އަގުހުރި ފައިސާގެ އިނާމްތަކަކާއެކު ދިވެހިރާއްޖޭގެ އަޑުގެ ކުރުވާހަކަ މުބާރާތުގައި ބައިވެރިވާން ހުޅުވާލައިފި

އަގުހުރި ފައިސާގެ އިނާމްތަކަކާއެކު ދިވެހިރާއްޖޭގެ އަޑުގެ ކުރުވާހަކަ މުބާރާތުގައި ބައިވެރިވާން ހުޅުވާލައިފިއެވެ.

ޕީ.އެސް.އެމްގެ ދިވެހިރާއްޖޭގެ އަޑުން އިންތިޒާމްކޮށްގެން ބާއްވާ ކުރުވާހަކަ މުބާރާތުގެ މަޤުޞަދަކީ ދިވެހި ބަހުގެ ކިޔުންތެރިކަމާއި ހުށަހެޅުންތެރިކަމުގެ ފަންނު ދިރުވައި އާލާކުރުވައި، އެ ފަންނާމެދު މީހުން ޝައުޤުވެރި ކުރުވުމެވެ. އަދި އަދަބީ ގޮތުންނާއި، ފިކުރީގޮތުން ފެންވަރު ރަނގަޅު އުފެއްދުންތަކަށް މަގުފަހިކުރުމާއި، އެފަދަ އުފެއްދުންތަކުގެ ޒަރީޢާއިން، މުޖުތަމަޢަށް ރަނގަޅު މެސެޖުތަކެއް ފޯރުކޮށް ދިނުމުގެ އިތުރުން ދިވެހި ބަހުން ކުރުވާހަކަ ލިޔުމުގެ ފަންނު ދިރުވައި އާލާކުރުމަށް ފުރުޞަތު ތަނަވަސް ކޮށްދިނުމެވެ.

މުޅި ރާއްޖެއަށް ހުޅުވާލައިގެން ކުރިއަށްގެންދާ މި މުބާރާތުގައި ބައިވެރިވުމުގެ ފުރުޞަތު އަންނަ މާރިޗުމަހުގެ 15 ވަނަ ދުވަހުގެ ނިޔަލަށް މިހާރު ވަނީ ހުޅުވާލާފައެވެ. މި މުބާރާތަށް އެކަކަށް އެއްވާހަކައަށްވުރެ ގިނަ ވާހަކަ ލިޔެވިދާނެއެވެ. އަދި ކިއިވެސް ދާނެއެވެ. އެއް ވާހަކައެއް މުބާރާތުގެ ދެ ބައިގައިވެސް ބައިވެރި ކުރެވިދާނެއެވެ. ނުވަތަ އިޚުތިޔާރުކުރާ ކޮންމެވެސް އެއް ބައެއްގައި ބައިވެރި ކުރެވިދާނެއެވެ. އެހެންކަމުން މުބާރާތުގެ ލިޔުންތެރިކަމުގެ ބައިގައި ބައިވެރިކުރާ ކޮންމެ ވާހަކައެއް ކިޔުންތެރިކަމުގެ ބައިގައި ބައިވެރިކުރުން ލާޒިމެއް ނޫނެވެ. އަދި ކިޔުންތެރިކަމުގެ ބައިގައި ބައިވެރިކުރާ ކޮންމެ ވާހަކައެއް ލިޔުންތެރިކަމުގެ ބައިގައި ބައިވެރިކުރުން ވެސް ލާޒިމެއް ނޫނެވެ.

މި މުބާރާތަށް ހުށަހަޅާ ވާހަކައަކީ، ކުރިން ޝާއިޢު ކުރެވިފައިނުވާ އަދި އެއްވެސް މުބާރާތަކަށް ހުށަހެޅިފައިނުވާ ވާހަކަ އަކަށް ވާންޖެހޭނެއެވެ. އަދި ވާހަކައިގެ ބަސްމަގު، އިޖުތިމާޢީ އަޚުލާޤީ މިންގަނޑުތަކަށް ފެތެންވާނެއެވެ.

ކުރުވާހަކަ މުބާރާތުގެ ޤަވާއިދު ހަމަޖެހިފައިވާގޮތުން މި މުބާރާތަށް ހުށަހަޅާ ވާހަކައެއް ކިޔުމުގައި 20 މިނިޓަށްވުރެ ކުރުވެގެން ނުވާނެއެވެ. އަދި 22 މިނިޓަށްވުރެ ދިގުވެގެން ނުވާނެއެވެ. މި މުބާރާތުގައި ކިޔުންތެރިކަމުގެ ބަޔާއި ލިޔުންތެރިކަމުގެ ބަޔަށް ވަނަ ހޮވާނީ ވަކިންނެވެ. އެގޮތުން ކޮންމެ ބަޔަކުން 1 ވަނަ، 2 ވަނަ، އަދި 3 ވަނަ ހޮވާނެއެވެ.

ކިޔުންތެރިކަމުގެ ބައިން ވަނަތައް ހޮވުމަށް އިންސާފުކުރުމުގައި ބަލާނީ އަޑު ގެންގުޅުމުގެ ލުއިކަމާއި ފަސޭހަކަމަށް %30، ހުށަހެޅުންތެރިކަމަށް %30 އަދި އިޙްސާސްތައް ފޯރުކޮށްދިނުމަށް %40 މާކްސްއެވެ. ލިޔުންތެރިކަމުގެ ބައިން ޙަޔާތުގެ ތަޞައްވުރު ކުރު ވާހަކައަކުން ގެނެސްދީފައިވާގޮތަށް %32، އިބާރާތުގެ ބަދަހިކަމަށް %23، އުފެއްދުންތެރިކަމަށް %25 އަދި ވާހަކައިގެ ރަހަ ނުވަތަ އަސަރު ހުރި މިންވަރަށް %20 އެވެ. ކޮންމެ ބަޔަކުން ވެސް 1 ވަނައަށް ހޮވޭނީ، %75 އިން މަތީ މިންވަރަކުން މާކްސް ލިބިގެންނެވެ. ދެވަނައަށް ދާނީ %65 އިން މަތީން މާކްސް ލިބިގެންނެވެ. ތިންވަނައަށް ދާނީ %55 އިން މަތީން މާކްސް ލިބިގެންނެވެ.

މިފަހަރުގެ ކުރުވާހަކަ މުބާރާތައްވެސް އަގުހުރި ފައިސާގެ އިނާމްތަކެއް ހުށަހެޅިފައިވެއެވެ. އެގޮތުން މުބާރާތުގެ އެއްވަނަ ލިޔުންތެރިޔާއަށް 10،000 ރުފިޔާ، ދެވަނަ ލިޔުންތެރިޔާއަށް 7000 ރުފިޔާ އަދި ތިން ވަނަ ލިޔުންތެރިޔާއަށް 5000 ރުފިޔާގެ ފައިސާގެ އިނާމެއް ދެވޭނެއެވެ. އަދި އެއްވަނަ ކިޔުންތެރިޔާއަށް 3000 ރުފިޔާ، ދެވަނަ ކިޔުންތެރިޔާއަށް 2500 ރުފިޔާ އަދި ތިން ވަނަ ކިޔުންތެރިޔާއަށް 2000 ރުފިޔާގެ ފައިސާގެ އިނާމެއް ވަނީ ހުށަހަޅާފައެވެ. ހަމައެހެންމެ މުބާރާތުގެ އެއްވަނަ ލިޔުންތެރިޔާއަށާއި ކިޔުންތެރިޔާއަށް ޚާއްސަ ޓްރޮފީއެއްވެސް ދެވޭނެއެވެ.

ކޮންމެ އަހަރެއްގެވެސް ރަމަޟާންމަހަށް ޚާއްސަކޮށްގެން ކުރިއަށްގެންދާ ކުރުވާހަކަ މުބާރާތަކީ ދިވެހިރާއްޖޭގެ އަޑުން މިގޮތަށް ގެނެސްދޭ އެންމެ ޒަމާންވީ އެއް މުބާރާތެވެ. އަދި މިއީ ގިނަ ބައެއްގެ މަޤުބޫލުކަން ލިބިގެންގޮސްފައިވާ މުބާރާތެއްވެސްމެއެވެ.