ހުޅުމާލޭ ދެވަނަ ފިޔަވަހީގައި ތަރައްޤީކޮށްފައިވާ ހިޔާގެ 4 ޓަވަރެއްގައި 700 އަށްވުރެ ގިނަ ސެކިއުރިޓީ ކެމެރާ ހަރުކޮށް ބޭނުންކުރަން ފަށައިފިއެވެ.
ހިޔާ ސަރަޙައްދުގައި ދިރިއުޅޭ އާބާދީ ދުވަހުން ދުވަހަށް އިތުރުވަމުން ދިއުމާއެކު، އެ ސަރަޙައްދުގައި ދިރިއުޅޭ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީން އަންނަނީ އެކި މަސައްކަތްތައް ކުރަމުންނެވެ. މީގެ ތެރެއިން ހިޔާ ޓަވަރުތަކުގައި ސީސީޓީވީ ކެމެރާ ހަރުކޮށް، އެ ސަރަޙައްދުގެ ސަވައިލަންސްގެ ކަންކަން ހަރުދަނާ ކުރުމަކީ އެކުންފުނިން ޚާއްސަ އިސްކަމެއްދީގެން ކުރަމުން އަންނަ މަސައްކަތެކެވެ.
މި މަސައްކަތުގެ ދަށުން ހިޔާގެ 4 ޓަވަރެއްގައި 768 ސެކިއުރިޓީ ކެމެރާ ހަރުކޮށް، މިހާރު އަންނަނީ ބޭނުންކުރަމުންނެވެ. އެ 4 ޓަވަރަކީ H14 ،H13 H15 އަދި H16 އެވެ. މިއިން ކޮންމެ ޓަވަރެއްގައި 192 ސެކިއުރިޓީ ކެމެރާ ހަރުކޮށްފައިވާކަމަށް އެޗް.ޑީ.ސީން ވިދާޅުވެއެވެ.
To ensure the security of tenants, 768 cameras have been installed and are in operation in Hiya towers H13-16. The project will be continued in all towers as well. #MageyHiya #MyHulhumalé pic.twitter.com/Xt2uxZ40du
— HDC (@hdcmaldives) July 20, 2022
އެޗް.ޑީ.ސީން ވިދާޅުވީ، ބާކީ ހުރި 12 ޓަވަރުގައިވެސް ކެމެރާ ހަރުކުރުމުގެ މަސައްކަތް ކުރަމުންދާކަމަށެވެ. އަދި މުޅި މި މަސައްކަތް އެއްކޮށް ނިމޭއިރު، ހިޔާ ޓަވަރުތަކުގައި ޖުމްލަ 3072 ސެކިއުރިޓީ ކެމެރާ ހަރުކުރެވިގެންދާނެކަމަށެވެ. މިކަން ކުރަމުންދަނީ އެކި ފަރާތްތަކާއި ޙަވާލުކޮށްގެން ކަމަށާއި، މަސައްކަތް ކުރަމުންދަނީ ވީހާވެސް އަވަހަށް ހުރިހާ ޓަވަރެއްގައި ކެމެރާ ހަރުކޮށް ނިންމުމަށްކަމަށްވެސް އެޗް.ޑީ.ސީން ވިދާޅުވެއެވެ.
ހިޔާ ފްލެޓްތަކަށް މީހުން ބަދަލުވާން ފެށި ދުވަސްވަރު އެ ސަރަޙައްދުގައި އަސާސީ ގިނަ ޚިދުމަތްތަކާއި، އެކަށީގެންވާ ރައްކާތެރިކަމެއް ލިބެންނެތުމަކީ ގިނަ ބައެއްގެ ކަންބޮޑުވުމެކެވެ. ވަކިން ޚާއްސަކޮށް ވައްކަމާއި މަސްތުވާތަކެތީގެ މައްސަލަތައް އެދުވަސްވަރު ހުށަހެޅޭ މިންވަރު އިތުރުވެގެންދިޔަކަންވެސް ފާހަގަކޮށްލެވެއެވެ. އެޗް.ޑީ.ސީން ދަނީ ކަމާގުޅޭ ފަރާތްތަކާގުޅިގެން އާއްމުންގެ މި ކަންބޮޑުވުންތަކަށް ޙައްލެއް ހޯދުމުގެ މަސައްކަތް ކުރަމުންނެވެ.
އެގޮތުން ހިޔާ ސަރަޙައްދުގައި މެނޭޖްމަންޓް އޮފީހަކާއި، 7 ފިހާރައަކާއި، 2 ސުޕަރ މާކެޓާއި، 2 ކްލިނިކާއި، ފާމަސީއަކާއި، ބޭކަރީއެއް މިހާރު ވަނީ ހުޅުވާފައެވެ. އަދި 3 ކެފޭއާއި، ސެލޫނަކާއި، މިސްކިތަކާއި، 2 ވަގުތީ މިސްކިތެއް އެ ސަރަޙައްދުގައި ޤާއިމުކޮށްފައިވެއެވެ. ހަމައެހެންމެ މިމަހުގެ 3 ވަނަ ދުވަހު ހުޅުމާލޭ ދެވަނަ ފިޔަވަހީގައި ޤާއިމްކުރި ޕޮލިސް ސްޓޭޝަން ރަސްމީކޮށް ހުޅުވައި ޚިދުމަތް ދޭން ވަނީ ފަށާފައެވެ