އަލްމަދުރަސަތުލް ޢަރަބިއްޔަތުލް އިސްލާމިއްޔާގެ އައު ޢިމާރާތް ހަދަން ކުރީގެ ބައު ޖަމާލުއްދީން ތަޅާލުމުގެ މަސައްކަތް އަންނަ މަހުގެ ތެރޭގައި ނިންމާލެވޭނެކަމަށް މިނިސްޓަރ އޮފް އެޑިއުކޭޝަން ޑރ.ޢާއިޝަތު ޢަލީ ވިދާޅުވެއްޖެއެވެ.
ޢަރަބިއްޔާ ސްކޫލްގެ އައު ޢިމާރާތް ހަދަން އެތަން ތަޅާލުމުގެ މަސައްކަތް ފަށާފައިވަނީ ޖޫން މަހުގެ 16ވަނަ ދުވަހުގައެވެ.
ބައު ޖަމާލުއްދީން ތަޅާލުމުގެ މަސައްކަތް މިނިސްޓްރީ އޮފް އެޑިއުކޭޝަނުން ޙަވާލުކޮށްފައިވަނީ ވެލްޓްރޭޑިންގ ޕްރައިވެޓް ލިމިޓެޑާއެވެ. މިމަސައްކަތް އެކުންފުންޏާ ޙަވާލުކޮށްފައިވަނީ 75 ދުވަހުގެ ތެރޭގައި ނިންމާގޮތަށެވެ. މިމަޝްރޫޢު އެކުންފުންޏާ ހަވާލުކޮށްފައިވަނީ 2.5 މިލިއަނަށްވުރެ ގިނަ ރުފިޔާއަށެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން އެޑިއުކޭޝަން މިނިސްޓަރ ޑރ.ޢާއިޝަތު ޢަލީ ވިދާޅުވީ ބައު ޖަމާލުއްދީން ސްކޫލްގައި ހުރި ޢިމާރާތް ތަޅާލުމުގެ މަސައްކަތް އަންނަމަހުގެ 10ވަނަ ދުވަހު މުޅިން ނިންމާލެވޭނެކަމަށެވެ. އަދި އެ މަސައްކަތް ނިމުމާއެކު އިމާރާތް ހެދުމަށްޓަކައި ބަޔަކާ ހަވާލުކުރެވޭނެކަން މިނިސްޓަރ ފާހަގަކުރެއްވިއެވެ. މިނިސްޓަރ ވިދާޅުވީ އެ ސްކޫލް ހަވާލުކުރެވޭ ހިސާބުން 420 ދުވަހުގެ ތެރޭގައި މަސައްކަތް ނިންމާލެވޭނެގޮތަށް ބަޔަކާ ހަވާލުކުރުމަށް ނިންމާފައިވާކަމަށެވެ. އަދި އެ ސްކޫލް އިމާރާތް ކުރެވޭނީ ޢަރަބި ތާއުލީމް ރަމްޒުކޮށްދޭގޮތަކަށްކަމަށްވެސް މިނިސްޓަރ ވިދާޅުވިއެވެ. މިނިސްޓްރީގެ އަމާޒަކީ ސްކޫލްތައް އެއްދަންފަޅިއަށް ބަދަލުކުރުންކަން ފާހަގަކުރައްވައި މިނިސްޓަރ ވިދާޅުވީ އަލަށް އިމާރާތް ކުރާ ސްކޫލްތަކަކީ 1000އާއި 1500އާ ދެމެދުގެ ކުދިންނަށް އެއްފަހަރާ ކިޔެވޭނެ ސްކޫލްތަކަށް ހެދުމަށް މަސައްކަތްކުރައްވާކަމަށެވެ.
"ޢަރބިއްޔާ ސްކޫލްގެ އައު އިމާރާތުންވެސް ސްކޫލަކުން ލިބެންޖެހޭ ހުރިހާ ޚިދުމަތްތަކެއް ލިބެން ހުންނާނެ. ކުޅިވަރު ކުޅެވޭނެ އިންތިޒާމްތަކާއި، ލެބޯޓަރީއާއި ލައިބްރަރީ ހުންނާނެ. "މިނިސްޓަރ އޮފް އެޑިއުކޭޝަން ޑރ.ޢާއިޝަތު ޢަލީ ވިދާޅުވިއެވެ.
ޢަރބިއްޔާ ސްކޫލް ބައުވެ ބަލެނިވެރިންގެ ކަނބޮޑުވުން ފާޅުކުރުމުގެ ސަބަބުން އެކުދިންގެ ކިޔެވުން މިހާރު ވަނީ ކުރިން ފޮރިން މިނިސްޓްރީ ހިންގި ޢިމާރާތަށް ބަދަލުކޮށްފައެވެ. އެޑިއުކޭޝަން މިނިސްޓަރ ވިދާޅުވީ މިހާރުގެ ދަރުމަވަންތަ ސްކޫލްގެ ދަރިވަރުންގެ ކިޔެވުން މި ޓާރމްގެ ތެރޭގައި އެ ސްކޫލްގެ އައު އިމާރާތައް ބަދަލުކުރުމަށްފަހު އެ އިމާރާތައށް ޢަރަބިއްޔާ ކުދިން ބަދަލުކުރުމަށް ހަމަޖެހިފައިވާކަމަށެވެ.
ބައު ޖަމާލުއްދީން ސްކޫލްގައި މީގެކުރިން ހިންގަމުން އައީ އިލެކްޝަންސް ކޮމިޝަންގެ އިންތިޚާބާ ބެހޭ މަރުކަޒެވެ.
2013ވަނަ އަހަރުގެ ސެޕްޓެމްބަރު މަހު ޗާންދަނީމަގު އަމީނިއްޔާ ކުރިމަތިން ހުޅުވި އަރަބިއްޔާ ސްކޫލްގެ ޢިމާރާތުގެ ބޮޑުބައެއްގައި ރެނދުލައި އެތަނަކީ ދަރިވަރުން ތިބުން ރައްކާތެރި ތަނެއް ނޫންކަމަށް ބުނެ އެކަމުގެ ކަންބޮޑުވުން އެ ސްކޫލްގެ ބެލެނިވެރިން އުފުލިއެވެ. މިއާއި އެކު ޢަރަބިއްޔާ ދަރިވަރުން އެ އިމާރާތުން ނެރުމަށް ސަރުކާރުން ނިމެވިއެވެ. އަދި އެކުދިންގެ ކިޔެވުން ވަގުތީ ގޮތުން އިއްޒުއްދީން ސްކޫލަށް ބަދަލުކުރުމަށް އެޑިއުކޭޝަން މިނިސްޓްރީން ނިންމެވިއެވެ.
ޢަރަބިއްޔާގައި ކިޔަވަމުން ގެންދާ ހުރިހާ ދަރިވަރުންނަށް އިއްޒުއްދީން ސްކޫލްގައި ނުކިޔެވޭނެކަން ފާހަގަކޮށް މި ނިންމުން ބަދަލުކޮށްދިނުމަށް އެދި ޢަރަބިއްޔާ ޕީޓީއޭ މެމްބަރުން ވަނީ މިދިޔަ އަހަރުގެ ޑިސެމްބަރު 20 ވަނަދުވަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާ ބައްދަލުކުރައްވާ ބެލެނިވެރިންގެ ކަންބޮޑުވުން އެމަނިކުފާނާ ހިއްސާކުރައްވާފައެވެ. ބެލެނިވެރިންގެ ކަންބޮޑުވުންތަކަށް އައްސަވާ ރައީސް ވަނީ ޢަރަބިއްޔާ ސްކޫލަށް އައު އިމާރާތެއް އަޅުއްވާދެއްވާނެކަން ޔަޤީންކަށްދެއްވާ އެ ސްކޫލަށް ބައު ޖަމާލުދީން ހުރި ބިން ހަމަޖައްސަވާދެއްވާފައެވެ. އަދި އައު އިމާރާތް ނިމެންދެން ޢަރަބިއްޔާ ދަރިވަރުން ކިޔެވުމަށް ފޮރިން މިނިސްޓްރީން ބޭނުންކުރި ވަގުތީ އިމާރާތް ވަނީ ހަމަޖައްސަވާދެއްވާފައެވެ.
ހަތްސަތޭކައެއްހައި ދަރިވަރުން ކިޔަވަމުން އަންނަ ޢަރަބިއްޔާ ސްކޫލަކީ ރާއްޖޭގައި ޢަރަބި މީޑިއަމަށް ކިޔަވައިދެމުން އަންނަ ހަމައެކަނި ސްކޫލެވެ. ޢަރަބިއްޔާގެ މަންހަޖަކީ މިސްރުގެ އަލްއަޒްހަރު ޔުނިވަރސިޓީން ބަލައިގަންނަ މަންހަޖެކެވެ.