މިއުޒިކް ސްޓްރީމްކުރާ މަޝްހޫރު ޕްލެޓްފޯމް ސްޕޮޓިފައިއާއެކު އަގުބޮޑު ސްޕޮންސަރޝިޕް އެއްބަސްވުމެއް ޤާއިމްކުރުމަށް ސްޕެއިންގެ މަޝްހޫރު ފުޓްބޯޅަ ކްލަބް ބާސެލޯނާއިން ތައްޔާރުވެއްޖެއެވެ.
ހަބަރުތައް ބުނާގޮތުން ބާސެލޯނާއާއި ސްޕޮޓިފައިއާއެކު ޤާއިމްކުރުމަށް މަސައްކަތްކުރަމުންދަނީ ޖާޒީ އަދި ސްޓޭޑިއަމް ސްޕޮންސާޝިޕް އެއްބަސްވުމެކެވެ. އަދި މި އެއްބަސްވުންތަކުގެ ޖުމްލަ އަގު 280 މިލިއަން ޔޫރޯ ނުވަތަ 320 މިލިއަން ޑޮލަރަށް އަރާނެކަމަށް ހަބަރުތައް ބުނެއެވެ.
މި އެއްބަސްވުމުގެ ދަށުން ބާސެލޯނާގެ ފިރިހެން އަދި އަންހެން ޓީމުތަކުގެ ކުޅުންތެރިންގެ ޖާޒީގައި ސްޕޮޓިފައިގެ ލޯގޯ ބޭނުންކުރާނެއެވެ. އަދި ސްޓޭޑިއަމް ސްޕޮންސާޝިޕްގެ އެއްބަސްވުން ޤާއިމްކުރުމުން ސްޕޮޓިފައި ވެގެންދާނީ ބާސެލޯނާގެ މަޝްހޫރު ކޭމްޕްނޯ ދަނޑު ސްޕޮންސަރކުރާ ފުރަތަމަ ބްރޭންޑަށެވެ.
ބާސެލޯނާއާއި ސްޕޮޓިފައިއާއެކު ގާއިމްކުރާ އެއްބަސްވުމުގައި ސްޓޭޑިއަމް ރައިޓްސް ސްޕޮޓިފައިއަށް ދިނުމާއި ގުޅޭ މާއްދާއެއް ހިމެނޭކަމަށް ބައެއް ހަބަރުތައް ބުނިކަމުގައިވީނަމަވެސް، މި އެއްބަސްވުމާއެކު ބާސެލޯނާގެ ޒަމާންވީ ކޭމްޕްނޯ ސްޓޭޑިއަމްގެ ނަން ބަދަލުކުރާނެކަން ޔަގީނެއް ނޫނެވެ.
??????̀? ? pic.twitter.com/OJYwmr7aRl
— FC Barcelona (@FCBarcelona) February 7, 2022
ހަބަރުތައް ބުނާގޮތުން ބާސެލޯނާއާއި ސްޕޮޓިފައިއާއެކު ޤާއިމްކުރުމަށް ތައްޔާރުވަމުންދާ އެއްބަސްވުމާއި ގުޅޭ މައުލޫމާތު ވަރަށް އަވަހަށް ދެ ފަރާތުން އާއްމުކުރާނެއެވެ. ނަމަވެސް މިހާތަނަށް މިކަމާއި ގުޅޭގޮތުން ބާސެލޯނާއާއި ސްޕޮޓިފައިން ވާހަކަ ދައްކާފައެއް ނުވެއެވެ.
މީގެކުރިން ބާސެލޯނާގެ ފިރިހެން ޓީމުތަކުގެ ޖާޒީ ސްޕޮންސަރ ކޮށްފައިވަނީ ޖަޕާނުގެ ރީޓެއިލަރއެއްކަމަށްވާ ރަކޫޓެންއިންނެވެ. އެ އެއްބަސްވުން މިހާރު ހިނގަމުންދާ ސީޒަންގެ ނިޔަލަށް ހަމަވާނެއެވެ. އަދި އަންހެން ޓީމުގެ ޖާޒީ ސްޕޮންސަރކޮށްފައިވަނީ ސްޓެންލީ ބްލެކް އެންޑް ޑެކާރއިންނެވެ.
ބާސެލޯނާއާއި ސްޕޮޓިފައިން އަގުބޮޑު ސްޕޮންސަރޝިޕަކާއި ދިމާލަށް ދާއިރު، މިއީ ދަރަނި ބޮޑުވެ، މާލީ ހާލަތު ވަރަށް ދަށްކޮށް އުޅޭ ބާސެލޯނާގެ މާލީ ހާލަތު ވަރަށް ބޮޑަށް ރަނގަޅުވެގެންދާނެ އެއްބަސްވުމެކެވެ. އަދި ކުރިއަށް އޮތް ހޫނު މޫސުމުގައި އެ ޓީމު ވަރުގަދަކުރުމަށް ކުޅުންތެރިން ހޯދުމުގެ މަސައްކަތް މި އެއްބަސްވުމުގެ ދަށުން ފަސޭޙަވެގެންދާނެއެވެ.