔާވަހިކަމުގައި ލެއްވުން އެދި ދުޢާ ދަންނަވަމުންނެވެ.