މިދިޔަމަހު އޮންލައިން ގޭމް ކުޅޭ ފަރާތްތަކެއްގެ އަތުން 600 މިލިއަން ޑޮލަރުގެ އަގުހުރި ކްރިޕްޓޯކަރަންސީ ވަގަށް ނެގުމުގެ ފަހަތުގައިވަނީ އުތުރު ކޮރެޔާއިން އެހީތެރިވާ ހެކަރުންތަކެއްކަމަށް އެމެރިކާއިން ބުނެފިއެވެ.
މިދިޔަ މާޗުމަހު ހިންގި މި ވައްކަމުގައި "އެކްސީ އިންފިނިޓީ" ނަމަކަށް ކިޔާ އޮންލައިން ގޭމެއް ކުޅޭ އެކި ގޭމަރުންގެ އަތުން ވަނީ 615 މިލިއަން ޑޮލަރެއްހާ ކްރިޕްޓޯކަރަންސީ ވަގަށް ނަގާފައެވެ. މިއީ މިހާތަނަށް ހިނގި ކްރިޕްޓޮކަރަންސީގެ އެންމެ ބޮޑު ވައްކަމަށްވެގެންދާނޭކަމަށް ކަމާއިބެހޭ ފަރާތްތަކުން ބުނެއެވެ.
އެމެރިކާގެ އޮފިޝަލުން ބުނާގޮތުން މިކަމުގެ ފަހަތުގައި ވަނީ އުތުރުކޮރެޔާގެ އިންޓެލިޖެންސް އިދާރާގެ ބެލުމުގެ ދަށުން ހަރަކާތްތެރިވާ "ލަޒާރުޒް" ނަމަކަށްކިޔާ ހެކަރުންގެ ގްރޫޕެއްކަމަށެވެ.
"ލަޒާރުޒް" ގޭންގް އެންމެ ފުރަތަަމަ ދުނިޔޭގެ ސަމާލުކަމަށް އައީ 2014 ވަނަ އަހަރު މަޝްހޫރު "ސޮނީ ޕިކްޗަރސް" ހެކްކޮށް، އެ ކުންފުނީގެ ހައްސާސް މައުލޫމާތުތަކެއް ލީކުކޮށްލި ހިސާބުންނެވެ. "ސޮނީ ޕިކްޗަރސް" ހެކްކުރުމަށްފަހު ހެކަރުންގެ ގްރޫޕުން ޑިމާންޑްކުރީ އުތުރު ކޮރެޔާގެ ލީޑަަރަށް ޖޯކު ޖަހާފައި ސޮނީ ކުންފުނިން ހެދި " ދަ އިންޓަރވިއު" ނަމަކަށް ކިޔާ ފިލްމު އެޅުވުން ހުއްޓުވުމަށެވެ.
އދގެ ޕެނަލަކުން ނެރުނު ރިޕޯޓެއްގައި ބުނެފައިވާގޮތުން އުތުުރު ކޮރެޔާގެ ނިއުކްލިއަރ ޕްރޮގްރާމަށް ހަރަދުކުރަމުންދަނީ މިގޮތަށް އެކި ތަންތަނުން ވަގަށް ނަގާ ފައިސާއިންނެވެ. އަދި މިއީ އެ ޤައުމާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުން ރެކެން ކުރާ ކަންކަންކަމަށްވެސް ބައެއް ފަރާތްތަކުން ބުނެއެވެ.
2020 ވަނަ އަހަރުގެ އެމެރިކާގެ މިލިޓަރީ ރިޕޯޓެއްގައިވާ ގޮތުން އުތުރު ކޮރެޔާގެ ހެކިންގ ޕްރޮގްރާމްތައް ނުވަދިހައިގެ އަހަރުތަކުގެ މެދުތެރޭގައި ވަނީ ފަށާފައެވެ. އަދި މިހާރު އެ ޤައުމުގެ ސައިބަރ ވޯފެއަރ ޔުނިޓްގައި 6000 އެއްހާ މީހުން ހަރަކާތްތެރިވަމުންދާކަމަށް އެމެރިކާއިން ތުހުމަތުކުރެއެވެ. މި ހެކަރުންތައް މަސައްކަތްކުރަނީ ރަޝިޔާ، ޗައިނާ، ބެލަރޫސް، މެލޭޝިޔާ އަދި އިންޑިއާގައިކަމަށްވެސް އެމެރިކާގެ ރިޕޯޓްތައް ބުނެއެވެ.