މަޝްހޫރު ޓެކް ކުންފުނި އިންޓެލްއިން ފުރަތަމަ ފަހަރަށް ގޭމަރުންނަށް ޚާއްޞަކޮށްގެން ގްރެފިކް ޗިޕް ތައްޔާރުކޮށް، ބާޒާރަށް ނެރެފިއެވެ.
އެމެރިކާގެ ލަސްވޭގަސްގައި މިހާރު ކުރިއަށްދާ މިއަހަރުގެ ކޮންސިއުމަރ އިލެކްޓްރޯނިކްސް ޝޯވ ގައި މި ޗިޕްތައް ތަޢާރަފުކުރަމުން، އިންޓެލް އިން ބުނެފައިވަނީ ތަފާތު 50 މޮޑެލްއެއްގައި މި ޗިޕްތައް ފޯރުކޮށްދިނުމަށް ކޮމްޕިއުޓަރ އުފައްދާ ފަރާތްތަކާއެކު މަޝްވަރާކޮށްފައިވާ ކަމަށެވެ.
"އާރކް ގްރެފިކް ޗިޕްސް" ގެ ނަން ދީފައިވާ މި ޗިޕްތަކުން، ވީޑިއޯ ގޭމުތަކާއި އެހެނިހެން މަންޒަރުތައްވެސް ވީހާވެސް އަޞްލާއި ކައިރިކޮށް ދައްކުވައިދޭނެކަމަށް އިންޓެލް އިން ބުނެއެވެ. މި ޗިޕްތައް ގަންނަން ލިބޭނެ ކުންފުނިތަކުގެ ތެރޭގައި ޑެލް ޓެކްނޮލޮޖީސް، ލެނޯވޯ ގްރޫޕް، އަަދި ސެމްސަންގް އިލެކްޓްރޯނިކްސް ހިމެނެއެވެ.
ދުނިޔޭގެ ވިޔަފާރިއަށް ބަލާއިރު ފަހަކަށް އައިސް ބޮޑު ޑިމާންޑެއް އޮންނަ ގްރެފިކް ޗިޕް ވިޔަފާރީގެ އެންމެ ކުރީގައި މިވަގުތު އޮތީ އެންވިޑިއާ އެވެ. އެކުންފުނިން ފާއިތުވި އަހަރު ގްރެފިކް ޗިޕް ވިއްކައިގެން 9.8 ބިލިއަން އެމެރިކާ ޑޮލަރު ހޯދާފައިވެއެވެ.
މިއަހަރުގެ ކޮންސިއުމަރ އިލެކްޓްރޯނިކްސް ޝޯވ ގައި އެންވިޑީއާވެސް ބައިވެރިވެއެވެ. އެކުންފުނިން ބުނީ އެންމެ ފަހުން ގޭމަރުންނަށް ޚާއްޞަ ކޮށްގެން އެކުންފުނިން އުފެއްދި ގްރެފިކް ޗިޕް، ތަފާތު 160 މޮޑެލްއެއްގައި ކޮމްޕިއުޓަރު އުފައްދާ ކުންފުނިތަކުން ބޭނުންކުރުމަށް ނިންމާފައިވާކަަމަށެވެ.
ބެލެވޭގޮތުގައި މިދިޔަ އަހަރު އެންމެ ބޮޑު ޑިމާންޑަކާއެކު ސަރވަރ މެމަރީ ޗިޕް ވިއްކާފައިވަނީ ސެމްސަންގް އިންނެވެ. މިދިޔަ އަހަރުގެ ފަހު ކުއާޓަރުގައި އެކުންފުންޏަށް 12.7 ބިލިއަން ޑޮލަރުގެ ރެކޯޑު އާމްދަނީއެއް ލިބޭނެކަމަށް ލަފާކުރެވެއެވެ.
އިންޓެލް ކޯޕަރޭޝަނުން ފުރަތަމަ ފަހަރަށް ގްރެފިކް ޗިޕް އުފެއްދުމުގެ ވިޔަފާރީގެ ތެރެއަށް ވަތްނަމަވެސް އެންވިޑިއާ އަށްވުރެ ކުރިއަރައި ދާނެކަމަށް ދިރާސާކުރާ ފަރާތްތަކުން ލަފާކުރެއެވެ.