ޓެސްލާ ކުންފުނީގެ ސީއީއޯ އެލަން މަސްކް ކުރި ޓްވީޓް ތަކަކާ ގުޅިގެން އެކުންފުންޏާ ދެކޮޅަށް ކޯޓަށް މައްސަލަ ހުށަހަޅައިފިއެވެ.
ޓެސްލާގެ އިންވެސްޓަރެއް ކަމަށްވާ ޑޭވިޑް ވާގްނަރ، މިދިޔަ ހަފްތާގައި އެމެރިކާގެ ޑެލެވެއާ ސްޓޭޓް ކޯޓަށް ހުށަހަޅާފައި މައްސަލައިގައި ވަނީ، ޓެސްލާގެ ހިންގާ ބޯޑުން ސެކުއިރިޓީސް އެންޑް އެކްސްޗޭންޖް ކޮމިޝަން، އެސްއީސީގެ ޤަވާޢިދުތަކާ ޚިލާފުވެފައިވޭތޯ ބެލުމަށް، ކުންފުނީގެ އެތެރޭގެ ލިޔެކިޔުންތައް ބެލުމަށް އެދިފައެވެ.
މި ދަޢުވާ ކޮށްފައިވަނީ 2018 ގައި ކުންފުންޏާ ގުޅޭގޮތުން މަސްކް ކުރި ޓްވީޓް ތަކާ ގުޅިގެން ކުރިމަތިވި ދަޢުވާއަކަށް އެސްއީސީއަށް ބަދަލު ދީގެން މައްސަލަ ޙައްލުކޮށްފައި ވަނިކޮށެވެ. އޭގެ ފަހުން އެފަދަ މައްސަލައެއް ތަކުރާރުވިޔަ ނުދިނުމަށްޓަކައި ކުންފުންޏާ ގުޅިގެން ސީއީއޯ ކުރާ ޓްވީޓްތައް ކުންފުނީގެ ލޯޔަރުން ލައްވާ ކުރީބައިގައި އެޕްރޫވް ކުރުވާފައިވާ ކަމަށް ޓެސްލާއިން ވަނީ އެއްބަސްވެފައެވެ.
ނަމަވެސް މިދިޔަ މަހު މަސްކް ކޮށްފައިވާ ޓްވީޓުގައި، ޓްވިޓަރ ބޭނުންކުރާ ފަރާތްތަކަށް ފެންނަނަމަ އޭނާގެ ޙިއްސާގެ %10 ވިއްކާލާނެ ކަމަށް ބުނުމުން، ބާޒާރުގައި ކުންފުނީގެ ޙިއްސާގެ އަގު ވަނީ ¼ ދަށަށް ޖެހިފައެވެ. މި ޓްވީޓަށް ފަހު މަސްކް ވަނީ މިހާތަނަށް 14 ބިލިއަން ޑޮލަރުގެ ޙިއްސާ ވިއްކާލާފައެވެ.
2018 ގައި އެސްއީސީ އާއެކު ވި އެއްބަސްވުމާ ޚިލާފަށް ޙިއްސާދާރުންނަށް އެތައް ބިލިއަން ޑޮލަރުގެ ގެއްލުން ދީފައިވާކަމަށް ބުނެ މިއަހަރުގެ މާރިޗުމަހުވެސް ޙިއްސާދާރަކު ވަނީ މަސްކް އާ ދެކޮޅަށް ދަޢުވާ ކޮށްފައެވެ.