އިންޓަރނޭޝަނަލް ޔޯގާ ދުވަސް ފާހަގަކުރުމަށް ގަލޮޅު ދަނޑުގައި މިދިޔަމަހުގެ 21 ވަނަ ދުވަހު ކުރިއަށްގެންދިޔަ ހަރަކާތަށް ހުރަސް އަޅައި، ހަމަނުޖެހުން ހިންގި މައްސަލައިގައި އިތުރު 2 މީހަކު ހައްޔަރުކޮށްފިއެވެ.
ފުލުހުން ވިދާޅުވީ މި މައްސަލައިގައި ކޯޓު އަމުރެއްގެ ދަށުން އިއްޔެގެ ވަގުތެއްގައި 2 މީހަކު ހައްޔަރުކޮށްފައިވާކަމަށެވެ. އެގޮތުން ހައްޔަރުކޮށްފައިވަނީ 29 އަހަރުގެ ފިރިހެނަކާއި 36 އަހަރުގެ ފިރިހެނެކެވެ. ނަމަވެސް އެމީހުންނާއި ގުޅޭ އިތުރު ތަފްސީލެއް ފުލުހުން ނުދެއްވައެވެ.
ޔޯގާ ދުވަސް ފާހަގަކުރުމަށް ބޭއްވި ހަރަކާތަށް ހުރަސް އަޅައި، ހިންގި ހަމަނުޖެހުމާއި ގުޅިގެން މީގެކުރިން ވަނީ 21 މީހަކު ހައްޔަރުކޮށްފައެވެ. އޭގެތެރޭގައި ބައެއް ދީނީ އިލްމުވެރިންނާއި ސިޔާސީ ޕާޓީތަކުގެ އިސް ބޭފުޅުންވެސް ހިމެނެއެވެ. ނަމަވެސް އެ މީހުންގެ ތެރެއިން މިހާތަނަށް 6 މީހަކު ވަނީ ދޫކޮށްލާފައެވެ.
ފުލުހުން ވިދާޅުވީ ހަމަނުޖެހުމާއި ގުޅިގެން ހައްޔަރުކުރި ބައެއް މީހުން ދޫކޮށްލީ ބަލަންޖެހޭ ކަންކަން ބެލުމަށް ފަހުކަމަށެވެ. އަދި އެ މީހުން ދޫކޮށްލިޔަސް ޖިނާއީ ތަހުގީގު ކުރިއަށްދާނެކަމަށް ފުލުހުން ވިދާޅުވިއެވެ.
ޔޯގާ ހަރަކާތަށް ހުރަސް އެޅުމަށް ހިންގި ހަމަނުޖެހުމުގެ މައްސަލަ ސީރިއަސް މައްސަލައެއްގެ ގޮތުގައި ބަލަމުންދާއިރު، އެކަން ހިނގައިދިޔަ ގޮތް ބެއްލެވުމަށް ވަޒީރުންގެ މަޖިލީހުގެ ހާއްސަ ކޮމިޓީއެއްވެސް ވަނީ އެކުލަވާލާފައެވެ. މީގެއިތުރުން ހަމަނުޖެހުން ކޮންޓްރޯލްކުރުމުގައި ފުލުހުން އިހުމާލުވެފައިވާއިރު އެކަމުގައި ފުލުހުން އަމަލުކުރި ގޮތް ބެލުމަށްވެސް ހާއްސަ ތަހުޤީޤެއް ކުރިއަށްދާކަމަށް ފުލުހުން ވިދާޅުވެއެވެ.