ދިރޭމަސް އެކްސްޕޯޓް ކުރުމަށްޓަކައި ހުށަހަޅާ އެކްސްޕޯޓް ޑިކްލަރޭޝަނުގައި ކޮންމެ ބާވަތެއްގެ ތަފްސީލްވެސް ވަކިން ހުށަހެޅުމަށް ކަސްޓަމްސްއިން އަންގައިފިއެވެ.
މޯލްޑިވްސް ކަސްޓަމްސް ސަރވިސްއިން ވިދާޅުވީ ދިރޭ މަހުގެ ބާވަތްތައް ރާއްޖެއިން އެކްސްޕޯޓްކުރުމަށްޓަކާ ކަސްޓަމްސްއަށް ހުށަހަޅާ އިންވޮއިސްއާއި ގުޑްސް ޑިކްލަރޭޝަނުގައި މަހުގެ އެކި ބާވަތްތައް އެއްކޮށްލުމަށްފަހު އެއް އައިޓަމެއްގެ ގޮތުގައި ބައެއް އެކްސްޕޯޓަރުން ޑިކްލެއަރ ކުރަމުންދާކަން ފާހަގަކުރެވިފައިވާ ކަމަށެވެ. މީގެ ސަބަބުން އެކްސްޕޯޓުގެ ތަފާސް ހިސާބު ބެލެހެއްޓުމުގައި ދަތިތަކާ ދިމާވާކަން ކަސްޓަމްސްއިން ފާހަގަކުރެއެވެ.
އެހެންކަމުން މާރޗުމަހުގެ 15ވަނަ ދުވަހުން ފެށިގެން ފާނަ އާއި އެނޫންވެސް ދިރޭމަސް އެކްސްޕޯޓްކުރުމަށްޓަކާ ހުށަހަޅާ އިންވޮއިސްއާއި އެކްސްޕޯޓް ޑިކްލަރޭޝަނުގައި ކޮންމެ ބާވަތެއްގެ ތަފްސީލާއި، ސައިޒާއި، ސައިންޓިފިކް ނަމާއި ސައްޙަ އަގު ވަކިން އެނގޭނެ ގޮތަށް ޑިކްލެއަރ ކުރަން ޖެހޭނެކަމަށް ކަސްޓަމްސްއިން ބުނެއެވެ.
ކަސްޓަމްސްއިން ވިދާޅުވީ އަންނަމަހުގެ 15 ވަނަ ދުވަހުގެ ފަހުން އެ އުސޫލާ ޚިލާފަށް ހުށަހަޅާ އެކްސްޕޯޓް ޑިކްލަރޭޝަންތައް ބަލައިނުގަންނާނެ ކަމަށެވެ.
ރާއްޖެއިން އެންމެ ގިނަ އަދަދަކަށް އެކްސްޕޯޓުކުރަނީ މަހުގެ ބާވަތްތައް ކަމަށްވާއިރު، ދިރޭ މަހުގެ ބާވަތްތަކަކީވެސް ގިނަ އަދަދަކަށް ރާއްޖެއިން އެކްސްޕޯޓުކުރާ ބާވަތެކެވެ.