ޖަޕާނުގައި ރާއްޖެއަށް އޮތް މަޤްބޫލުކަން ދެމެހެއްޓުމަށް އެމްއެމްޕީއާރުސީން ޓުއަރ އޮޕަރޭޓަރ، ޖޭޓީބީ މީޑިއާ ރީޓެއިލިންއާއެކު ވެބިނާއެއް ބާއްވައިފިއެވެ.
ޖޭޓީބީއަކީ ޖަޕާނުގައި އެންމެ ފުޅާ ދާއިރާއެއްގައި ފަތުރުވެރިކަމުގެ ޕެކޭޖުތައް ވިއްކުމުގައި ހަރަކާތްތެރިވާ އެއް ކުންފުންޏެވެ. މި ކުންފުންޏަކީ ރާއްޖޭގެ ޕެކޭޖުތައް ވިއްކުމުގައިވެސް އެންމެ ފުޅާ ދާއިރާއެއްގައި ހަރަކާތްތެރިވާ އެއް ކުންފުންޏެވެ. ޖޭޓީބީ މީޑިއާ ރީޓެއިލިންއަކީ ޖަޕާނުގެ ޖޭޓީބީ ގުރޫޕުގެ ސަބްސިޑަރީއެކެވެ. މި ކުންފުނި ހާއްސަކުރެވިފައިވަނީ " ޖޭޓީބީ ޓަބީ މޮނޮގަތަރީ" ނުވަތަ "ޖޭޓީބީ ޓްރެވަލް ސްޓޯރީ"ގެ ނަމުގައި ފަތުރުވެރިކަމުގެ ޕެކޭޖުތައް ވިއްކުމުގައެވެ.
މޯލްޑިވްސް މަރކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީ އާއި ޖޭޓީބީ ގުޅިގެން ބޭއްވި ވެބިނާއަކީ ރާއްޖެއަކީ ފަތުރުވެރިން ދަތުރުކުރުމަށް ރައްކާތެރި މަންޒިލެއްގެ ގޮތުގައި އިޝްތިހާރުކުރުމަށް އިންޑަސްޓްރީގެ ފަރާތްތަކާއި ގުޅިގެން ކުރިއަށް ގެންދިޔަ ވެބިނާއެކެވެ.
އެމްއެމްޕީއާރުސީން ވިދާޅުވީ 120 ފަރާތަކުން ބައިވެރިވި މިވެބިނާގައި ޖޭޓީބީގެ އިންޓްރޮޑަކްޝަނަކާއި، ރާއްޖޭގެ ޑެސްޓިނޭޝަން ޕްރެޒެންޓޭޝަނެއް، އަދި ޖުމެއިރާ މޯލްޑިވްސް އޮޅަހަލި އައިލެންޑްގެ "ޒޫމް" ލައިވް ސެޝަނެއްގެ އިތުރުން ކިއު އެންޑް އޭ ސެޝަނެއް ކުރިއަށް ގެންގޮސްފައިވާ ކަމަށެވެ. މި ވެބިނާގެ މަޤްސަދަކީ ރާއްޖެއަކީ ފަތުރުވެރިން ދަތުރުކުރުމަށް އެންމެ ރައްކާތެރި މަންޒިލްގެ ގޮތުގައި ޕްރޮމޯޓްކުރުމެވެ. އަދި ޖޭޓީބީގެ ކޮމިއުނިކޭޝަން ޗެނަލްތައް މެދުވެރިކޮށް ރާއްޖެއާ މެދު ޖަޕާން މާކެޓުގެ ފަރާތްތަކުގެ މެދުގައި އޮންނަ ހޭލުންތެރިކަން އިތުރުކޮށް، ޕަބްލިސިޓީ އިތުރުކުރުން ކަމަށެވެ.
މިވެބިނާ މެދުވެރިކޮށް 186165 ފަރާތަށް ރާއްޖޭގެ މައުލޫމާތު ފޯރުކޮށްދެވޭނެ ކަމަށް އެމްއެމްޕީއާރުސީން ލަފާކުރެއެވެ.
2019ވަނަ އަހަރު ޖުމްލަ 44251 ފަތުރުވެރިން ޖަޕާނުން ރާއްޖެއަށް އައިސްފައިވެއެވެ. ޖަޕާން މާކެޓަކީ އޭރު ރާއްޖެއަށް 9ވަނަ އަށް އެންމެ ގިނައިން ފަތުރުވެރިން އަންނަ ޤައުމެވެ. ކޯވިޑާއި ގުޅިގެން ޖަޕާންގެ ބޯޑަރު ބަންދުކޮށްފައި އޮތުމަށްފަހު މިހާރު އަލުން ހުޅުވާލާފައި ވީނަމަވެސް ޑޮމެސްޓިކް އަދި އިންޓަރނޭޝަނަލް ދަތުރުފަތުރު ކުރުމުގައި ރައްކާތެރިކަމުގެ ގިނަ ފިޔަވަޅުތަކެއްވަނީ އަޅާފައެވެ. އެމްއެމްޕީއާރުސީން ދަނީ މި މާކެޓުގައި ރާއްޖޭގެ ރީތި ނަން ދަމަހައްޓައި، މިއީ ޗުއްޓީ ހޭދަކުރަން ދަތުރުކުރުމަށް އެންމެ އިސްކަންދޭ މަންޒިލެއްގެ ގޮތުގައި ޕްރޮމޯޓުކުރަމުންނެވެ.