ސައިކަލު ވަގަށް ނަގައިގެން ހުށަހެޅޭ މައްސަލަތައް ފަހަކަށް އައިސް އިތުރުވަމުންދާކަމަށް ފުލުހުން ވިދާޅުވެއްޖެއެވެ. ފުލުހުން ވިދާޅުވީ، މަހެއްގެ މައްޗަށް އެވަރެޖޮކޮށް 30 އާއި 50 އާއި ދެމެދުގެ އަދަކަށް ހަމައެކަނި މާލެއިންވެސް މިފަދަ މައްސަލަތައް ފުލުހުންނަށް ހުށަހެޅޭކަމަށެވެ.
ޕީ.އެސް.އެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަދައްކަވަމުން އިންސްޕެކްޓަރ އޮފް ޕޮލިސް އިބްރާހީމް ޙަލީލް ވިދާޅުވީ، ވައްކަންކުރާ މީހުން ވައްކަން ކުރަނީ އެމީހުންނަށް ލިބޭ ހަނި ފުރުޞަތުތަކުގެ ބޭނުން ހިފައިގެންކަމަށެވެ. އެގޮތުން ސައިކަލު ވަގަށް ނަގައިގެން ރިޕޯޓްކޮށްފައިވާ ކޭސްތަކަށް ބަލާއިރުވެސް، ގިނަ ފަހަރަށް ވަގަން ނަގާފައި ހުންނަނީ ހަނދާންނެތިގެން ސައިކަލުގައި ތަޅުތަނޑިޖެހިފައި ނުވަތަ ޝަޓާލޮކްނުކުރެވި ހުންނަ ސައިކަލުތައްކަމަށެވެ. އަދި އާއްމުކޮށް މިގޮތަށް ސައިކަލުތައް ވަގަށް ނަގަނީވެސް އަލިކަން ކުޑަ، ސީސީޓީވީ ކެމެރާ ނުހުންނަ ނުވަތަ މީހުން މަދު ސަރަޙައްދުތަކުންކަމަށެވެ.
އާއްމުކޮށް ފުލުހުންނަށް ހުށަހެޅެނީވެސް ތަންކޮޅެއް ކުރީގެ ވޭވް 110 ނުވަތަ 125 ފަދަ ތަޅުދަނޑި ބޭނުންކޮށްގެން ފަސޭހައިން ހުޅުވޭ ޒާތުގެ ސައިކަލުތައް ވަގަށް ނަގައިގެންކަމަށް ފުލުހުން ފާހަގަކުރައްވައެވެ.
ޙަލީލް ވިދާޅުވީ، ސައިކަލުގެ ވެރި ފަރާތުން ހަނދާންނެތިގެން ސައިކަލުގައި ތަޅުދަނޑިޖެހުމަށްފަހު، ދޫކޮށްލާފައި ދެވިގެން މަހެއްގެ މައްޗަށް އެވެރަޖްކޮށް 100 އާއި ގާތަށް ތަޅުދަނޑި ވެރިފަރާތާއި ޙަވާލުކުރެވޭކަމަށެވެ. އަދި މަހެއްގެ މައްޗަށް އެވަރެޖްކޮށް ހަމައެކަނި މާލެއިންވެސް 30 އާއި 50 އާއި ދެމެދުގެ އަދަދަކަށް ސައިކަލު ވަގަށް ނަގައިގެން ފުލުހުންނަށް ރިޕޯޓްކުރެވޭކަމަށެވެ.
"މިހާރު މަހެއްގެ މައްޗަށް އެވަރެޖްކޮށް ތަޅުދަނޑި ސައިކަލަށް ޖަހާފައި، ތަޅުނުލާ ގެއަށްވެދައި ނޫނިއްޔާ ސައިކަލުގެ ވެރިފަރާތަށް ދޫކޮށްލެވިފައި ހުރެގެން އަޅުގަނޑުމެންނަށް 100 އާއި ގާތަށް އެ ތަޅުދަނޑިތައް ވެރިފަރާތާއި އެބަ ޙަވާލުކުރެވޭ. އަޅުގަނޑުމެން އޭގައި ސްޓިކަރއެއް އެބަ ހަރުކުރަން. މިތަޅުދަނޑިވަނީ ފުލުހުންގެ ބެލުމުގެ ދަށުގައޭ. މިވެނި ސްޓޭޝަނަކަށް ދުރުވާށޭ މިތަޅުތަނޑި ބަލާ. މިއީ ފުދޭވަރަކަށް ގިނަ އަދަދެއް" ޙަލީލް ވިދާޅުވިއެވެ.
ޙަލީލް ވިދާޅުވީ، ސައިކަލު ވަގަށް ނެގުމުގެ ކަންކަން ދުވާލާއި ރޭގަނޑު ގަޑީގައިވެސް ހިނގާކަމަށެވެ. އަދި މިގޮތަށް ނަގާ ސައިކަލުތައް ބައެއް މީހުން ކުށުގެ ވެށީގައި އެއްތަނުން އަނެއްތަނަށް ދަތުރުކުރުމަށް ބޭނުންކުރާކަމަށާއި، ގަރާޖުތަކަށް ގެންގޮސް ސައިކަލު ރޫޅާލާ، ވަކިވަކި ސްޕެއަރގެގޮތުގައި މާލެއާއި އަތޮޅުތަކަށް ވިއްކާކަން ފާހަގަކުރެވޭކަމަށްވެސް ޙަލީލް ވިދާޅުވިއެވެ.
މަގުމަތިން ވަގަށް ނަގާ ސައިކަލުތަކުގެ ރަޖިސްޓްރީ ނަންބަރުގެ ލިސްޓު މަގުމަތީގައި ހަރަކާތްތެރިވާ ފުލުހުން ގެންގުޅޭއިރު، ޗެކްޕޯސްޓްތައް ޖަހައިގެން ފުލުހުން ހިންގާ އެކިއެކި އޮޕަރޭޝަންތަކުންވެސް ވަގަށް ނަގާފައިވާ ސައިކަލުތައް ދެނެގަނެވި، ވެރިފަރާތާއި ޙަވާލުކުރެވޭކަން ފުލުހުން ފާހަގަކުރެއެވެ. އަދި ސައިކަލު ވަގަށް ނެގި ސަރަޙައްދުތަކުގައި ހިމެނޭ ސީސީޓީވީ ކެމެރާތަކުގެ ފުޓޭޖްތަކުގެ އެހީގައިވެސް ވަގަށް ނަގާ ސައިކަލުތައް ވަރަށް ގިނައިން ހޯދޭކަން ފުލުހުން ފާހަގަކުރެއެވެ.
އެހެންނަމަވެސް މިއީ މިހާރު އިތުރުވަމުންދާ މައްސަލައަކަށްވާތީ މިކަމަށް ރައްޔިތުން މިހާރަށްވުރެ ބޮޑަށް ފަރުވާތެރިވާންޖެހޭކަން ފުލުހުން ފާހަގަކުރެއެވެ. ޚާއްސަކޮށް ސައިކަލު ޕާކުކުރާއިރު، ރަނގަޅަށް ލޮކްކުރެވިފައިތޯ ހުރީ ޗެކްކޮށް ތަޅުދަނޑި ސައިކަލުން ނަގާފައިވާކަން ކަށަވަރުކުރުމަށާއި، ސައިކަލުގެ މަޑިދަށަށް އަގުބޮޑުތަކެއްޗާއި މުހިއްމު ލިޔެކިއުންތައް ދޫކޮށްނުލުމަށް ފުލުހުން ވަނީ ނަސޭހަތްތެރިވެފައެވެ. އަދި އަލިކަން ރަނގަޅު، ސީސީޓީވީ ކެމެރާ ހަރުކުރެވިފައިވާ ސަރަޙައްދުތަކުގައި ސައިކަލު ޕާކުކުރަން އިސްކަންދިނުމަށްވެސް ފުލުހުން އިލްތިމާސްކުރެއެވެ.